ఖర్చుకు వెనకాడకండి.. అధికారులకు సీఎం రేవంత్‌ రెడ్డి ఆదేశాలు..

హైద‌రాబాద్ న‌గ‌రంలో ప్రజావసరాలకు అనుగుణంగా అనుసంధాన (లింక్‌) రోడ్ల నిర్మాణం చేప‌ట్టాల‌ని ముఖ్యమంత్రి రేవంత్ రెడ్డి అధికారులకు సూచించారు. రాజ‌ధాని న‌గ‌రంతో పాటు హెచ్ఎండీఏ ప‌రిధిలో హైద‌రాబాద్ రోడ్డు డెవ‌ల‌ప్‌మెంట్ కార్పొరేష‌న్ ఆధ్వర్యలో చేప‌డుతున్న అనుసంధాన ర‌హ‌దారుల నిర్మాణం, విస్తరణపై ఐసీసీసీలో సీఎం స‌మీక్ష నిర్వహించారు.

వివిధ ప్రాంతాల మ‌ధ్య అనుసంధాన‌త పెంచ‌డం.. ప్రజ‌లకు ఎటువంటి అవాంత‌రాలు లేకుండా రాక‌పోక‌లు సాగించేందుకు వీలుగా ర‌హ‌దారుల నిర్మాణం ఉండాల‌ని ఆదేశించారు. హెచ్ఎండీఏ పరిధిలో 49 రోడ్ల నిర్మాణం.. విస్తర‌ణ‌పై ముఖ్యమంత్రి ప‌లు సూచ‌న‌లు చేశారు. అనుసంధాన ర‌హ‌దారుల నిర్మాణం, ప్రస్తుతం ఉన్న ర‌హ‌దారుల విస్తర‌ణ విష‌యంలో భ‌విష్యత్ అవ‌స‌రాలు.. విశాల ప్రజా ప్రయోజనాలను దృష్టిలో పెట్టుకోవాల‌ని అధికారుల‌కు సూచించారు. ఆయా ర‌హ‌దారుల నిర్మాణంతో ప్రయాణికుల ఇబ్బందులు తొల‌గిపోవ‌డంతో పాటు వారికి స‌మ‌యం క‌లిసి వ‌చ్చేలా ఉండాల‌ని, ఈ క్రమంలో అద‌న‌పు భూసేక‌ర‌ణ‌కు కొంత అధిక వ్యయ‌మైనా వెనుకాడ‌వ‌ద్దని చెప్పారు. ఈ స‌మీక్షలో ముఖ్యమంత్రి స‌ల‌హాదారు వేం న‌రేంద‌ర్ రెడ్డి , రాష్ట్ర ప్రభుత్వ ప్రధాన కార్యద‌ర్శి శాంతి కుమారితో పాటు ఇతర ఉన్నతాధికారులు పాల్గొన్నారు.

ఇదిలా ఉండగా.. ప్రవాసీ మిత్ర సంస్థ “రేవంత్ సర్కారు - గల్ఫ్ భరోసా” పేరుతో రూపొందించిన డాక్యుమెంటరీని ముఖ్యమంత్రి రేవంత్ రెడ్డి ఆవిష్కరించారు. గల్ఫ్ కార్మికులకు సామాజిక భద్రత కల్పిస్తూ ప్రభుత్వం వివిధ సంక్షేమ కార్యక్రమాలు చేపట్టిన నేపథ్యంలో ఈ డాక్యుమెంటరీని రూపొందించారు. ఈ కార్యక్రమంలో తెలంగాణ ఖనిజాభివృద్ధి సంస్థ చైర్మన్ ఈరవత్రి అనిల్‌, ప్రవాసీ మిత్ర ప్రతినిధులు మంద భీమ్ రెడ్డి గారు, పి. సునీల్ కుమార్ రెడ్డి , చెన్నమనేని శ్రీనివాసరావు గారితో పాటు ఇతర ప్రతినిధులు పాల్గొన్నారు.

శుక్రవారం గల్ఫ్ దేశాల్లో మృతి చెందిన 66 మంది భారతీయుల కుటుంబాలకు సహాయం అందించేందుకు కీలక నిర్ణయం తీసుకున్నారు. ఈ నిర్ణయం ప్రకారం.. ప్రభుత్వంలో అధికారిక స్థాయిలో రూ.3.30 కోట్ల ఎక్స్ గ్రేషియాను విడుదల చేశారు. ఈ మొత్తం.. ప్రతి కుటుంబానికి రూ.5 లక్షల చొప్పున మంజూరు చేయబడింది. ఈ నిధులను తమ బ్యాంకు ఖాతాలకు నేరుగా జమ చేయడం జరిగిందని బాల్కొండ మాజీ ఎమ్మెల్యే, రాష్ట్ర ఖనిజాభివృద్ధి కార్పొరేషన్ చైర్మన్ అనిల్ ఈరవత్రి తెలిపారు.