ఉచితాలు తగ్గించాలి,,,అర్హులైన వారికే పథకాలు అందాలి-మంత్రి తుమ్మల

ప్రభుత్వం అందించే ఉచితాలు అవసరమా? లేదా? అనే విషయంపై ప్రస్తుతం విస్తృతమైన చర్చ జరుగుతోంది. ఉచిత పథకాలు ప్రభుత్వ ఖజానాపై తీవ్రమైన భారం మోపుతాయని.. కొన్నిసార్లు అర్హత లేని వ్యక్తులు కూడా పొందే అవకాశం ఉంటుందని కొందరి అభిప్రాయం. అన్నీ ఉచితంగా లభిస్తే ప్రజలు పనిచేయడానికి లేదా స్వయం సమృద్ధి సాధించడానికి ప్రయత్నించకపోవచ్చునని.. ఇది దీర్ఘకాలంలో ఆర్థిక వ్యవస్థకు నష్టం కలిగిస్తుందని కూడా ఉంటున్నారు. ఈ నేపథ్యంలో తెలంగాణ వ్యవసాయ శాఖ మంత్రి తుమ్మల నాగేశ్వరరావు కీలక కామెంట్స్ చేశారు. వాస్తవంగా చెప్పాలంటే ప్రభుత్వాలు ఇచ్చే ఉచితాలు తగ్గించాలని అన్నారు.

'ప్రభుత్వంలో ఉండి చెప్పకూడదని కానీ.. ఉచితాలు తగ్గించాలి. ఉచితం కేవలం అర్హులకు మాత్రమే ఉండాలి. నిరుపేదకు ఉండాలి. తినటానికి తిండిలేని వాడికి మాత్రమే బియ్యం ఇవ్వాలి. అమ్ముకునేవాడికి ఇవ్వటం కరెక్ట్ కాదు. ఎన్టీరామారావు రూ.3 బియ్యం ఉన్నప్పుడు రూ.2కు ఇస్తే దేవుడన్నారు. ఇప్పుడు రూ. 60 అయినా ఉచితంగా ఇస్తారా..? ఇది పద్దతి కాదు. మీ ఊర్లో రేషన్ కార్డులు లేని వారిని ఓ 10, 20 మందిని తీసుకురండి. అంటే అందరూ పేదవాళ్లేనా..? తెలంగాణలో ఉన్న కుటుంబాలే కోటి పది లక్షలు. రేషన్ కార్డులు మాత్రం కోటి 25 లక్షలు. అంటే పక్క రాష్ట్రాల వారికి కూడా ఇక్కడ కార్డులు ఉన్నయ్.' అని తుమ్మల వ్యాఖ్యానించారు.

ఇక ఆయిల్ ఫామ్ సాగుపై రైతులు దృష్టి పెట్టాలని మంత్రి తుమ్మల సూచించారు. గతంలో పంట దిగుబడికి ఎక్కువ సమయం పట్టేదని.. కానీ, ఇప్పుడు నాణ్యమైన విత్తనాలు, మొక్కల వల్ల మూడేళ్లలోనే దిగుబడి వస్తుందని తెలిపారు. రైతులు అంతర పంటలు కూడా సాగు చేసుకోవచ్చునని అన్నారు. రాష్ట్రమంతటా ఆయిల్ ఫామ్ సాగుకు అవకాశం ఉందని.. రైతులు తమ అనుభవంతో పాటు శాస్త్రవేత్తల సూచనలు పాటిస్తూ ముందుకు సాగాలని కోరారు. కలెక్టర్లకు లక్ష రూపాయల జీతం ఉంటే.. ఆయిల్ ఫామ్ సాగుతో రైతులకు ఎకరానికి అన్ని ఖర్చులు పోను నెలకు రెండు లక్షల ఆదాయం వస్తుందన్నారు. వరి సాగులో కూడా కొంతవరకు ఆరుతడి విధానాన్ని పాటించాలని, వ్యవసాయంలో మరిన్ని మార్పులు రావాలని మంత్రి తుమ్మల అభిప్రాయపడ్డారు.