వందే భారత్‌ ఎక్స్‌ప్రెస్‌కు తృటిలో తప్పిన ప్రమాదం

భారత రైల్వే వ్యవస్థకు ఆధునిక ముఖచిత్రంగా నిలుస్తున్న వందే భారత్ ఎక్స్‌ప్రెస్ రైళ్లు ఇటీవల పశువులను ఢీకొట్టి ప్రమాదాలకు గురవడం ఆందోళన కలిగిస్తోంది. కేవలం కొద్ది రోజుల వ్యవధిలోనే తెలంగాణ, ఆంధ్రప్రదేశ్ రాష్ట్రాల్లో జరిగిన రెండు వేర్వేరు ఘటనలు, రైల్వే భద్రతపై కొత్త చర్చకు దారితీశాయి. ఈ ప్రమాదాల కారణంగా రైళ్ల రాకపోకలకు తీవ్ర అంతరాయం ఏర్పడటంతో పాటు, ప్రయాణికులు తీవ్ర అసౌకర్యానికి గురయ్యారు.

తాజాగా మహబూబాబాద్ జిల్లాలోని తాళ్లపూసపల్లి రైల్వే స్టేషన్ సమీపంలో మరో ఘటన చోటు చేసుకుంది. విశాఖపట్నం నుంచి హైదరాబాద్ వెళ్తున్న వందే భారత్ ఎక్స్‌ప్రెస్ రైలు.. 428/11 వద్ద పట్టాలపైకి వచ్చిన ఎద్దును ఢీకొట్టింది. ఈ ఢీకొనడంతో రైలు ఇంజిన్ ముందు భాగం తీవ్రంగా దెబ్బతిని.. విరిగిపోయింది. ప్రమాదం జరిగిన వెంటనే రైలును నిలిపివేశారు. సమీపంలోని రైల్వే స్టేషన్ అధికారులకు సమాచారం అందించగా, వారు వెంటనే ఘటనా స్థలానికి చేరుకున్నారు. దెబ్బతిన్న ఇంజిన్ భాగాలకు.. రైలు పట్టాలపై అవసరమైన మరమ్మతులు చేపట్టారు. సుదీర్ఘ మరమ్మత్తుల అనంతరం.. రైలు సికింద్రాబాద్‌కు బయలుదేరింది. ఈ ఊహించని సంఘటన ప్రయాణికులకు తీవ్ర అసౌకర్యాన్ని కలిగించింది.

ఇదే తరహాలో.. ఆంధ్రప్రదేశ్ రాష్ట్రం, బాపట్ల జిల్లాలోని చీరాల ఫైర్ ఆఫీస్ సమీపంలో ఆదివారం మరో ప్రమాదం జరిగింది. విజయవాడ నుంచి చెన్నై వెళ్తున్న వందే భారత్ రైలు, ఒంగోలు కుక్కడై వద్ద ఏదో ఒక అడ్డును ఢీకొట్టినట్లు తెలుస్తోంది. ఈ ఢీకొనడంతో రైలుకు ఉన్న ఎయిర్ బ్రేక్ పడి, రైలు అక్కడికక్కడే నిలిచిపోయింది. రైల్వే సిబ్బంది తక్షణమే స్పందించి మరమ్మత్తు పనులు చేపట్టారు. ఈ ప్రమాదం కూడా రైలు ప్రయాణానికి ఆటంకం కలిగించడంతో.. ప్రయాణికులు గమ్యస్థానాలకు ఆలస్యంగా చేరుకున్నారు.

వరుస ప్రమాదాలపై స్పందించిన రైల్వే అధికారులు.. ప్రయాణికులకు కలిగిన అసౌకర్యానికి చింతిస్తున్నామని తెలిపారు. ఇలాంటి సంఘటనలు మళ్లీ జరగకుండా కట్టుదిట్టమైన చర్యలు తీసుకుంటామని హామీ ఇచ్చారు. ముఖ్యంగా.. పశువులు రైలు పట్టాలపైకి రాకుండా ఫెన్సింగ్ ఏర్పాటు చేస్తామని, ప్రయాణికుల భద్రతకు రైల్వే శాఖ అత్యంత ప్రాధాన్యత ఇస్తుందని స్పష్టం చేశారు. ప్రమాదాల నివారణకు అన్ని రకాల చర్యలు తీసుకుంటామని, ప్రయాణికులు కూడా అప్రమత్తంగా ఉండాలని.. అనుమానాస్పద వ్యక్తులు లేదా వస్తువులను చూస్తే వెంటనే అధికారులకు తెలియజేయాలని సూచించారు. రైల్వే వ్యవస్థను సురక్షితంగా ఉంచడానికి ప్రతి ఒక్కరి సహకారం అవసరమని అధికారులు విజ్ఞప్తి చేశారు.