18 ఏళ్లు నిండిన వారికి ఛాన్స్.. ఉచిత శిక్షణ, హాస్టల్, భోజనం.. ఆపై ఉద్యోగం కూడా

విద్యార్థులు డిగ్రీలు పూర్తి చేసిన తర్వాత ఎదుర్కొంటున్న అతి పెద్ద సమస్య నిరుద్యోగం. లక్షలాది మంది యువతీ యువకులు ఉద్యోగాలు లేక తీవ్ర ఇబ్బందులు పడుతున్నారు. కొందరు ప్రభుత్వ ఉద్యోగాల కోసం తీవ్రంగా శ్రమిస్తుంటే.. మరికొందరు ప్రైవేట్ రంగంలో తమ అదృష్టాన్ని పరీక్షించుకుంటున్నారు. అయితే.. ప్రస్తుత పరిస్థితుల్లో ప్రైవేట్ ఉద్యోగం సంపాదించడం కూడా సవాలుగా మారింది. దీనికి ప్రధాన కారణం.. చాలా మంది విద్యానిపుణులు చెప్పే మాట అభ్యర్థులకు అవసరమైన నైపుణ్యాలు (స్కిల్స్) లేకపోవడమే.

ఉద్యోగాలు దొరక్క నిరాశలో కూరుకుపోయిన ఎంతోమంది యువతరం, తమ కలలను పక్కన పెట్టి.. ఏదో ఒక చిన్న పని దొరికితే చాలు అనుకునే పరిస్థితి. ఇలాంటి సమయంలో, నైపుణ్యాలు లేని వారికి కొన్ని సర్టిఫికేట్ కోర్సుల్లో ఉచితంగా శిక్షణ ఇచ్చి, ఉద్యోగాలు కూడా కల్పించడానికి ఒక గొప్ప సంస్థ ముందుకు వచ్చింది. ఇటువంటి సంస్థలు మరిన్ని వస్తే, దేశంలో నిరుద్యోగిత రేటు గణనీయంగా తగ్గే అవకాశం ఉంటుంది.

తెలంగాణ రాష్ట్రంలోని గ్రామీణ ప్రాంతాలకు చెందిన నిరుద్యోగ యువతీ యువకులకు రాష్ట్ర ప్రభుత్వ ఆధ్వర్యంలోని స్వామి రామానంద తీర్థ రూరల్ ఇనిస్టిట్యూట్ (SRTRI) శుభవార్త అందించింది. పదో తరగతి, ఇంటర్మీడియట్ పాసై, ప్రస్తుతం ఏ ఉద్యోగం లేని యువతీ యువకులకు ఉచితంగా కంప్యూటర్స్, సోలార్ సిస్టమ్ ఇన్‌స్టలేషన్ అండ్ సర్వీస్ కోర్సుల్లో శిక్షణ ఇవ్వడంతో పాటు, ఉద్యోగ అవకాశాలను కూడా కల్పిస్తామని సంస్థ ఛైర్మన్ ప్రకటించారు.

కోర్సుల వివరాలు..

బేసిక్ కంప్యూటర్స్:

ఇంటర్మీడియట్ పాసైన వారికి రెండు నెలల పాటు ఉచిత శిక్షణ అందిస్తారు. దీంతో పాటు హాస్టల్, భోజన వసతి కూడా కల్పిస్తారు.

సోలార్ సిస్టమ్ ఇన్‌స్టలేషన్ అండ్ సర్వీస్:

పదో తరగతి లేదా ఐటీఐ చదివిన వారికి మూడున్నర నెలల పాటు ఉచిత శిక్షణతో పాటు హాస్టల్, భోజన వసతులు కల్పిస్తారు. శిక్షణ పూర్తయ్యాక ఉద్యోగం కూడా ఇప్పిస్తామని సంస్థ వెల్లడించింది. అభ్యర్థుల వయసు 18 నుండి 30 సంవత్సరాల లోపు ఉండాలని తెలిపారు. గ్రామీణ ప్రాంతాలకు చెందిన అభ్యర్థులై ఉండాలన్నారు. చదువు మధ్యలో ఉన్నవారు అర్హులు కారని తెలిపారు.

దరఖాస్తుకు కావాల్సిన పత్రాలు..

దరఖాస్తు చేసుకునేవారు తమ ఒరిజినల్ సర్టిఫికెట్స్, వాటి జిరాక్సులు, పాస్ పోర్ట్ సైజ్ ఫోటో, ఆధార్ కార్డు, రేషన్ కార్డు జిరాక్సులు తీసుకుని యాదాద్రి భువనగిరి జిల్లా, పోచంపల్లి మండలం, జలాల్‌పూర్ గ్రామంలో ఉన్న స్వామి రామానంద తీర్థ సంస్థకు నేరుగా రావాలని సూచించారు. మరిన్ని వివరాల కోసం, ఆసక్తి ఉన్న అభ్యర్థులు 9133908000, 9133908111, బర్లను సంప్రదించవచ్చు. ఇటువంటి అవకాశాలు నిరుద్యోగ యువతకు ఒక గొప్ప వరం లాంటివి. తమ నైపుణ్యాలను పెంచుకొని, మంచి ఉద్యోగం సంపాదించుకోవడానికి ఇది ఒక చక్కటి మార్గం.