40 ఏళ్ల వయస్సు దాటిన వారికి అలర్ట్.. కీలక నిర్ణయం తీసుకున్న ఆ జిల్లా కలెక్టర్

ఈ రోజుల్లో చాలామంది తమ ఆరోగ్యం పట్ల తగినంత శ్రద్ధ చూపడం లేదు. చేసే పనిపై దృష్టి పెడుతున్నారు కానీ.. శారీరక శ్రమ, వ్యాయామం, సరైన వైద్య పరీక్షల విషయంలో నిర్లక్ష్యం చేస్తున్నారు. ముఖ్యంగా.. మధ్య వయస్కులలో ఈ ధోరణి ఎక్కువగా కనిపిస్తుంది. వ్యాయామం చేసినా.. దాన్ని పూర్తి ధ్యాసతో, సరైన పద్ధతిలో చేయకపోవడం కూడా సమస్యలకు దారితీస్తుంది. ఈ నేపథ్యంలో.. కామారెడ్డి జిల్లా కలెక్టర్ ఆశిష్ సంగ్వాన్ ప్రజల ఆరోగ్యంపై ప్రత్యేక దృష్టి సారించారు. 40 ఏళ్లు పైబడిన వారందరూ తప్పనిసరిగా వైద్య పరీక్షలు చేయించుకోవాలని ఆయన పిలుపునిచ్చారు.

కామారెడ్డి గవర్నమెంట్ హాస్పిటల్, కామారెడ్డి టౌన్‌లో స్వయం సహాయక సంఘ సభ్యులకు నిర్వహించిన వైద్య శిబిరాన్ని కలెక్టర్ ఆశిష్ సంగ్వాన్ స్వయంగా పర్యవేక్షించారు. ఈ సందర్భంగా ఆయన మాట్లాడుతూ.. మధ్య వయస్సులో వ్యాధులు వచ్చే అవకాశం ఎక్కువగా ఉంటుందని.. ముందుగానే పరీక్షలు చేయించుకుంటే భవిష్యత్తులో వచ్చే పెద్ద సమస్యలను నివారించవచ్చని సూచించారు. సదరం క్యాంపునకు అవసరమైన అన్ని ఏర్పాట్లు చేసుకోవాలని అధికారులకు ఆదేశాలిచ్చారు. ఈ కార్యక్రమంలో అడిషనల్ కలెక్టర్ చందర్, హాస్పిటల్ సూపరింటెండెంట్ డాక్టర్ వెంకటేశ్వర్లు, మున్సిపల్ కమిషనర్ రాజేందర్, ఆర్ఎంవోలు, ఇతర వైద్యులు, అధికారులు పాల్గొన్నారు.

ప్రభుత్వ విద్యాసంస్థల్లో పోషకాహారం అందించాలన్న ప్రభుత్వ ఆశయం మేరకు, అంగన్వాడీ కేంద్రాలు, రెసిడెన్షియల్ స్కూల్స్‌కు నాణ్యమైన కోడిగుడ్లను సరఫరా చేయాలని కలెక్టర్ ఆశిష్ సంగ్వాన్ ఏజెన్సీలను ఆదేశించారు. శుక్రవారం కోడిగుడ్ల సరఫరా కోసం టెండర్లను ప్రారంభించి మాట్లాడారు. విద్యార్థులకు మంచి పోషకాహారం అందితేనే వారు ఆరోగ్యంగా ఉండి చదువుపై దృష్టి పెట్టగలరని ఆయన అన్నారు.

కామారెడ్డి జిల్లాలో ఆపరేషన్ ముస్కాన్ కార్యక్రమం విజయవంతంగా కొనసాగింది. జూలై 1 నుంచి 31 వరకు చేపట్టిన ఈ కార్యక్రమంలో భాగంగా, జిల్లాలో 68 మంది పిల్లలను గుర్తించినట్లు కలెక్టర్ ఆశిష్ సంగ్వాన్ వెల్లడించారు. బాల కార్మికులు, వీధి బాలలు, తప్పిపోయిన పిల్లలను గుర్తించి వారికి రక్షణ కల్పించడమే ఈ ఆపరేషన్ ముఖ్య ఉద్దేశ్యం. పోలీసు, రెవెన్యూ, కార్మిక, బాలల పరిరక్షణ విభాగం, చైల్డ్ లైన్ సంయుక్తంగా ఈ ఆపరేషన్ నిర్వహించాయి. బాల కార్మికులను పనిలో పెట్టుకున్న వారిపై కేసులు నమోదు చేసినట్లు కూడా కలెక్టర్ తెలిపారు.