యాదగిరి గుట్టకు పోటెత్తిన భక్తులు.. కెనడాలో వైభవంగా కళ్యాణ మహోత్సవం

యాదగిరిగుట్ట శ్రీ లక్ష్మీ నరసింహస్వామి ఆలయ మహిమ ఇప్పుడు ప్రపంచం నలుమూలలకూ చేరింది. తాజాగా కెనడాలోని విండ్సర్ పట్టణంలో నిర్వహించిన కల్యాణ మహోత్సవం ఈ విషయం మరోసారి నిరూపించింది. అక్కడి తెలంగాణ అసోసియేషన్ ఆహ్వానం మేరకు ప్రభుత్వ అనుమతితో ఆర్జిత కల్యాణంగా ఈ వేడుకను నిర్వహించారు. ఆలయ ఈవో వెంకట్రావు తెలిపిన వివరాల ప్రకారం.. ఈ కార్యక్రమంలో స్థానిక ప్రజలతో పాటు ఎన్నో దేశాల నుంచి వచ్చిన భక్తులు కూడా పాల్గొన్నారు. ప్రత్యేక అతిథిగా అక్కడి ఎంపీ ఆండ్రీవ్ డోవీ హాజరై.. నరసింహస్వామి దంపతుల కల్యాణాన్ని తిలకించారు. ఉత్సవం మొత్తం గుట్ట ఆలయ విశ్రాంత ప్రధాన పూజారి లక్ష్మీనరసింహాచార్య, ఏఈవో రఘు పర్యవేక్షణలో సజావుగా సాగింది.

ఇదిలా ఉండగా యాదగిరిగుట్టలో భక్తుల రద్దీ రోజు రోజుకీ పెరుగుతోంది. ఆదివారాలు, ప్రత్యేక పర్వదినాల్లో ఆర్జిత పూజలు, దైవ దర్శనాలతో ఆలయ పరిసరాలు ఆధ్యాత్మిక ఉత్సాహంతో కిక్కిరిసిపోతాయి. ప్రత్యేక దర్శనం, ఉచిత దర్శనం సముదాయాల్లో భక్తులు క్యూల్లో నిలబడి స్వామివారి దివ్య రూపాన్ని దర్శించుకుంటున్నారు. ప్రధాన ఆలయంతో పాటు అనుబంధ శివాలయాలు, కొండ కింద ఉన్న మండపంలో శ్రీసత్యనారాయణ వ్రతాలు జరిపించుకోవడం కూడా ప్రత్యేక ఆకర్షణగా నిలుస్తోంది.

తెలంగాణ రాష్ట్రంలో అత్యంత ప్రాముఖ్యత కలిగిన ఆధ్యాత్మిక కేంద్రాల్లో యాదగిరిగుట్ట శ్రీ లక్ష్మీ నరసింహస్వామి దేవస్థానం ఒకటి. ఈ పుణ్యక్షేత్ర అభివృద్ధి యోచన మొదట మాజీ ముఖ్యమంత్రి వైఎస్ రాజశేఖర రెడ్డి పాలనలో ప్రారంభమైంది. తరువాత తెలంగాణ ఏర్పడిన తర్వాత సీఎం కల్వకుంట్ల చంద్రశేఖరరావు ప్రత్యేక శ్రద్ధతో ఆలయ పునరుద్ధరణ, విస్తరణ పనులను భారీ ఎత్తున చేపట్టారు. ముఖ్యంగా "యాదాద్రి"గా మారు రూపం దాల్చేలా శిల్పకళ, వైభవం, సదుపాయాలు సమకూర్చారు. ప్రస్తుతం సీఎం రేవంత్ రెడ్డి కాలంలో యాదగిరి గుట్టగా పిలుస్తున్నారు.

ప్రస్తుతం యాదాద్రిలో పండగరోజుల్లో భక్తుల రద్దీ భారీగా ఉండటంతో ట్రాఫిక్ నియంత్రణకు ప్రత్యేక ఏర్పాట్లు చేస్తున్నారు. ప్రధాన ఆలయం చుట్టుపక్కల పార్కింగ్ స్థలాలు ఆధునీకరించారు. యాదగిరిగుట్టకు రాకపోకల సౌలభ్యం కోసం ప్రభుత్వ రవాణా సంస్థ అనేక మార్గాల్లో బస్సులు నడుపుతోంది. హైదరాబాద్‌ నుంచి యాదగిరిగుట్టకు డైరెక్ట్ బస్సులు నిరంతరంగా అందుబాటులో ఉన్నాయి.

అలాగే సికింద్రాబాద్‌, జనగాం, వరంగల్, భువనగిరి వంటి పట్టణాల నుంచి ప్రత్యేక సర్వీసులు నడుస్తున్నాయి. ప్రయాణికుల సౌకర్యార్థం ఎక్స్‌ప్రెస్, పల్లెవెలుగు, సూపర్ లగ్జరీ బస్సులు కూడా అందుబాటులో ఉంచారు. అంతేకాదు, ఎంఎంటీఎస్ ట్రైన్ కనెక్టివిటీ కూడా యాదగిరిగుట్టకు సమీప రైల్వే స్టేషన్ ద్వారా లభిస్తోంది. భవిష్యత్‌లో హైదరాబాద్ మెట్రోను భువనగిరి వరకు విస్తరించడానికి ప్రణాళికలు ఉన్నాయి. దీని ద్వారా భక్తులు మరింత సులభంగా ఆలయానికి చేరుకోగలరు. ఆధ్యాత్మికత, శిల్ప వైభవం, ఆధునిక వసతులు కలిసిన యాదగిరిగుట్ట ఈరోజు ప్రపంచవ్యాప్తంగా ఉన్న భక్తులను ఆకర్షిస్తోంది. విదేశాల్లో ఈ పుణ్యక్షేత్ర పూజలు, కల్యాణాలు నిర్వహించడం ద్వారా ఆలయ ఖ్యాతి అంతర్జాతీయ స్థాయికి చేరింది.