కొలంబియాలో విషాదం.. లోయలో పడ్డ స్కూల్ బస్సు.. 17 మంది విద్యార్థుల దుర్మరణం

కొలంబియా దేశంలోని ఆంటియోక్వియా ప్రాంతంలో అత్యంత విషాదకరమైన రోడ్డు ప్రమాదం చోటుచేసుకుంది. విద్యార్థులతో వెళ్తున్న ఒక స్కూల్ బస్సు అకస్మాత్తుగా అదుపు తప్పి లోతైన లోయలో పడిపోవడంతో ఈ ఘోర కలివిడి జరిగింది. ఈ ప్రమాదంలో ఇప్పటివరకు 17 మంది ప్రాణాలు కోల్పోయారని, సంఘటనా స్థలంలో భయానక వాతావరణం నెలకొందని అధికారులు దృవీకరించారు. మృతుల సంఖ్య ఇంకా పెరిగే అవకాశం ఉందని, ప్రమాద తీవ్రత చాలా ఎక్కువగా ఉండటంతో బస్సు పూర్తిగా ధ్వంసమైందని స్థానిక మీడియా వెల్లడించింది.
మరణించిన వారిలో అత్యధికులు 16 నుండి 18 ఏళ్ల వయసు కలిగిన విద్యార్థులే కావడం అందరినీ తీవ్రంగా కలిచివేస్తోంది. వీరందరూ బీచ్‌లో తమ గ్రాడ్యుయేషన్ వేడుకలను ఎంతో ఘనంగా జరుపుకొని, సంతోషంతో తిరిగి తమ ఇళ్లకు పయనమవుతుండగా ఈ దుర్ఘటన జరిగింది. ఈ విషయాన్ని ఆ ప్రాంత గవర్నర్ ఆండ్రెస్ జూలియన్ అధికారికంగా వెల్లడించారు. ఆనందంగా సాగాల్సిన వారి ప్రయాణం ఇలా అర్ధాంతరంగా ముగిసిపోవడంతో విద్యార్థుల కుటుంబాల్లో తీరని విషాదం అలముకుంది.
ఈ ప్రమాదంలో మరో 20 మందికి పైగా తీవ్ర గాయాలయ్యాయని, వారి పరిస్థితి కూడా ఆందోళనకరంగా ఉందని సమాచారం అందుతోంది. ప్రమాదం జరిగిన వెంటనే స్థానికులు, అత్యవసర సహాయక సిబ్బంది హుటాహుటిన స్పందించి క్షతగాత్రులను సమీపంలోని ఆసుపత్రులకు తరలించారు. గాయపడిన వారికి ప్రస్తుతం అత్యవసర విభాగంలో మెరుగైన వైద్య చికిత్స అందిస్తున్నామని వైద్య అధికారులు పేర్కొన్నారు. బస్సు లోయలో పడటంతో అందులో చిక్కుకున్న వారిని బయటకు తీయడానికి రెస్క్యూ టీమ్స్ తీవ్రంగా శ్రమించాల్సి వచ్చింది.
అసలు ఈ ప్రమాదం ఎలా జరిగిందనే విషయంపై పోలీసులు లోతుగా దర్యాప్తు ప్రారంభించారు. బస్సు బ్రేకులు ఫెయిల్ అయ్యాయా, వాహనంలో సాంకేతిక లోపం తలెత్తిందా లేక డ్రైవర్ నిర్లక్ష్యం కారణమా అనే కోణంలో అధికారులు విచారణ జరుపుతున్నారు. ప్రభుత్వం బాధిత కుటుంబాలకు అండగా ఉంటామని హామీ ఇచ్చింది. ఈ ఘటనపై దేశవ్యాప్తంగా పలువురు ప్రముఖులు తీవ్ర సంతాపం వ్యక్తం చేయగా, పిల్లలను కోల్పోయిన తల్లిదండ్రుల రోదనలతో ఆ ప్రాంతం అంతా విషాదంలో మునిగిపోయింది.