శ్రీవారి భక్తులకు ఆర్టీసీ బస్సుల్లో టికెట్‌పై భారీ డిస్కౌంట్.. 1000 దర్శన టికెట్స్

తెలంగాణ రాష్ట్ర రోడ్డు రవాణా సంస్థ (టీఎస్‌ఆర్టీసీ) ప్రయాణికులకు వరుసగా శుభవార్తలను అందిస్తూ ప్రజల నుంచి ప్రశంసలను పొందుతోంది. సీఎం రేవంత్ రెడ్డి ప్రభుత్వం ప్రజలకు చేరువ కావాలనే లక్ష్యంతో టీఎస్‌ఆర్టీసీ అనేక కొత్త కార్యక్రమాలను చేపట్టింది. అందులో భాగంగా.. ఇటీవల హైదరాబాద్‌-విజయవాడ మార్గంలో ప్రయాణించే వారికి ఈ-గరుడ బస్సుల్లో టికెట్ ధరపై 26% రాయితీ ప్రకటించింది. ఇదే సమయంలో.. వినాయక చవితి పండుగను పురస్కరించుకుని హైదరాబాద్‌ నుంచి తిరుపతికి వెళ్లే భక్తులకు కూడా టికెట్‌ ధరలపై భారీ రాయితీలను ప్రకటించింది.

మహాలక్ష్మి పథకం విజయం..

రేవంత్ రెడ్డి ప్రభుత్వం తీసుకువచ్చిన మహాలక్ష్మి పథకం మహిళా ప్రయాణికులకు ఉచిత ప్రయాణాన్ని అందించి.. టీఎస్‌ఆర్టీసీకి కొత్త ఊపును ఇచ్చింది. ఈ విజయం తర్వాత.. ఇప్పుడు సంస్థ ఇతర వర్గాల ప్రయాణికులను ఆకర్షించడానికి ప్రయత్నిస్తోంది. అందులో భాగంగానే.. హైదరాబాద్-విజయవాడ మార్గంలో ఈ-గరుడ బస్సులపై 26 శాతం రాయితీతో పాటు.. హైదరాబాద్ నుంచి తిరుపతి వెళ్లే వారికి కూడా రాయితీలను ప్రకటించింది. లహరి, రాజధాని ఏసీ బస్సుల టికెట్ ధరలపై 10 శాతం, అలాగే సూపర్‌ లగ్జరీ బస్సులపై 15 శాతం రాయితీని అందిస్తోంది.

కేవలం రాయితీలు ప్రకటించడమే కాకుండా, టీఎస్‌ఆర్టీసీ తిరుమల శ్రీవారి భక్తుల కోసం రోజుకు సుమారు 1000 ప్రత్యేక దర్శన టికెట్లను అందిస్తోంది. ఒక్కొక్కటి రూ. 300 ధర కలిగిన ఈ టికెట్లను బస్సు టికెట్‌తో పాటు ఆన్‌లైన్ ప్లాట్‌ఫారమ్‌లైన రెడ్‌బస్, అబ్బీబస్ ద్వారా బుక్ చేసుకోవచ్చు. ఈ నిర్ణయం వల్ల భక్తులు సులభంగా... తక్కువ ఖర్చుతో తమ యాత్రను పూర్తి చేసుకోవచ్చు.

ఈ రాయితీలు ప్రైవేట్ ట్రావెల్స్ నుంచి వస్తున్న పోటీని ఎదుర్కొని, ప్రయాణీకులను ఆకర్షించడానికి టీఎస్‌ఆర్టీసీ ప్రయత్నం చేస్తోందనే చెప్పాలి. ఇది సంస్థ ఆదాయం పెంచుకోవడానికి కూడా దోహదపడుతుంది. ఆర్టీసీ తీసుకున్న ఈ నిర్ణయంపై ప్రయాణికులు సంతోషం వ్యక్తం చేస్తున్నారు. రేవంత్ రెడ్డి ప్రభుత్వం ప్రజలకు ఇచ్చిన మాట నిలబెట్టుకుంటూ.. వారికి ఉపయోగపడే నిర్ణయాలు తీసుకుంటోందని ప్రజలు అంటున్నారు.