తెలంగాణలో 4 రోజుల పాటు భారీ వర్షాలు

తెలంగాణలో మళ్లీ వర్షాలు కురుస్తున్నాయి. మంగళవారం తెల్లవారుజామునుంచే రాష్ట్రంలోని చాలా ప్రాంతాల్లో వానలు పడుతున్నాయి. కొన్నిచోట్ల ముసురు వానలు కమ్ముకోగా.. మరికొన్ని చోట్ల భారీ వర్షాలు కురుస్తున్నాయి. అయితే రానున్న 4 రోజులపాటు తెలంగాణ రాష్ట్రం మొత్తం విస్తారంగా వర్షాలు కురవనున్నట్లు భారత వాతావరణ శాఖ హెచ్చరికలు జారీ చేసింది. ఆగస్ట్ 26వ తేదీన ఉదయం ఉత్తర పశ్చిమ బంగాళాఖాతంలో.. ఒడిశా తీర ప్రాంతం వద్ద మరింత బలపడి అల్పపీడనంగా మారినట్లు తెలిపింది.

ఈ అల్పపీడనం ప్రభావంతో.. మంగళవారం, బుధవారాల్లో రాష్ట్రంలోని పలు చోట్ల భారీ వర్షాలు కురిసే అవకాశాలు ఉన్నట్లు వాతావరణ శాఖ అధికారులు స్పష్టం చేశారు. ఇక బంగాళాఖాతంలో ఏర్పడిన ఈ అల్పపీడనం.. రానున్న రెండు రోజుల్లో పశ్చిమ-వాయువ్య దిశగా కదులుతూ మరింత బలపడి.. తీవ్ర అల్పపీడంగా మారే అవకాశాలు ఉన్నట్లు వెల్లడించారు. ఈ అల్పపీడనం ప్రభావంతో.. (ఆగస్ట్ 26వ తేదీన) మంగళవారం ములుగు, జయశంకర్ భూపాలపల్లి జిల్లాల్లో అతి భారీ వర్షాలు కురుస్తాయని తెలిపారు. ఇక రాష్ట్రంలోని మరో 13 జిల్లాల్లో భారీ వర్షాలు కురిసే అవకాశాలు ఉన్నాయని హెచ్చరించారు. మరోవైపు.. తూర్పు తెలంగాణ జిల్లాల్లో కుండపోత వర్షాలు పడుతాయని వాతావరణ శాఖ అధికారులు తీవ్ర హెచ్చరికలు చేశారు.

ఆగస్టు 27వ తేదీన ఖమ్మం, జయశంకర్ భూపాలపల్లి, మహాబూబాబాద్, కొమురం భీమ్, భద్రాద్రి కొత్తగూడెం, ములుగు, వరంగల్ జిల్లాల్లో అక్కడక్కడా భారీ వర్షాలు కురిసే అవకాశాలు ఉన్నాయని.. వీటితోపాటు ఉరుములు, మెరుపులతో కూడిన ఈదురు గాలులు వీచే అవకాశాలు ఉన్నట్లు భారత వాతావరణ శాఖ తెలిపింది.

అదే సమయంలో ఆదిలాబాద్, కొమరంభీం ఆసిఫాబాద్, మహబూబాబాద్, మంచిర్యాల, జగిత్యాల, కరీంనగర్, హన్మకొండ, భద్రాద్రి కొత్తగూడెం, జనగాం, జయశంకర్ భూపాలపల్లి, ఖమ్మం, హైదరాబాద్, మేడ్చల్ మల్కాజిగిరి, రంగారెడ్డి, ములుగు, నల్గొండ, పెద్దపల్లి, రాజన్న సిరిసిల్ల, నిర్మల్, నిజామాబాద్, సిద్దిపేట, సూర్యాపేట, వరంగల్, యాదాద్రి భువనగిరి జిల్లాల్లో అక్కడక్కడా మోస్తారు నుంచి భారీ వర్షాలు కురిసే అవకాశాలు ఉన్నాయని వెల్లడించింది.