ఆ గ్రామంలోని ఇళ్లల్లోకి వరద నీరు.. గూడ్స్ రైలును అడ్డుకున్న గ్రామస్థులు

తెలంగాణ రాష్ట్రంలోని వికారాబాద్ జిల్లా, తాండూరు మండలంలో ఉన్న సంగం కలాన్‌ గ్రామానికి సమీపంలో ఒక ప్రైవేట్ సంస్థ చెట్టినాడు సిమెంట్ కర్మాగారానికి సంబంధించిన రైల్వే గూడ్స్ మార్గం నిర్మాణమై ఉంది. తాజాగా వికారాబాద్ జిల్లాలో కుండపోత వర్షం కురుస్తోంది. ఈ భారీ వర్షాల కారణంగా ఈ ప్రాంతంలో ఊహించని వరద ముంపు సంభవించింది. ఈ వరదలకు ప్రధాన కారణంగా గ్రామస్థులు తాము నివసించే ప్రాంతం గుండా వెళ్తున్న రైల్వే మార్గం అని ఆరోపిస్తున్నారు. ఈ రైల్వే లైన్ నిర్మాణమే తమ దుస్థితికి కారణమని చెబుతూ.. సంగం కలాన్‌ గ్రామ ప్రజలు ఆదివారం గూడ్స్ రైలును అడ్డుకొని తమ నిరసనను వ్యక్తం చేశారు. వారి ప్రధాన సమస్యలు, వాటి వల్ల కలిగిన నష్టాలు వివరాల్లోకి వెళ్తే..

సహజంగా వర్షపు నీరు ప్రవహించే దారిలో రైల్వే ట్రాక్ నిర్మించబడింది. సాధారణంగా వరద నీరు సులభంగా ముందుకు సాగడానికి.. రైల్వే లైన్ కింద సరైన కల్వర్టులు లేదా డ్రైనేజీ వ్యవస్థలను ఏర్పాటు చేయాలి. కానీ, ఇక్కడ ఆ ఏర్పాట్లు సరిగా లేకపోవడం వల్ల, రైలు మార్గం ఒక కట్ట లాగా పనిచేసి.. నీటి ప్రవాహాన్ని పూర్తిగా అడ్డుకుంది.

 దీంతో రైలు మార్గం వద్ద నిలిచిపోయిన నీరు పక్కకు మళ్లి, తిరిగి గ్రామ గృహాలలోకి చేరుతోంది. దీంతో ప్రజల నిత్యవసర వస్తువులు, దుస్తులు, పరుపులు, ఇతర గృహోపకరణాలు పూర్తిగా తడిసిపోయి, పాడైపోయాయి. వరద నీరు ఇళ్లలో రోజుల తరబడి నిలిచిపోవడంతో శుభ్రత, ఆరోగ్యం పరంగా తీవ్ర ఇబ్బందులు ఎదురవుతున్నాయి

ఈ గ్రామ ప్రజలు ప్రధానంగా వ్యవసాయంపై ఆధారపడి జీవిస్తున్నారు. వరద కారణంగా పొలాలన్నీ పూర్తిగా మునిగిపోయాయి. ముఖ్యంగా కంది, పత్తి వంటి ప్రధాన పంటలు నీట మునగడంతో.. రైతులు తీవ్రమైన నష్టాన్ని చవిచూశారు. పంట నష్టంతో పాటు.. ముంపు కారణంగా మట్టి సారవంతత కూడా దెబ్బతినే అవకాశం ఉంది.

కేవలం ఆస్తి నష్టమే కాకుండా, తాగునీరు కలుషితం కావడం, విద్యుత్తు సరఫరాకు అంతరాయం కలగడం వంటి ఇతర ఇబ్బందులు కూడా ఎదురయ్యాయి. వరద ముప్పు సమయంలో గ్రామానికి రవాణా మార్గాలు కూడా పూర్తిగా నిలిచిపోయాయి. దీని కారణంగానే గ్రామస్థులు ఆగ్రహించి ఆ రైల్వే మార్గం ద్వారా వెళ్తున్న గూడ్స్ రైలును అడ్డుకొని తమ నిరసన వ్యక్తం చేశారు.

ఈ రైల్వే మార్గం నిర్మాణం అనేది ఒక ప్రైవేట్ కంపెనీ తన సరుకు రవాణా సౌలభ్యం కోసం ప్రత్యేకంగా నిర్మించుకున్నది. ఇలాంటి నిర్మాణాలకు అనుమతులు ఇచ్చేటప్పుడు, అవి స్థానిక పర్యావరణం సహజ నీటి ప్రవాహ వ్యవస్థలకు ఎటువంటి ఆటంకం కలిగించకుండా చూడాల్సిన బాధ్యత ప్రభుత్వ సంస్థలది. ప్రస్తుతం జరిగిన నష్టానికి రైల్వే అధికారులు, సిమెంట్ కర్మాగారాల అధికారులు స్పందించి, వెంటనే ట్రాక్ కింద పెద్ద కల్వర్టులు ఏర్పాటు చేయాలని గ్రామస్థులు డిమాండ్ చేశారు. పంట నష్టానికి, ఆస్తి నష్టానికి తగిన పరిహారం అందించాలని వారు కోరారు.