వృద్ధురాలిపై కానిస్టేబుల్ కుటుంబం దాడి
Telangana Telugu | Suryaa Desk | Published : Wed, Oct 01, 2025, 07:04 PM
ఓ వృద్ధురాలిపై పోలీస్ కానిస్టేబుల్ కుటుంబ సభ్యులు దాడి చేసిన ఘటన హైదరాబాద్లోని మాదన్నపేటలో చోటుచేసుకుంది. కుక్క విషయంలో మాటామాటా పెరగడంతో.. 60 ఏళ్ల వృద్ధురాలిపై కానిస్టేబుల్ చెల్లెలు విచక్షణారహితంగా దాడి చేసింది. ఆ తర్వాత కానిస్టేబుల్ భార్య కూడా వచ్చి చేయి కలిపింది. వృద్ధురాలిపై దాడి చేసిన దృశ్యాలు సీసీటీవీ కెమెరాలో రికార్డయ్యాయి.మాదన్నపేటలో నివాసముంటున్న కానిస్టేబుల్ చంద్రకాంత్ ఎప్పటిలానే మంగళవారం ఉదయం 11 గంటల సమయంలో తన పెంపుడు కుక్కను తీసుకుని బయటికి వెళ్లాడు. రోడ్డుపై కుక్కను తీసుకొని వెళ్తుండగా ఓ ఇంటి ముందు పార్క్ చేసిన కారు వద్ద కుక్క మూత్ర విసర్జన చేసింది. దీంతో ఆ ఇంట్లో ఉన్న వృద్ధురాలు కానిస్టేబుల్ను ప్రశ్నించారు. దీంతో కానిస్టేబుల్ చంద్రకాంత్, వృద్ధురాలి మధ్య మాటామాటా పెరిగింది. పెద్దావిడతో గొడవ పడుతూనే ఇంటికి చంద్రకాంత్ ఫోన్ చేశాడు. వెంటనే ఆయన చెల్లెలు పరుగుపరుగున వచ్చి వృద్ధురాలిపై పిడిగుద్దులు కురిపించింది. గ్యాప్ లేకుండా కొట్టింది. ఆమె దెబ్బలకు తట్టుకోలేక పెద్దావిడ పారిపోతుంటే అన్నయ్య చేతిలో ఉన్న ప్లాస్టిక్ పైప్ తీసుకొని కొట్టింది. ఈ విజువల్స్ అన్నీ సీసీటీవీ కెమెరాలో రికార్డయ్యాయి. ఇంటి వెనుక నుంచి మాదన్నపేట పోలీస్ స్టేషన్కి వెళ్లిన వృద్ధురాలు.. కానిస్టేబుల్ చంద్రకాంత్తో పాటు ఆయన భార్య, చెల్లెలుపై ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.
|
|