వార్డు సభ్యులు, సర్పంచ్, ఎంపీటీసీ, జడ్పీటీసీలుల జీతం ఎంతో తెలుసా

తెలంగాణ రాష్ట్రంలో స్థానిక సంస్థల ఎన్నికల సందడి మొదలైన నేపథ్యంలో.. గౌరవ వేతనాల అంశం మళ్లీ తెరపైకి వచ్చింది. స్థానిక ప్రజాప్రతినిధులైన సర్పంచ్‌లు, ఎంపీటీసీలు, జెడ్పీటీసీలు, ఎంపీపీలకు ప్రస్తుతం చెల్లిస్తున్న గౌరవ వేతనాలు 2021వ సంవత్సరంలో పెంచిన మొత్తాలే కొనసాగుతున్నాయి. 2021కు పూర్వం సర్పంచ్‌లకు రూ.5,000 మాత్రమే చెల్లించగా, అప్పటి ముఖ్యమంత్రి కేసీఆర్ ప్రభుత్వం దాన్ని రూ.1,500 పెంచి రూ.6,500 చేసింది. ఎంపీటీసీ సభ్యులకు కూడా రూ.6,500 చొప్పున గౌరవ భత్యం అందుతోంది.

సర్పంచ్‌లు, ఎంపీటీసీలు నెలకు రూ.6,500 చొప్పున వేతనం పొందుతుండగా... జడ్పీటీసీలు, ఎంపీపీలకు ప్రస్తుతం రూ.13,000 అందుతోంది. అత్యున్నత స్థానిక పదవిలో ఉన్న జెడ్పీపీ (జిల్లా ప్రజా పరిషత్ చైర్మన్)కు రూ.1 లక్ష వరకు గౌరవ వేతనం లభిస్తుంది. అయితే.. గ్రామ పంచాయతీ వార్డు సభ్యులు, ఉప సర్పంచ్‌లకు మాత్రం ఇప్పటికీ ఎలాంటి గౌరవ వేతనం లభించడం లేదు. దీనిపై ఈ వర్గాల నుంచి కొంతకాలంగా డిమాండ్లు వినిపిస్తున్నాయి. రాబోయే ఎన్నికల ముందు ఈ అంశం మరోసారి చర్చకు వచ్చే అవకాశం ఉంది.

స్థానిక సంస్థల ఎన్నికలకు సంబంధించి ఇప్పటికే షెడ్యూల్ విడుదలవగా.. అక్టోబర్ 9 నుండి నామినేషన్ల స్వీకరణ ప్రారంభం కానుంది. రేపే స్థానిక సంస్థల నోటిఫికేషన్ విడుదల అయ్యే అవకాశాలు ఉన్నాయి. ఇప్పటికే కాంగ్రెస్ రేపు నామినేషన్లు వేసేందుకు సిద్ధం అవుతోంది.

ఇదిలా ఉండగా.. తెలంగాణ స్థానిక ఎన్నికల ఖర్చు పరిమితి రూ. 2.50 లక్షల వరకు సర్పంచ్ ఖర్చు చేసేందుకు అవకాశం ఉంటుంది. ఎన్నికల సంఘం అభ్యర్థుల ఖర్చు పరిమితిని ఖరారు చేసింది. నిబంధనల ఉల్లంఘనకు పాల్పడితే.. అభ్యర్థులు మూడేళ్లపాటు ఎన్నికల్లో పోటీ చేయడానికి అనర్హులు అవుతారు. అంతేకాకుండా.. గెలిచినా కూడా పదవిని కోల్పోయే ప్రమాదం ఉంటుంది. తెలంగాణ పంచాయతీరాజ్‌ చట్టం-2018 ప్రకారం.. 5,000 కంటే ఎక్కువ జనాభా ఉన్న గ్రామ పంచాయతీల్లో సర్పంచ్ అభ్యర్థి రూ.2.50 లక్షలు, వార్డు సభ్యుడుగా పోటీ చేసే వ్యక్తి రూ.50 వేలలోపు ఖర్చు చేయాలి.

జెడ్పీటీసీ అభ్యర్థికి రూ.4 లక్షలు, ఎంపీటీసీ అభ్యర్థికి రూ.1.50 లక్షల వ్యయ పరిమితి ఉంది. అభ్యర్థుల తరఫున రాజకీయ పక్షాలు చేసే ఖర్చులు కూడా అభ్యర్థి ఖాతాకే జమ అవుతాయి. ఎన్నికల ఫలితాలు వెల్లడైన తేదీ నుంచి 45 రోజులలోపు ఖర్చుల తుది నివేదికను సంబంధిత అధికారికి సమర్పించాలి. ఎన్నికల నిర్వహణ కోసం తెలంగాణ పంచాయతీ రాజ్ శాఖ ఇప్పటికే రూ.325 కోట్ల నిధులను విడుదల చేసింది. తహశీల్దార్లను నోడల్ అధికారులుగా నియమించి.. ఎన్నికల ప్రవర్తనా నియమావళిని కఠినంగా అమలు చేయాలని రాష్ట్ర ఎన్నికల సంఘం ఆదేశించింది.