శ్రీరాంసాగర్ ప్రాజెక్ట్ 2 పేరు మార్పు..కీలక నిర్ణయం తీసుకున్న సీఎం రేవంత్ రెడ్డి

తెలంగాణ రాష్ట్రంలోని నల్గొండ జిల్లాలో కాంగ్రెస్ పార్టీ సీనియర్ నేత, దివంగత మాజీ మంత్రి రాంరెడ్డి దామోదర్ రెడ్డి సంస్మరణ సభ జరిగింది. సూర్యాపేట జిల్లాలోని తుంగతుర్తిలో జరిగిన ఈ కార్యక్రమంలో ముఖ్యమంత్రి రేవంత్ రెడ్డి పాలుపంచుకున్నారు. ఈ సందర్భంగా ఆయన దివంగత నాయకుని సేవలను కొనియాడుతూ, కీలక ప్రకటనలు చేశారు.

దివంగత నేత సేవలకు అంకితం..

సీఎం రేవంత్ రెడ్డి మాట్లాడుతూ.. నల్గొండ ప్రాంతానికి గోదావరి జలాలు అందుతున్నాయంటే దానికి ప్రధాన కారణం రాంరెడ్డి దామోదర్ రెడ్డే అని అన్నారు. నల్గొండలో కాంగ్రెస్ పార్టీని నిలబెట్టడానికి దామన్న చేసిన కృషి చిరస్మరణీయమని చెప్పారు. దామన్న సేవలకు నివాళిగా.. ఎస్సారెస్పీ-2 (శ్రీరామ్ సాగర్ ప్రాజెక్టు రెండో దశ) కు ఆర్డీఆర్ (రాంరెడ్డి దామోదర్ రెడ్డి) అని పేరు పెడతామని ముఖ్యమంత్రి ప్రకటించారు. ఈ నామకరణానికి సంబంధించిన ఉత్తర్వులు (జీవో) 24 గంటల్లోనే విడుదల చేయిస్తామని హామీ ఇచ్చారు.

తుంగతుర్తి ప్రాంత ప్రజల కోసం, ముఖ్యంగా సాగునీటి సమస్య పరిష్కారం కోసం దామోదర్ రెడ్డి ఆనాటి ప్రభుత్వంపై ఒత్తిడి తీసుకొచ్చి ఎస్సారెస్పీ ప్రాజెక్టు నీటిని తీసుకురావడంలో ప్రధాన పాత్ర పోషించారు. పాలమూరు-రంగారెడ్డి ఎత్తిపోతల పథకానికి కూడా దామన్న కృషి వెనుక ఉందని ప్రముఖులు ఈ సందర్భంగా గుర్తు చేసుకున్నారు. మాజీ మంత్రి ఆకస్మిక మరణం పట్ల ఏఐసీసీ  నేతలు సోనియా గాంధీ, మల్లికార్జున ఖర్గే, రాహుల్ గాంధీ తీవ్ర సంతాపం వ్యక్తం చేశారని ముఖ్యమంత్రి తెలిపారు. దామన్న కుటుంబానికి కాంగ్రెస్ పార్టీ అధిష్ఠానం అండగా ఉంటుందని, వారి కుటుంబ సభ్యులకు రాజకీయంగా తగిన అవకాశం కల్పిస్తామని రేవంత్ రెడ్డి హామీ ఇచ్చారు.

ఇదిలా ఉండగా.. సూర్యాపేట నియోజకవర్గ ఇన్‌చార్జ్‌గా వ్యవహరించిన ఆయన, గత కొంతకాలంగా మూత్రపిండాల వ్యాధి  తో బాధపడ్డారు. హైదరాబాద్‌లోని ఒక ప్రైవేట్ ఆసుపత్రిలో చికిత్స పొందుతూ ఆయన తుదిశ్వాస విడిచారు.