హైదరాబాద్‌కు సింగరేణి సంస్థ.. 10 ఎకరాల్లో ఏర్పాటు

తెలంగాణ రాష్ట్రంలోని సింగరేణి కాలరీస్ కంపెనీ లిమిటెడ్ అంతర్జాతీయ స్థాయిలో తన కార్యకలాపాలను విస్తరించడానికి సిద్ధమవుతోంది. ముఖ్యంగా అరుదైన లోహాల అన్వేషణ , వెలికితీతకు అనుమతులు పొందిన నేపథ్యంలో.. విదేశీ సంస్థలతో సహకారం కోసం హైదరాబాద్‌లో ఒక అంతర్జాతీయ కార్యాలయాన్ని స్థాపించాలని ప్రణాళికలు రచిస్తోంది.

ఫ్యూచర్‌ సిటీలో సింగరేణి కార్యాలయం ఏర్పాటు ప్రభుత్వం ప్రతిష్టాత్మకంగా నిర్మిస్తున్న ‘ఫ్యూచర్ సిటీ’ ప్రాజెక్ట్‌లో పది ఎకరాల స్థలాన్ని సింగరేణికి కేటాయించాలని ముఖ్యమంత్రి రేవంత్ రెడ్డి ఇటీవల ప్రకటించారు. సీఎం ప్రకటన సింగరేణి అంతర్జాతీయ లక్ష్యాలకు మద్దతుగా నిలిచింది.

హైదరాబాద్‌కు సమీపంలో, ఏడు మండలాల పరిధిలో ఉన్న 56 గ్రామాలను కలుపుతూ 30 వేల ఎకరాల్లో ఈ ఫ్యూచర్ సిటీని ప్రభుత్వం అభివృద్ధి చేస్తోంది. అంతర్జాతీయ సంస్థలను పరిశ్రమలు నెలకొల్పేందుకు ఆహ్వానిస్తున్న ఈ ప్రాంతంలో సింగరేణికి పది ఎకరాలు కేటాయించడానికి నిర్ణయం తీసుకున్నారు. త్వరలోనే దీనికి సంబంధించిన హక్కు పత్రాలను అప్పగించేందుకు చర్యలు చేపట్టనున్నారు.

 స్థలం అందుబాటులోకి వచ్చిన వెంటనే.. సింగరేణి తన అంతర్జాతీయ స్థాయి కార్యాలయ నిర్మాణానికి సన్నద్ధమవుతోంది. ఈ భవనానికి సంబంధించిన నమూనాల కోసం ఇప్పటికే నిపుణులతో సంప్రదింపులు జరుపుతోంది. సింగరేణి సీఎండీ ఎన్. బలరాం మాట్లాడుతూ.. ‘భవిష్యత్ అవసరాలకనుగుణంగా’ ఈ ఆఫీస్ రూపుదిద్దుకుంటుందని తెలిపారు. దశాబ్దాలుగా బొగ్గు ఉత్పత్తికి పర్యాయపదంగా ఉన్న సింగరేణి, ఇప్పుడు అరుదైన లోహాలు వంటి కీలకమైన ఖనిజాల అన్వేషణ దిశగా అడుగులు వేస్తోంది.

లిథియం, టైటానియం వంటి అరుదైన ఖనిజాలకు ప్రపంచవ్యాప్తంగా పెరుగుతున్న డిమాండ్‌ను దృష్టిలో ఉంచుకుని.. ఈ లోహాలను గుర్తించడం, వెలికితీయడం కోసం వివిధ దేశాలలోని నైపుణ్యం కలిగిన సంస్థలతో ఒప్పందాలు కుదుర్చుకోవాలని సంకల్పించింది. హైదరాబాద్‌లో అంతర్జాతీయ కార్యాలయం ఏర్పాటు చేయడం ఈ భాగస్వామ్యాలకు ఒక కేంద్రంగా పనిచేయనుంది.

ఈ విస్తరణ సింగరేణికి మాత్రమే కాకుండా... తెలంగాణ రాష్ట్రానికి కూడా అపారమైన ఆర్థిక, సాంకేతిక ప్రయోజనాలను చేకూర్చనుంది. అంతర్జాతీయ ప్రమాణాలతో కూడిన ఖనిజాల వెలికితీత రంగంలో స్థానిక యువతకు ఉపాధి అవకాశాలు లభించే అవకాశం ఉంది. ఈ కొత్త కార్యాలయం ద్వారా విదేశీ పెట్టుబడులు, నూతన సాంకేతికత రాష్ట్రంలోకి ప్రవేశిస్తాయి. ఈ ముందడుగుతో సింగరేణి ఒక రాష్ట్ర సంస్థ స్థాయి నుంచి అంతర్జాతీయంగా విస్తరించే సంస్థగా మారుతోంది.