మొబైల్ ఫోన్ల రికవరీలో.. దేశంలోనే తెలంగాణ టాప్ ప్లేస్‌లో

తెలంగాణ రాష్ట్రంలోని తపాలా, టెలికమ్యూనికేషన్స్ విభాగం, పోలీస్ శాఖల మధ్య సమన్వయం అద్భుతమైన ఫలితాలను సాధించింది. క్రైమ్ ఇన్వెస్టిగేషన్ డిపార్ట్‌మెంట్ శుక్రవారం వెల్లడించిన వివరాల ప్రకారం.. తెలంగాణ పోలీసులు 2025 అక్టోబర్ వరకు ఏకంగా 1.02 లక్షలకు పైగా పోగొట్టుకున్న లేదా దొంగిలించబడిన మొబైల్ ఫోన్లను రికవరీ చేయడంలో దేశంలోనే ప్రథమ స్థానంలో నిలిచింది.

సీఈఐఆర్ పోర్టల్‌తో..

మొబైల్ ఫోన్ల దొంగతనం మరియు నకిలీ పరికరాల సమస్యలను అరికట్టడానికి డిపార్ట్‌మెంట్ ఆఫ్ టెలికమ్యూనికేషన్స్ (DoT) ద్వారా సెంట్రల్ ఎక్విప్‌మెంట్ ఐడెంటిటీ రిజిస్టర్ పోర్టల్ అభివృద్ధి చేశారు. తెలంగాణలో ఈ సీఈఐఆర్ వ్యవస్థను అమలు చేయడానికి సీఐడీ నోడల్ ఏజెన్సీగా పనిచేస్తోంది. ప్రస్తుతం రాష్ట్రంలోని 780 పోలీసు స్టేషన్లన్నింటిలో ఈ వ్యవస్థ కార్యాచరణలో ఉంది.

ఈ పోర్టల్‌ను మొదటగా 2022 సెప్టెంబర్ 5న కర్ణాటక, మహారాష్ట్ర, ఢిల్లీ వంటి పైలట్ రాష్ట్రాలలో ప్రారంభించారు. తెలంగాణలో మాత్రం 2023 ఏప్రిల్ 19న (పైలట్ ప్రారంభం తర్వాత 226 రోజులకు) ప్రారంభించినప్పటికీ.. దొంగిలించబడిన లేదా పోగొట్టుకున్న మొబైల్ పరికరాల రికవరీలో దేశంలోనే అగ్రగామిగా నిలవడం ప్రశంసనీయం.

సీఈఐఆర్ డాష్‌బోర్డ్ ప్రకారం.. 2025 అక్టోబర్ 16 వరకు తెలంగాణలో 1,00,020 మొబైల్ పరికరాలను రికవరీ చేసి.. దేశంలోనే అగ్రస్థానాన్ని దక్కించుకుంది. ఈ రికార్డు మొబైల్ పరికరాల పునరుద్ధరణలో జాతీయ స్థాయికి కొత్త ప్రమాణాన్ని సెట్ చేసింది. ఈ గొప్ప విజయం క్షేత్ర స్థాయిలో ఉన్న పోలీస్ అధికారుల నిబద్ధత, కృషి వల్ల సాధ్యమైందని సీఐడీ అదనపు డైరెక్టర్ జనరల్ చారు సిన్హా తెలిపారు.

సీఈఐఆర్ పోర్టల్ ద్వారా అందిన ఫిర్యాదులపై తక్షణ చర్యలు తీసుకోవడానికి ప్రతి పోలీస్ యూనిట్ క్రమం తప్పకుండా పనిచేసింది. ఇందులో కేసుల నమోదు, పోగొట్టుకున్న ఫోన్‌లను కలిగి ఉన్న వ్యక్తులను సంప్రదించడం, పరికరాలను తిరిగి పొందడం.. వాటిని నిజమైన యజమానులకు అప్పగించడం వంటి కార్యక్రమాలు ఉన్నాయి. తెలంగాణ పోలీసులు DoTతో కలిసి సీఈఐఆర్ పోర్టల్‌ను తెలంగాణ పోలీసు సిటిజన్ పోర్టల్‌తో ఏకీకృతం చేశారు. దీని వలన పౌరులు పోగొట్టుకున్న మొబైల్ ఫోన్లను tspolice.gov.in ద్వారా లేదా ceir.gov.in ద్వారా నేరుగా నివేదించవచ్చు. సీఐడీ చీఫ్ ఈ విజయానికి DoT అధికారులు, సీఐడీ ఉద్యోగుల మధ్య ఉన్న సన్నిహిత సహకారాన్ని అభినందించారు.