సర్పంచి పదవికోసం ఆశపడి భంగపడ్డ యువకుడు
Telangana Telugu | Suryaa Desk | Published : Thu, Nov 27, 2025, 02:24 PM
కరీంనగర్ జిల్లాలోని గంగాధర మండలంలో విచిత్ర ఘటన చోటు చేసుకుంది. వివరాల్లోకి వెళితే.. మండల పరిధిలోని ఓ గ్రామంలో సర్పంచి స్థానం ఎస్సీ మహిళలకు రిజర్వ్ అయింది. దీంతో గ్రామానికి చెందిన యువకుడు ఒకరు ఈ అవకాశాన్ని అందిపుచ్చుకోవాలని ప్రణాళిక వేసుకున్నాడు. ఇందులో భాగంగా నల్గొండ జిల్లాకు చెందిన ఓ ఎస్సీ మహిళను పెళ్లి చేసుకోవాలని నిర్ణయించుకున్నాడు. రిజర్వేషన్ తో సర్పంచ్ పదవి దక్కించుకోవాలని హడావుడిగా ఈ నెల 26న ఓ ఆలయంలో పెళ్లి చేసుకున్నాడు.అయితే, ఆమె పేరును గ్రామంలోని ఓటరు జాబితాలో చేర్చే విషయంలో ఆలస్యం జరిగింది. ఇంతలో ఎన్నికల సంఘం నోటిఫికేషన్ జారీ చేసింది. దీంతో పరిస్థితి ఒక్కసారిగా మారిపోయింది. నోటిఫికేషన్ వెలువడటంతో ఓటరు జాబితాలో పేరు నమోదు చేసుకునేందుకు గడువు ముగిసింది. ఫలితంగా, అతని భార్య పేరు ఓటరు జాబితాలో నమోదు కాలేదు. నామినేషన్ వేయడానికి ఆమెకు అర్హత లేకుండా పోయింది. సర్పంచ్ పదవిని దక్కించుకోవాలనే లక్ష్యంతో పెళ్లి చేసుకున్నప్పటికీ ఆ యువకుడి కల నెరవేరలేదు.
|
|