ఖమ్మం జిల్లా బాధ్యతలు మహిపాల్ రెడ్డికి.. బీజేపీ కొత్త ఇన్‌చార్జ్‌ల జాబితా విడుదల!

తెలంగాణ బీజేపీలో జిల్లాల బాధ్యతల్లో కీలక మార్పులు చోటు చేసుకున్నాయి. పార్టీ రాష్ట్ర ప్రధాన కార్యదర్శి ఎన్. గౌతమ్ రావు శనివారం జిల్లాల వారీగా కొత్త ఇన్‌చార్జ్‌ల పేర్లను అధికారికంగా ప్రకటించారు. ఈ నియామకాలతో పార్టీ రాష్ట్రవ్యాప్తంగా తన సంస్థాగత బలాన్ని మరింత పటిష్ఠం చేసుకునే దిశగా అడుగులు వేస్తోంది. ముఖ్యంగా ఖమ్మం జిల్లాకు స్థానిక నాయకుడినే బాధ్యతలు అప్పగించడం గమనార్హం.
ఖమ్మం జిల్లా బీజేపీ ఇన్‌చార్జిగా బద్ధం మహిపాల్ రెడ్డిని నియమించినట్లు పార్టీ అధిష్ఠానం ప్రకటించింది. ఇప్పటికే పార్టీలో చైతన్యవంతమైన కార్యకర్తగా పేరొందిన మహిపాల్ రెడ్డి ఈ బాధ్యతను స్వీకరించడం ఖమ్మం జిల్లా బీజేపీ కార్యకర్తల్లో భారీ ఉత్సాహాన్ని నింపింది. గ్రామీణ బీజేపీని బలోపేతం చేయాలన్న పార్టీ లక్ష్యంలో ఈ నియామకం కీలక పాత్ర పోషిస్తుందని నాయకులు భావిస్తున్నారు.
అదే సమయంలో ఖమ్మం జిల్లాకు చెందిన మరో సీనియర్ నాయకుడు కొండపల్లి శ్రీధర్ రెడ్డికి వరంగల్ జిల్లా ఇన్‌చార్జి బాధ్యతలు అప్పగించారు. అలాగే సన్నె ఉదయ్ ప్రతాప్‌కు నల్లగొండ జిల్లా బాధ్యతలు దక్కాయి. ఈ ముగ్గురు నాయకులూ ఖమ్మం నేపథ్యం కలిగి ఉండటం పార్టీ వ్యూహంలో భాగమేనని రాజకీయ విశ్లేషకులు అభిప్రాయపడుతున్నారు.
2028 అసెంబ్లీ ఎన్నికలకు ఇప్పటి నుంచే సన్నద్ధం కావాలన్న బీజేపీ అధినేతల ఆలోచనతోనే ఈ కొత్త నియామకాలు జరిగినట్లు తెలుస్తోంది. ఖమ్మం, వరంగల్, నల్లగొండ జిల్లాల్లో పార్టీ బేస్‌ను విస్తరించే బాధ్యతను స్థానిక నాయకులకే అప్పగించడం ద్వారా కార్యకర్తల్లో నూతన ఊపిరి నింపే ప్రయత్నం చేస్తోంది బీజేపీ.