రైతులకు భారీ శుభవార్త.. సమస్యను పరిష్కరించిన మంత్రి తుమ్మల

తెలంగాణ రాష్ట్రంలో పత్తి రైతులను ఆందోళనకు గురిచేసిన పత్తి కొనుగోళ్ల వివాదానికి ఎట్టకేలకు శుభం కార్డు పడింది. భారత పత్తి సంస్థ (సీసీఐ - కాటన్ కార్పొరేషన్ ఆఫ్ ఇండియా) , రాష్ట్రంలోని జిన్నింగ్ మిల్లుల మధ్య నెలకొన్న ప్రతిష్టంభన తొలగిపోవడంతో.. రాష్ట్రవ్యాప్తంగా పత్తి కొనుగోళ్లు పునఃప్రారంభమయ్యాయి. కొనుగోళ్లు నిలిచిపోవడంతో మార్కెట్‌లో ఏర్పడిన గందరగోళానికి దీని ద్వారా తెరపడినట్లయింది.

గతంలో సీసీఐ విధించిన కొన్ని కఠిన నిబంధనల కారణంగా రాష్ట్రంలోని జిన్నింగ్ మిల్లుల యజమానులు వాటిని తీవ్రంగా వ్యతిరేకించారు. కొనుగోలు నిబంధనలు, ముఖ్యంగా మిల్లులలో పత్తి నిల్వ, నాణ్యత తనిఖీ వంటి అంశాలపై మిల్లర్లు అభ్యంతరాలు వ్యక్తం చేయడంతో.. రాష్ట్రవ్యాప్తంగా పత్తి కొనుగోళ్లు పూర్తిగా నిలిచిపోయాయి. దీని ఫలితంగా రైతులు తమ పంటను అమ్ముకోవడానికి ఇబ్బందులు పడ్డారు. పత్తి కొనుగోళ్లు నిలిచిపోవడంతో రైతులపై ఆర్థిక భారం పెరిగింది.

ఈ సమస్య తీవ్రతను గుర్తించిన రాష్ట్ర వ్యవసాయ శాఖ మంత్రి తుమ్మల నాగేశ్వరరావు స్వయంగా ఈ వివాదంలో జోక్యం చేసుకున్నారు. ఆయన ఈ సమస్య పరిష్కారం కోసం విశేష కృషి చేశారు. మంత్రి తుమ్మల నాగేశ్వరరావు ముందుగా సీసీఐ అధికారులు, జిన్నింగ్ మిల్లుల యజమానులతో పలు దఫాలుగా చర్చలు జరిపారు.

నిబంధనలలో తగిన మార్పులు..

అనంతరం.. కేంద్ర మంత్రులు, సీసీఐ యొక్క చైర్మన్ కమ్ మేనేజింగ్ డైరెక్టర్ (సీఎండీ) అధికారులతో మాట్లాడి.. మిల్లుల యజమానుల అభ్యంతరాలను దృష్టిలో ఉంచుకుని నిబంధనలలో తగిన మార్పులు చేయించారు. మంత్రి తుమ్మల నాగేశ్వరరావు చొరవతో నిబంధనల్లో మార్పులు రావడంతో.. సమస్య పూర్తిగా పరిష్కారమైంది. రాష్ట్రంలో నోటిఫై చేసిన మొత్తం 330 జిన్నింగ్ మిల్లులు తిరిగి పత్తి కొనుగోళ్లను ప్రారంభించనున్నాయి. ఇప్పటివరకు సీసీఐ కేవలం 3.66 లక్షల టన్నుల పత్తిని మాత్రమే సేకరించగలిగింది. అయితే.. ఇకపై సీసీఐ, జిన్నింగ్ మిల్లులు సమన్వయంతో పనిచేసి.. రైతుల వద్ద మిగిలిన మొత్తం పత్తిని పూర్తిస్థాయిలో కొనుగోలు చేసేలా చూస్తామని మంత్రి తుమ్మల నాగేశ్వరరావు రైతులకు హామీ ఇచ్చారు.