తెలంగాణ రైజింగ్ గ్లోబల్ సమ్మిట్ 2025: భవిష్యత్తుకు పయనం

తెలంగాణలో ఉన్న అపార అవకాశాలను ప్రజలకు, పెట్టుబడిదారులకు పరిచయం చేసి, యువతకు ఉపాధి కల్పించడం లక్ష్యంగా రెండు రోజుల తెలంగాణ రైజింగ్ గ్లోబల్ సమ్మిట్కు అన్ని ఏర్పాట్లు పూర్తి అయ్యాయి.ఇందుకోసం భారత్ ఫ్యూచర్ సిటీలో అత్యాధునిక వేదికలను ప్రభుత్వం సిద్ధం చేసింది. ఈ రెండు రోజుల సదస్సులో 44కు పైగా దేశాల నుంచి 154 అంతర్జాతీయ ప్రతినిధులు పాల్గొంటారు. ప్రపంచవ్యాప్తంగా పేరెన్నికగల కంపెనీల యాజమాన్య ప్రతినిధుల బృందాలు కూడా హాజరు కాబోతున్నాయి. ఒక్క అమెరికా నుంచే 46 మంది ప్రతినిధులు వస్తున్నారు.నేటి మధ్యాహ్నం ఒకటింటికీ గవర్నర్ జిష్ణు దేవ్ వర్మ లాంఛనంగా సమ్మిట్ ప్రారంభం చేస్తారు. ప్రారంభ వేడుకలో సుమారు రెండు వేల మంది దేశీయ, అంతర్జాతీయ అతిధులు పాల్గొననున్నారు. సమ్మిట్‌లో వివిధ అంశాలపై ప్రసంగించడానికి నోబెల్ బహుమతి గ్రహీత అభిజిత్ బెనర్జీ, ట్రంప్ మీడియా-టెక్నాలజీ గ్రూప్ CEO ఎరిక్ స్వైడర్, వరల్డ్ ఎకనామిక్ ఫోరమ్ CEO జెరెమీ జుర్గెన్స్, నోబెల్ శాంతి బహుమతి గ్రహీత కైలాష్ సత్యార్థి, బయోకాన్ లిమిటెడ్ ఎగ్జిక్యూటివ్ చైర్‌పర్సన్ కిరణ్ మజుందార్-షా తదితరులు పాల్గొననున్నారు.మధ్యాహ్నం 2.30 గంటలకు ముఖ్యమంత్రి రేవంత్ రెడ్డి ప్రసంగిస్తారు. తెలంగాణలో ప్రజా పాలన, పెట్టుబడుల అవకాశాలు, ప్రభుత్వ సహకారం, Vision 2047 లక్ష్యాలు, భారత్ ఫ్యూచర్ సిటీపై ముఖ్యమైన వివరాలను ఆహుతులకు వివరించనున్నారు.రెండు రోజుల్లో మొత్తం 27 విభిన్న సెషన్లు నిర్వహించబడతాయి. దీనికై అన్ని సెమినార్ హాళ్లు సిద్దంగా ఉన్నాయి.వచ్చే అంతర్జాతీయ, దేశీయ అతిధులు, పెట్టుబడిదారులు తెలంగాణ ప్రత్యేకతలను, హైదరాబాద్ అందాలను అనుభవించేలా ప్రత్యేక ప్రచార సామగ్రి సిద్ధం చేశారు. ఎయిర్‌పోర్టు నుండి ఫ్యూచర్ సిటీ వేదిక వరకు వివిధ రకాల ప్రదర్శనలు ఉంటాయి. హైదరాబాద్ నగరంలో అత్యాధునిక టెక్నాలజీతో లైటింగ్ ప్రొజెక్షన్, 3D ప్రాజెక్షన్ మ్యాపింగ్, LED స్క్రీన్ల ద్వారా ప్రత్యేక ప్రదర్శనలు ఏర్పాటు చేశారు.సదస్సు సత్రాల తర్వాత, ప్రముఖ మ్యూజిక్ డైరెక్టర్ కీరవాణి సంగీత కచేరితో అతిధులను అలరించనున్నారు. అలాగే తెలంగాణ ప్రత్యేక నృత్యాలు – కొమ్ము కోయ, బంజారా, కోలాటం, గుస్సాడీ, ఒగ్గు డొల్లు, పేరిణి నాట్యం, బోనాల ప్రదర్శనలు – ద్వారా సాంస్కృతిక ప్రదర్శనలు జరుగుతాయి. అదనంగా, నాగార్జున సాగర్ సమీపంలోని ప్రపంచంలోనే అతిపెద్ద బౌద్ధ వారసత్వ థీమ్ పార్క్ బుద్ధవనంకి దౌత్య బృందం ప్రత్యేక పర్యటనలు పొందుతారు.సదస్సు సమయంలో హాజరైన అతిధులు తెలంగాణ ప్రసిద్ధ వంటలతో, ముఖ్యంగా హైదరాబాదీ బిర్యానీ, ఇన్నర్ తెలంగాణ వంటకాలు లభిస్తాయి.అతిధులకు తెలంగాణ పర్యటన ఎప్పటికీ గుర్తుండేలా, ప్రత్యేక సావనీర్లు ప్రభుత్వ తరపున అందించబడతాయి. ఇందులో సమ్మిట్ లోగో, పోచంపల్లి ఇక్కట్ శాలువా, చేర్యాల కళాకృతులు, హైదరాబాదీ అత్తర్, ముత్యాలతో నగలు ఉన్నాయి. అలాగే తెలంగాణకు ప్రత్యేకమైన వంటలతో కూడిన బాస్కెట్ – ఇప్ప పువ్వు లడ్డు, సకినాలు, చెక్కలు, బాదం కీ జాలి, నువ్వుల ఉండలు, మక్క పేలాలు – కూడా ప్రతిభావంతులకు ఇవ్వబడతాయి.