28 బంతుల్లో 59 పరుగులు,,,,,సౌతాఫ్రికాతో టీ20లో హార్దిక్ పాండ్యా జోరు

గాయం నుంచి కోలుకుని తిరిగి భారత జట్టులోకి వచ్చిన టీమిండియా ఆల్‌రౌండర్ హార్దిక్ పాండ్యా.. సౌతాఫ్రికాతో తొలి టీ20 మ్యాచ్‌లో చెలరేగిపోయాడు. జట్టు కష్టాల్లో ఉన్నప్పుడు బ్యాటింగ్‌కు వచ్చిన పాండ్యా.. తన మార్క్ షాట్లతో అలరించాడు. కుంగ్‌ ఫూ పాండ్యాను గుర్తుకు తెచ్చాడు. మిగతా బ్యాటర్లంతా విఫలమైన అదే పిచ్‌పై సిక్సర్ల వర్షం కురిపించాడు. 200లకు పైగా స్ట్రైక్‌ రేట్‌తో రన్స్ సాధించాడు. దీంతో టీమిండియా తొలి టీ20లో 6 వికెట్ల నష్టానికి 175 పరుగులు స్కోరు చేసింది.

కటక్ వేదికగా జరిగిన ఈ మ్యాచ్‌లో టాస్ గెలిచిన సౌతాఫ్రికా కెప్టెన్ ఎయిడెన్ మార్‌క్రమ్‌ తొలుత బౌలింగ్ ఎంచుకున్నాడు. అయితే కెప్టెన్ నమ్మకాన్ని నిలబెడుతూ ఆ జట్టు బౌలర్లు రాణించారు. శుభ్‌మన్ గిల్ (4), సూర్యకుమార్ యాదవ్ (12)లను పవర్ ప్లే ముగిసే లోపే ఔట్ చేశారు. ఆ తర్వాత కాసేపటికే అభిషేక్ శర్మ (17) కూడా పెవిలియన్ చేరిపోయాడు. తిలక్ వర్మ (32 బంతుల్లో 26 రన్స్‌), అక్షర్ పటేల్ (21 బంతుల్లో 23 రన్స్) క్రీజులో ఉన్నంత సేపు ఇబ్బంది పడ్డారు. భారీ షాట్లు ఆడలేకపోయారు.

పాండ్యా ఊచకోత..

హార్దిక్ పాండ్యా క్రీజులోకి వచ్చే సరికి భారత్ స్కోరు 11.4 ఓవర్లలో 78/4. ఈ సమయంలో భారత్.. 150 రన్స్ చేయడమే కష్టం అనిపించింది. కానీ పాండ్యా మాత్రం వచ్చీరాగానే బాదుడు మొదలెట్టాడు. తాను ఎదుర్కొన్న రెండో బంతినే స్టాండ్స్‌లోకి పంపించాడు. నాలుగో బంతికి కూడా ఆరు పరుగులు రాబట్టాడు. ఆ తర్వాత కూడా అదే జోరు కొనసాగించి.. 25 బంతుల్లోనే హాఫ్ సెంచరీ సాధించాడు. మొత్తంగా 28 బంతుల్లో 59 పరుగులతో అజేయంగా నిలిచాడు. దీంతో భారత్ నిర్ణీత 20 ఓవర్లలో 6 వికెట్ల నష్టానికి 175 పరుగులు స్కోరు చేసింది. ఈ మ్యాచ్‌లో పాండ్యా ఆరు సిక్స్‌లు కొట్టాడు. దీంతో అంతర్జాతీయ టీ20లలో వంద సిక్స్‌లను తన ఖాతాలో వేసుకున్నాడు.

ఇక సౌతాఫ్రికా బౌలర్లలో లుంగీ ఎంగిడి మూడు వికెట్లు పడగొట్టాడు. సిపామ్లా 2, ఫెర్రీరా ఒక వికెట్ తీశారు.