అంగన్వాడీ చిన్నారులకు ,,,,,ఉచితంగా యూనిఫాంల పంపిణీ

తెలంగాణలోని అంగన్వాడీనలను బలోపేతం చేసే దిశగా ప్రభుత్వం కీలక నిర్ణయం తీసుకుంది. ఇకపై అంగన్‌వాడీ కేంద్రాలలో ప్రీ-ప్రైమరీ విద్యనభ్యసించే పిల్లలందరికీ ప్రభుత్వ పాఠశాలల తరహాలోనే ఏకరూప దుస్తులను (యూనిఫాంలు) ఉచితంగా పంపిణీ చేయాలని నిర్ణయించింది. అంగన్‌వాడీ కేంద్రాలను ప్రైవేటు నర్సరీ పాఠశాలలకు దీటుగా తీర్చిదిద్దడానికి, విద్యా వ్యవస్థలో మార్పు తీసుకురావడానికి సర్కార్ నిర్ణయం నిర్ణయం తీసుకుంది. అంగన్‌వాడీ కేంద్రాలను కేవలం పౌష్టికాహార కేంద్రాలుగానే కాకుండా.. నాణ్యమైన ప్రీ-ప్రైమరీ పాఠశాలలుగా బలోపేతం చేయాలని ప్రభుత్వం సంకల్పించింది.

చిన్నప్పటి నుంచే పిల్లల్లో క్రమశిక్షణ, సంస్థాగత అలవాట్లను పెంపొందించడం.., పేద, ధనిక అనే ఆర్థిక నేపథ్యంతో సంబంధం లేకుండా పిల్లలందరూ ఒకే దుస్తుల్లో కనిపించడం ద్వారా వారి మధ్య సమానత్వ భావాన్ని, ఆత్మవిశ్వాసాన్ని పెంపొందించటం కోసం ఈ నిర్ణయం తీసుకున్నట్లు అధికారులు తెలిపారు. ఆకర్షణీయమైన, కొత్త దుస్తులు పిల్లలను అంగన్‌వాడీ కేంద్రాలకు రావడానికి ప్రోత్సహిస్తాయని.. తద్వారా హాజరుశాతం గణనీయంగా పెరుగుతుందని భావిస్తున్నారు. ఉచితంగా దుస్తులు అందించడం వల్ల తల్లిదండ్రులపై ఆర్థిక భారం తగ్గుతుందని చెబుతున్నారు.

ఈ ఏకరూప దుస్తుల పంపిణీకి అధికార యంత్రాంగం ఇప్పటికే సన్నద్ధమైంది. ఖమ్మం జిల్లాలో 3 నుంచి 6 ఏళ్ల లోపు పూర్వప్రాథమిక విద్యనభ్యసించే 19,392 మంది పిల్లలకు దుస్తులు అందించేందుకు ఏర్పాట్లు జరుగుతున్నాయి. ఒక్కో చిన్నారికి రెండు రంగులకు చెందిన రెండు జతల దుస్తులను అందజేస్తారు. బాలురకు చొక్కా, నిక్కరు, బాలికలకు ఫ్రాక్ (గౌను) ఉండేలా డిజైన్లను రూపొందించారు. సాధారణంగా ఉండే యాష్ కలర్ తో పాటు, ఎరుపు రంగు ఫ్లోరల్ డిజైన్ల ఆకర్షణీయమైన కలయికతో ఈ దుస్తులను సిద్ధం చేశారు.

ఈ పథకం ద్వారా కేవలం పిల్లలకు లబ్ధి చేకూర్చడమే కాకుండా, మహిళా సాధికారతకు కూడా ప్రభుత్వం ప్రాధాన్యం ఇచ్చింది. ఈ యూనిఫాంల తయారీ బాధ్యతను స్థానికంగా ఉన్న మహిళా శక్తి సంఘాలకు అప్పగించింది. దీనివల్ల ఆ మహిళా సంఘాలకు ఉపాధి, ఆదాయం లభించడంతో పాటు, పథకం అమలులో పారదర్శకత, వేగం పెరుగుతాయని ప్రభుత్వం భావిస్తోంది. ఈ విధంగా, అంగన్‌వాడీ కేంద్రాలు గ్రామీణ ప్రాంతాల్లో విద్య, ఆర్థికాభివృద్ధికి కేంద్రాలుగా మారనున్నాయి.