స్త్రీనిధి రుణాల చెల్లింపు కోసం ప్రత్యేక యాప్,,,,ఇంటి వద్ద నుంచే లోన్ చెల్లింపులు

తెలంగాణ రాష్ట్రంలో మహిళలు ఆర్థికంగా స్వావలంబన సాధించడం కోసం ప్రభుత్వాలు అనేక పథకాలు అమలు చేస్తున్న సంగతి తెలిసిందే. మరీ ముఖ్యంగా మహిళా సంఘాలకు లోన్ల రూపంలో భారీ మొత్తంలో ఆర్థిక సాయం అందజేస్తూ వారు ఆర్థికంగా ఎదగడానికి మద్దతు అందజేస్తోంది. వారికి సాధారణ రుణాలతో పాటు అత్యవసర సమయంలో ఆదుకోవడానికి, వ్యాపారాలు చేసుకోవడానికి స్త్రీనిధి పేరుతో ప్రత్యేకంగా లోన్ ఇస్తోంది. దీని కింద అర్హులైన మహిళలకు రూ.లక్ష నుంచి రూ.3 లక్షల వరకు లోన్లు ఇస్తోంది.

బ్యాంకులు ఇలా ఇచ్చిన లోన్లను సరిగా చెల్లించడంలో మహిళా సంఘాల సభ్యులు ముందు వరుసలో ఉంటున్నారని ప్రభుత్వ అధికారులే చాలా సందర్భాల్లో తెలిపారు. చాలా తక్కువ శాతం మంది ఈ లోన్లను చెల్లించలేకపోతున్నారు. గ్రూపుల్లో ఉన్న సభ్యుల్లో కొందరు సకాలంలో డబ్బులు ఇవ్వకపోవడం వల్ల మిగతా వారు ఇబ్బంది పడాల్సి వస్తుంది. అయితే కొందరు బ్యాంకులకు వెళ్లేంత తీరిక లేకనో.. మరే ఇతర కారణాల వల్లనో లోను ఈఎంఐ చెల్లించడానికి గ్రామ స్థాయిలో గ్రామదీపికలను.. పట్టణాల్లో అయితే ఆర్పీలకు ఇస్తున్నారు.

అయితే కొంత మంది సిబ్బంది వాటిని తమ సొంతానికి వాడుకుంటున్నారనే ఆరోపణలు వస్తున్నాయి. మరీ ముఖ్యంగా స్త్రీనిధి లోన్ల చెల్లింపు అంశంలో ఇలాంటి సంఘటనలు చోటు చేసుకుంటున్నాయి. స్త్రీనిధి సిబ్బంది, సీఆర్పీలు మహిళా సంఘాల సభ్యుల ఇళ్లకు వెళ్లి లోన్ల బకాయి విషయం అడిగే వరకు సంఘం సభ్యులకు తెలియడం లేదు. ఈ క్రమంలో ఇలాంటి మోసాలను అరికట్టడం కోసం ప్రభుత్వం కీలక నిర్ణయం తీసుకుంది. ఇలాంటి మోసాలను అరికట్టడం కోసం ‘మన స్త్రీనిధి’ యాప్‌ను అందుబాటులోకి తీసుకొచ్చింది.

ఈ యాప్‌లో సంఘ సభ్యుల వివరాలతో పాటు వారు స్త్రీనిధి ద్వారా తీసుకున్న రుణాలు, చెల్లింపుల వివరాలు అందుబాటులో ఉంటాయి. దీని ద్వారానే లోన్ చెల్లింపు చేసుకునే అవకాశం ఉంది. దీని కోసం ముందుగా గూగుల్ ప్లే స్టోర్‌కి వెళ్లి ‘మన స్త్రీనిధి’ యాప్‌ను డౌన్‌లోడ్‌ చేసుకోవాలి. ఆ తర్వాత ఫోన్ నంబర్ నమోదు చేస్తే ఆ సంఘం సభ్యుల వివరాలు కనిపిస్తాయి. అలానే వీరు గతంలో ఎంత లోన్ తీసుకున్నారు.. ఇప్పటి వరకు ఎంత చెల్లించారు.. ఇంకా ఎన్ని నెలలు చెల్లించాలి అనే వివరాలు దీనిలో కనిపిస్తాయి.

ఫోన్ నంబర్ అప్‌డేట్ చేయకపోతే.. సంబంధిత అధికారుల వద్దకు వెళ్లి విషయం చెప్పి అప్‌డేట్ చేయించుకోవాలి. ఈఎంఐ కట్టాలనుకునేవారు.. ఎవరికీ డబ్బులు ఇవ్వకుండా ఫోన్ యాప్‌లో మనస్త్రీనిధి తెలంగాణ అని టైప్ చేస్తే .. చెల్లించాల్సిన నెల వాయిదా మొత్తం కనిపిస్తోంది. ఇలా సులభంగా ఇంటి వద్ద నుంచే చెల్లింపులు చేసుకోవచ్చు.