హెల్ప్ చేసిన సర్వే ఆఫ్ ఇండియా మ్యాప్.. రూ.400 కోట్ల భూమి సేఫ్

హైదరాబాద్ నగరంలో చెరువులు, కుంటలు, ప్రభుత్వ ఆస్తుల పరిరక్షణే లక్ష్యంగా పనిచేస్తున్న హైదరాబాద్ డిజాస్టర్ రెస్పాన్స్ అండ్ అసెట్స్ ప్రొటెక్షన్ ఏజెన్సీ తాజాగా పాతబస్తీలో ఒక సంచలన విజయాన్ని నమోదు చేసింది. కబ్జాదారుల చెరలో ఉన్న దాదాపు ఏడు ఎకరాల విలువైన ప్రభుత్వ భూమిని అధికారులు పకడ్బందీగా స్వాధీనం చేసుకున్నారు. ప్రజా ఆస్తులను కాపాడటంలో రాజీ పడే ప్రసక్తే లేదని ఈ చర్య ద్వారా ప్రభుత్వం మరోసారి స్పష్టం చేసింది.

పాతబస్తీలోని సర్వే నంబర్ 28లో మొత్తం 9.11 ఎకరాల ప్రభుత్వ భూమి ఉంది. దీని బహిరంగ మార్కెట్ విలువ సుమారు నాలుగు వందల కోట్ల రూపాయలు ఉంటుందని అంచనా. రెవెన్యూ, పోలీసు అధికారుల సమక్షంలో హైడ్రా సిబ్బంది అక్కడికి చేరుకుని.. అక్రమంగా నిర్మించిన భారీ ప్రహారీ గోడలను నేలమట్టం చేశారు. స్వాధీనం చేసుకున్న ఏడు ఎకరాల భూమి చుట్టూ వెంటనే ఫెన్సింగ్ ఏర్పాటు చేయడమే కాకుండా.. ఇది ప్రభుత్వ భూమి అని తెలిపే హెచ్చరిక బోర్డులను కూడా ఏర్పాటు చేశారు. అదే సర్వే నంబర్‌లోని సుమారు రెండు ఎకరాల్లో ఇప్పటికే పేదలు ఇళ్లు నిర్మించుకుని నివసిస్తున్నారు. అయితే.. నివాసాల జోలికి వెళ్లకుండా కేవలం ఖాళీగా ఉన్న కబ్జా భూమిని మాత్రమే హైడ్రా స్వాధీనం చేసుకోవడం విశేషం.

ఈ ఆపరేషన్ చేపట్టే ముందు అధికారులు పక్కా ఆధారాలను సేకరించారు. సర్వే ఆఫ్ ఇండియా మ్యాప్‌లను పరిశీలించగా.. గతంలో అక్కడ ఒక పెద్ద చెరువు ఉన్నట్లు స్పష్టంగా తేలింది. కబ్జాదారులు ఆ చెరువును మట్టితో పూడ్చివేసి, ప్లాట్లుగా మార్చి విక్రయించేందుకు ప్రయత్నించారు. గతంలో కోర్టు వీరికి ఒక కోటి రూపాయల భారీ జరిమానా విధించినప్పటికీ.. కబ్జాదారుల తీరులో మార్పు రాకపోవడంతో హైడ్రా నేరుగా రంగంలోకి దిగింది.

హైడ్రా చేపట్టిన ఈ చర్యపై స్థానిక ప్రజల నుండి పెద్ద ఎత్తున ప్రశంసలు వెల్లువెత్తుతున్నాయి. ముఖ్యంగా కుమ్మరి వాడి పీస్ వెల్ఫేర్ సొసైటీ సభ్యులు హైడ్రా కమిషనర్ ఏ.వి. రంగనాథ్‌కు ప్రత్యేక కృతజ్ఞతలు తెలిపారు. అక్రమంగా పూడ్చివేసిన నాలాలు, కుంటలను పునరుద్ధరిస్తే.. వర్షాకాలంలో తమ ప్రాంతానికి వరద ముప్పు తప్పుతుందని వారు ఆశాభావం వ్యక్తం చేశారు. భవానీపురం పోలీస్ స్టేషన్‌లో ఇప్పటికే అక్రమార్కులపై కేసులు కూడా నమోదయ్యాయి. ప్రభుత్వ భూములను కాపాడటం వల్ల భవిష్యత్తు తరాలకు పర్యావరణ సమతుల్యత దక్కుతుందని అధికారులు పేర్కొంటున్నారు.