జనవరి 1కి ఫ్యామిలీతో ఉంటారా.. జైల్లో ఉంటారా: సజ్జనార్ వార్నింగ్

హైదరాబాద్ నగర పోలీస్ కమిషనర్ సజ్జనార్ 2025 సంవత్సరానికి సంబంధించిన వార్షిక నేర నివేదికను విడుదల చేశారు. ఈ సందర్భంగా నగరంలో శాంతిభద్రతల పరిస్థితి, నేరాల నియంత్రణ, నూతన సంవత్సర వేడుకల వేళ చేపట్టబోయే భద్రతా చర్యల గురించి ఆయన సవివరంగా వివరించారు. ముఖ్యంగా రాజకీయ విమర్శల నేపథ్యంలో నగర ప్రతిష్టను కాపాడేలా పోలీసు యంత్రాంగం పనిచేస్తోందని ఆయన స్పష్టం చేశారు. గత ఏడాదితో పోలిస్తే హైదరాబాద్ నగరంలో నేరాల సంఖ్య గణనీయంగా తగ్గడం విశేషం.

నగరంలో మొత్తం నేరాల సంఖ్య సుమారు 15 శాతం మేర తగ్గింది. హత్య కేసులు 69కి తగ్గాయి. అలాగే అత్యాచార కేసులు (405), కిడ్నాప్ కేసులు (166) కూడా గతంతో పోలిస్తే తక్కువగా నమోదయ్యాయి. భూమి, ఆస్తికి సంబంధించిన గొడవల కేసులు ఏకంగా 64 శాతం తగ్గుముఖం పట్టాయి. సాంకేతికతను వాడుకుని చేసే నేరాలు 8 శాతం తగ్గాయి. ఇది పోలీసుల అవగాహన కార్యక్రమాల ఫలితంగా భావించవచ్చు. అయితే.. కొన్ని విభాగాల్లో నేరాలు పెరగడం ఆందోళన కలిగిస్తోంది. మహిళలపై నేరాలు 6 శాతం, చిన్నపిల్లలపై దాడులు (పోక్సో కేసులు) 27 శాతం పెరిగాయి. వీటిని అరికట్టడానికి పోలీసు శాఖ మరింత కఠినంగా వ్యవహరిస్తుందని సీపీ తెలిపారు.

న్యూ ఇయర్ వేడుకల సందర్భంగా నగర ప్రజలకు కమిషనర్ హెచ్చరిక జారీ చేశారు. ‘మీరు పండుగను కుటుంబంతో జరుపుకుంటారా లేదా జైల్లో గడుపుతారా అన్నది మీ చేతుల్లోనే ఉంది’ అని ఆయన వ్యాఖ్యానించారు. జనవరి 1వ తేదీ వరకు నగరం అంతటా ప్రత్యేక తనిఖీలు ఉంటాయని.. పట్టుబడితే జైలు శిక్ష తప్పదని హెచ్చరించారు. హోటళ్లు, పబ్‌లు, రెస్టారెంట్లు కచ్చితంగా రాత్రి 1 గంటకు మూసివేయాలి. నిబంధనలు మీరితే లైసెన్సులు రద్దు చేస్తామన్నారు.

ఇదిలా ఉండగా.. నగరాన్ని మాదకద్రవ్యాల రహితంగా మార్చడమే లక్ష్యంగా పోలీసులు పనిచేస్తున్నారు. ఈ ఏడాది మొత్తం 368 కేసుల్లో సుమారు రూ. 6.45 కోట్ల విలువైన డ్రగ్స్‌ను స్వాధీనం చేసుకున్నారు. డ్రగ్స్ సరఫరా చేసే వారిపై నిరంతరం నిఘా ఉంచడానికి 7 ప్రత్యేక బృందాలను ఏర్పాటు చేశారు. సామాజిక భద్రతలో భాగంగా షీ టీమ్స్ ద్వారా 3,817 మందిని రెడ్ హ్యాండెడ్‌గా పట్టుకున్నారు. అలాగే 'ఆపరేషన్ స్మైల్' , 'ఆపరేషన్ ముస్కాన్' ద్వారా వేలాది మంది తప్పిపోయిన.. అనాథ పిల్లలను రక్షించి వారి కుటుంబాలకు లేదా రక్షణ కేంద్రాలకు చేర్చారు.

నగరంలో నేరాల రేటు పెరిగిందంటూ మాజీ ముఖ్యమంత్రి కేసీఆర్ చేసిన వ్యాఖ్యలపై సీపీ సజ్జనార్ స్పందించారు. కేవలం ఒకటి రెండు సంచలన ఘటనలను చూసి నగరం మొత్తం అల్లకల్లోలంగా ఉందని చెప్పడం సరైనది కాదని ఆయన అన్నారు. గణాంకాల ప్రకారం శాంతిభద్రతలు పూర్తిగా అదుపులో ఉన్నాయని.. గతంతో పోలిస్తే శిక్షలు పడే శాతం కూడా పెరిగిందని ఆయన వివరించారు. హైదరాబాద్‌ను సురక్షిత నగరంగా ఉంచేందుకు ప్రభుత్వం , పోలీసులు కట్టుబడి ఉన్నారని ఆయన భరోసా ఇచ్చారు.