తెలంగాణ మున్సిపల్ ఎన్నికలు.. నేటి నుంచే ‘మందు’ బాబులకు షాక్.. వైన్స్, బార్లు బంద్!

తెలంగాణ రాష్ట్రంలో మున్సిపల్ ఎన్నికల నగారా మోగడంతో ప్రచార పర్వం ముగిసింది. అభ్యర్థుల హోరాహోరీ ప్రచారం ముగియడంతో ఇప్పుడు అధికార యంత్రాంగం పోలింగ్ ప్రక్రియపై దృష్టి సారించింది. శాంతిభద్రతల పరిరక్షణలో భాగంగా రాష్ట్ర ఎన్నికల కమిషన్ కీలక నిర్ణయం తీసుకుంది. ఎన్నికలు జరిగే ప్రాంతాల్లో ఎటువంటి అవాంఛనీయ సంఘటనలు జరగకుండా మద్యం అమ్మకాలపై కఠిన ఆంక్షలు విధిస్తూ తాజాగా ఉత్తర్వులు జారీ చేసింది.
ఎన్నికల కమిషన్ ఆదేశాల మేరకు ఈరోజు సాయంత్రం 5 గంటల నుంచే మద్యం దుకాణాలు మూతపడనున్నాయి. కేవలం వైన్ షాపులు మాత్రమే కాకుండా, బార్లు, క్లబ్బులు, కల్లు దుకాణాలు సైతం ఈ నిబంధన పరిధిలోకి వస్తాయని అధికారులు స్పష్టం చేశారు. ఈ నెల 11వ తేదీన పోలింగ్ ముగిసే వరకు ఈ బంద్ కొనసాగనుంది. ఎన్నికల వేళ మద్యం పంపిణీని అరికట్టడానికి, ఓటర్లను ప్రభావితం చేయకుండా ఉండేందుకు పోలీసులు ముమ్మర తనిఖీలు చేపట్టనున్నారు.
పోలింగ్ రోజే కాకుండా, ఓట్ల లెక్కింపు జరిగే 13వ తేదీన కూడా మద్యం దుకాణాలను మూసి ఉంచాలని ప్రభుత్వం నిర్ణయించింది. ఫలితాల వెల్లడి సమయంలో ఉద్రిక్తతలు చోటు చేసుకోకుండా ముందు జాగ్రత్తగా ఈ డ్రై డేలను ప్రకటించారు. అంటే మొత్తం మీద ఈ నెల 11వ తేదీన జరిగే పోలింగ్ ముగిసే వరకు మరియు మళ్లీ 13వ తేదీన ఫలితాలు వచ్చే వరకు మందుబాబులకు చుక్కెదురు కానుంది. నిబంధనలు ఉల్లంఘించే వారిపై కఠిన చర్యలు తీసుకుంటామని ఎక్సైజ్ శాఖ హెచ్చరించింది.
ఈ నెల 11వ తేదీన ఒకే విడతలో మున్సిపల్ ఎన్నికల పోలింగ్ నిర్వహించేందుకు సర్వం సిద్ధమైంది. అభ్యర్థులు తమ అదృష్టాన్ని పరీక్షించుకుంటున్న ఈ తరుణంలో, అధికారులు అత్యంత పటిష్టమైన భద్రతా ఏర్పాట్లు చేస్తున్నారు. ప్రచారం ముగిసిన సమయం నుంచి పోలింగ్ కేంద్రాల వద్ద 144 సెక్షన్ అమలులో ఉంటుందని సమాచారం. ఓటర్లు నిర్భయంగా వచ్చి తమ ఓటు హక్కును వినియోగించుకోవాలని ఎన్నికల అధికారులు కోరుతున్నారు.