జిల్లాకు ఒకటి చొప్పున,,,కార్పొరేట్‌ తరహాలో ప్రీస్కూల్స్.. ప్రతిపాదనలు సిద్ధం

తెలంగాణలో విద్యావ్యవస్థను ప్రక్షాళన చేసేందుకు రేవంత్ ప్రభుత్వం విప్లవాత్మక చర్యలు చేపట్టింది. 'తెలంగాణ ఎడ్యుకేషన్ పాలసీ 2026' ద్వారా నర్సరీ నుంచి ఇంటర్ వరకు ఉచిత, నాణ్యమైన విద్యను అందించటమే లక్ష్యంగా కార్యక్రమాలు రూపొందించింది. ప్రతి నియోజకవర్గంలో కార్పొరేట్ స్థాయిలో తెలంగాణ పబ్లిక్ స్కూల్స్ ఏర్పాటు, యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల నిర్మాణం చేపట్టేందుకు సిద్ధమైంది. విద్యార్థులకు ఉచిత బ్రేక్‌ఫాస్ట్, స్కూల్ కిట్స్ వంటి మౌలిక వసతుల కల్పనపై సర్కార్ ప్రత్యేక దృష్టి సారించింది.

ఇక కార్పొరేట్‌ తరహాలో ప్రీప్రైమరీ స్కూళ్లను నిర్మించాలని రేవంత్ సర్కార్ భావిస్తోంది. తొలి విడతలో జిల్లాకు ఒకటి చొప్పున మెుత్తం 33 స్కూళ్లను నిర్మించనుంది. ఒక్కొక్క స్కూలుకు రూ.30 లక్షలు ఖర్చు చేయనుంది. ఈ మేరకు ఇప్పటికే శిశు సంక్షేమశాఖ ప్రతిపాదనలు కూడా సిద్ధం చేసింది. రాష్ట్రవ్యాప్తంగా 11,616 అంగన్‌వాడీల్లో మౌలిక సదుపాయాలు సైతం సమకూర్చనుంది. అందుకు ఒక్కో కేంద్రానికి రూ.2 లక్షలు ఖర్చు చేయనుంది. ఇదే కాకుండా ఆరోగ్య లక్ష్మి పథకంలో భాగంగా తెలంగాణ పోషణ పథం పేరిట అంగన్వాడీల్లోని చిన్నారులు, బాలికలు, గర్భిణులు, బాలింతల కోసం ప్రత్యేక కార్యక్రమాలు రూపొందించనుంది.

14-18 ఏళ్ల మధ్య వయసున్న కౌమార బాలికల్లో పోషకాహారలోపం, రక్తహీనత నివారించేందుకు ఏడాదిలో 100 రోజుల ప్రణాళిక అమలు చేయనుంది. ప్రత్యేక న్యూట్రీషియన్‌ ప్యాకేజీ కింద వారికి మల్టీమిల్లెట్‌ చిక్కీ, ఇన్‌స్టంట్‌ మిక్స్‌, ఉప్మా, కిచిడీ అందిస్తారు. ప్రీస్కూల్‌ విద్యార్థులకు స్కూల్‌ బ్యాగులు, బెల్ట్, బూట్లు, సాక్సులు అందించనున్నారు. ఏడాదికి 300 రోజులు 100 మి.లీ పాలు, 25 గ్రాముల అల్పాహారం అంగన్‌వాడీ కేంద్రంలోనే ఇవ్వనున్నారు. బాలామృతం, బాలామృతం ప్లస్‌ ఫార్ములేషన్‌లో మరిన్ని మైక్రో న్యూట్రియెంట్లు ఉండేలా చర్యలు తీసుకోనున్నారు.

హైదరాబాద్, రంగారెడ్డి, మేడ్చల్‌ జిల్లాల్లో అంగన్‌వాడీలులేని పట్టణ, మురికి వాడల్లో రూ.4 కోట్లతో 274 మొబైల్‌ అంగన్‌వాడీ కేంద్రాలు ఏర్పాటు చేయనున్నారు. అద్దె భవనాల్లోని అంగన్‌వాడీలకు శాశ్వత భవనాలతో పాటు జిల్లాల్లో 70 శిశు సంక్షేమ ప్రాజెక్టులకు కార్యాలయాలు నిర్మించనున్నారు. ప్రీప్రైమరీ టీచర్లకు ఇంటర్‌తో పాటు రెండేళ్ల డిప్లొమా అర్హతగా నిర్ణయించారు. ఈ నేపథ్యంలో అంగన్‌వాడీ టీచర్లకు నూతన విద్యావిధానం కింద సర్టిఫికేషన్‌ కోర్సులు ప్రవేశపెట్టేందుకు సర్కార్ సిద్ధమైంది.