ఎస్‌బీఐలో బెస్ట్ స్కీమ్.. 7.5 శాతం వడ్డీ.. రూ.5 లక్షలు జమ చేస్తే ఎంతొస్తుంది

దేశీయ అతి పెద్ద ప్రభుత్వ రంగ బ్యాంకైన స్టేట్ బ్యాంక్ ఆఫ్ ఇండియా (ఎస్బీఐ)లో డబ్బులు దాచుకోవడం ద్వారా సురక్షితంగా ఉంటాయని చాలా మంది భావిస్తారు. ఎలాంటి డిపాజిట్లు చేయాలన్నా ముందుగా ఎస్‌బీఐ వైపే మొగ్గు చూపుతారు. ప్రజల్లో ఈ బ్యాంకుపై మంచి విశ్వాసం ఉంది. అదే స్థాయిలో బ్యాంకు సైతం వివిధ సేవలు అందిస్తుంటుంది. హామీతో కూడిన రాబడులు పొందాలని అనుకుంటున్న వారు స్టేట్ బ్యాంకులో పెట్టుబడి పెట్టవచ్చు. ప్రస్తుతం రూ. 2 కోట్ల లోపు ఉండే ఫిక్స్‌డ్ డిపాజిట్లపై మంచి వడ్డీ రేట్లు ఆఫర్ చేస్తోంది.

 స్టేట్ బ్యాంక్ ఆఫ్ ఇండియాలో 7 రోజుల నుంచి 10 సంవత్సరాల టెన్యూర్ కలిగిన టర్మ్ డిపాజిట్లపై జనరల్ కస్టమర్లకు 3. 5 శాతం నుంచి 7 శాతం వరకు వడ్డీ అందిస్తోంది. అలాగే సీనియర్ సిటిజన్లకు 4 శాతం నుంచి 7. 5 శాతం వరకు వడ్డీ ఆఫర్ చేస్తోంది. జనరల్ కస్టమర్లతో పోల్చితే సీనియర్ సిటిజన్లకు అదనంగా 50 బేసిస్ పాయింట్ల మేర వడ్డీ రేటును అందిస్తోంది ఎస్‌బీఐ. ప్రస్తుతం బ్యాంకు 2-3 ఏళ్ల మెచ్యూరిటీ టెన్యూర్ కలిగిన ఫిక్స్‌డ్ డిపాజిట్లపై సాధారణ ఖాతాదారులకు 7 శాతం, సీనియర్ సిటిజన్లకు 7. 5 శాతం మేర గరిష్ఠ వడ్డీ రేటు కల్పిస్తోంది.

3 ఏళ్ల టెన్యూర్‌పై రూ.5 లక్షలు డిపాజిట్ చేస్తే ఎంతొస్తుంది?

3 సంవత్సరాల మెచ్యూరిటీ టెన్యూర్ కోసం సాధారణ ఖాతాదారులు రూ. 5 లక్షలు డిపాజిట్ చేశారు అనుకుందాం. వారికి ప్రస్తుతం 7 శాతం వడ్డీ రేట్లు ఇస్తోంది ఎస్‌బీఐ. ఆన్‌లైన్ ఎఫ్‌డీ కాలిక్యూలేటర్ ప్రకారం మెచ్యూరిటీ నాటికి ఎంతొస్తుందో ముందే తెలుసుకోవచ్చు. సాధారణ కస్టమర్లకు 3 ఏళ్ల తర్వాత వడ్డీ రూపంలో రూ. 1,15,720 వరకు వస్తాయి. అంటే మొత్తంగా రూ. 6,15,720 వస్తాయి. అలాగే సీనియర్ సిటిజన్లకు రూ. 5 లక్షలు డిపాజిట్ చేస్తే వారికి వడ్డీ రేటు 7. 5 శాతంగా ఉంటుంది. దీని ప్రకారం చూసుకుంటే మెచ్యూరిటీ తర్వాత వారికి వడ్డీగా రూ.1,24,858 అందుతాయి. మొత్తంగా మెచ్యూరిటీ తర్వాత రూ. 6,24, 858 చేతికి వస్తాయి.