పీఎఫ్ విత్‌డ్రా చేస్తున్నారా? వారికి ఆ అవసరం లేకుండానే చేతికి డబ్బులు.. కొత్త రూల్స్ ఇవే

 ప్రైవేట్ ఉద్యోగం చేసే ప్రతి ఒక్కరికీ పీఎఫ్ అకౌంట్  ఉంటుందన్న సంగతి తెలిసిందే. అదే ప్రభుత్వ ఉద్యోగులకు అయితే జనరల్ ప్రావిడెంట్ ఫండ్ ఉంటుంది. ఈపీఎఫ్ విషయానికి వస్తే.. 20 కి పైగా ఉద్యోగులు ఉన్న సంస్థకు ఇది వర్తిస్తుంది. ఉద్యోగి వేతనంలో నుంచి సంస్థ 12 శాతం ఈపీఎఫ్ అకౌంట్‌కు జమ చేస్తుంది. సంస్థ కూడా అంతే మొత్తం యాడ్ చేయాలి. దీనికి కేంద్రం వడ్డీ జమ చేస్తుంటుంది. ఇక ఉద్యోగం మానేసిన సమయంలో లేదా రిటైర్మెంట్ సమయంలో పీఎఫ్ డబ్బుల్ని మొత్తం తీసుకోవచ్చు. ఇంకా కొన్ని ప్రత్యేక అవసరాల్లో వైద్య ఖర్చులకు, పెళ్లి కోసం, హౌసింగ్ వంటి వాటి కోసం పాక్షికంగా డబ్బుల్ని తీసుకోవచ్చు. ఈ విత్‌డ్రా కోసం కొన్ని నియమాలు ఉంటాయి.

అయితే పీఎఫ్ డబ్బుల్ని తీసుకునేటప్పుడు.. ఆధార్ సీడింగ్ తప్పనిసరిగా చేసుండాలన్న రూల్ ఉంది. ఈపీఎఫ్ మెంబర్స్ డెత్ క్లెయిమ్స్‌కు సంబంధించి ఇది కష్టతరంగా ఉంది. డెత్ క్లెయిమ్ సమయంలో ఆధార్ సీడింగ్ ధ్రువీకరణ కష్టమైన నేపథ్యంలో.. బాధిత కుటుంబ సభ్యులు పీఎఫ్ డబ్బుల్ని పొందడం ఆలస్యం అవుతుందని ఈపీఎఫ్ఓ గుర్తించింది. ఈ మేరకు తాజాగా 2024, మే 17న ఒక సర్క్యులర్ జారీ చేసింది. ఇప్పుడు ఇలాంటి పరిస్థితుల్లో ఆధార్ సీడింగ్ అవసరం లేకుండానే.. ఫిజికల్ క్లెయిమ్స్ చేయొచ్చని స్పష్టం చేసింది.

పీఎఫ్ సభ్యుడు మరణించిన తర్వాత.. ఆధార్ వివరాల్ని అప్డేట్ చేయడం లేదా సరిదిద్దడం సాధ్యం కాదని ఈపీఎఫ్ఓ గుర్తించింది. ప్రస్తుతం ఫీల్డ్ ఆఫీసులకు ఇదే సవాళ్లను విసురుతున్న నేపథ్యంలో తాజా ఆదేశాల్ని జారీ చేసింది. దీంతో.. ఇకపై డెత్ క్లెయిమ్స్‌కు సంబంధించి.. పీఎఫ్ డబ్బులు త్వరగా అందనున్నాయి.

ఇప్పటివరకు డెత్ క్లెయిమ్స్ విషయంలో.. ఆధార్‌లో అసంపూర్తిగా/కచ్చితత్వంకాని విధంగా సభ్యుల వివరాలు ఉండటం, ఆధార్ డీయాక్టివేట్ అవడం వంటి సందర్భాల్లో లేదా.. యూఐడీఏఐ డేటాబేస్ నుంచి సాంకేతిక లోపం కారణంగా ఆధార్ ధ్రువీకరించడంలో ఇబ్బందులు ఎదురవడం వంటి పరిస్థితుల వల్ల విత్‌డ్రా ఆలస్యం అవుతుంది. అయినప్పటికీ ప్రస్తుత పరిస్థితుల్లో తాత్కాలిక చర్యగా.. ఈ ఆధార్ సీడింగ్ ఇలాంటి కేసులకు అవసరం లేదని గుర్తించింది.

ఇక పైసూచనలు అనేవి.. యూఏఎన్‌లో సభ్యుని వివరాలు సరిగా ఉండి కూడా.. ఆధార్ డేటాబేస్‌లో మాత్రం అసంపూర్తిగా ఉన్నప్పుడు మాత్రమే వర్తిస్తాయని గుర్తుంచుకోవాలి. డెత్ క్లెయిమ్ కాకుండా.. పెళ్లి, హౌసింగ్ (నిర్మాణం లేదా మరమ్మత్తులు), వైద్య ఖర్చుల వంటి వాటి కోసం పాక్షికంగా రూ. లక్ష వరకు పీఎఫ్ డబ్బులు తీసుకోవచ్చు.