రష్యా-ఉక్రెయిన్ యుద్ధంలో సంచలనం.. మాస్కోపై 34 డ్రోన్లతో భారీ దాడి

గత 32 నెలలుగా కొనసాగుతోన్న యుద్ధంలో రష్యా, ఉక్రెయిన్‌లు పరస్పరం భీకర దాడులు చేసుకుంటున్నాయి. ఈ యుద్ధంలో ఇరు దేశాలకు భారీ ప్రాణ, ఆస్తినష్టం వాటిల్లింది. ఈ క్రమంలో తాజాగా రష్యాను ఉక్రెయిన్ చావుదెబ్బ కొట్టింది. రాజధాని మాస్కో నగరంపై ఆదివారం భారీ దాడి చేసింది. ఏకంగా 34 డ్రోన్లతో కీవ్ విరుచుకుపడింది. యుద్ధం మొదలైన తర్వాత మాస్కోపై ఇంతటి స్థాయిలో ఉక్రెయిన్ డ్రోన్ దాడి చేయడం ఇదే మొదటిసారి. ఈ దాడితో మాస్కోలోని మూడు విమానాశ్రయాల నుంచి విమానాలను దారి మళ్లించారు. కీవ్ డ్రోన్ దాడిలో కనీసం ఒకరు గాయపడ్డారు.

  పశ్చిమ ప్రాంతంలో మరో 36 డ్రోన్లను గగనతల రక్షణ వ్యవస్థ అడ్డుకుని, కూల్చివేసినట్టు రష్యా రక్షణ శాఖ ప్రకటించింది. ‘విమానం మాదిరి డ్రోన్లలో కీవ్ పాలకులు చేసిన ఉగ్రదాడి ప్రయత్నాలను రష్యా విజయవంతంగా అడ్డుకుంది’ అని పేర్కొంది. మాస్కో నగరంలోని డోమోడెడోవో, షెరెమెటీవో, జుకోవ్స్కీ విమానాశ్రయాల నుంచి కనీసం 36 విమానాలను మళ్లించినట్టు రష్యా విమానయాన విభాగం ప్రకటించింది. కానీ, కొద్ది సేపటికే కార్యకలాపాలు ప్రారంభించామని, డ్రోన్ దాడిలో ఒకరు గాయపడ్డారని తెలిపింది.

మాస్కో, దాని చుట్టుపక్కల కనీసం 21 మిలియన్ల మంది జనాభా ఉంది. ఐరోపాలో ఇస్తాంబుల్‌తో పాటు అతిపెద్ద మెట్రోపాలిటిన్ నగరాల్లో మాస్కో ఒకటి. అటు, తమపై రాత్రికి రాత్రే రష్యా ఏకకాలంలో 145 డ్రోన్లు ప్రయోగించినట్టు ఉక్రెయిన్ ఆరోపించింది. వాటిలో 62 డ్రోన్లను తమ గగనతల రక్షణ వ్యవస్థలు కూల్చివేశాయని పేర్కొంది. రష్యాలోని బ్రయాస్కీ ప్రాంతంలో ఆయుధ డిపోపై దాడి చేసినట్లు ఉక్రెయిన్ తెలిపింది, ఈ ప్రాంతంలో 14 డ్రోన్లు కూల్చివేసినట్లు నివేదించింది. రష్యా టెలిగ్రామ్ ఛానల్‌లో పోస్ట్ చేసిన ధ్రువీకరించిన వీడియోలో ఆకాశంలో డ్రోన్‌లు ఎగురుతుండటం కనిపిస్తోంది.

రెండున్నరేళ్లకుపైగా కొనసాగుతోన్న యుద్ధంలో తొలినాళ్లలో మాస్కో బలగాలు అత్యంత వేగంగా ఉక్రెయిన్ ప్రాంతాల్లోకి చొచ్చుకెళ్లాయి. కానీ, కొద్ది రోజుల తర్వాత రష్యా బలగాలకు ఊహించని ప్రతిఘటన ఎదురయ్యింది. కీవ్ కూడా శక్తివంతమైన రష్యా సైన్యాలను దీటుగా ఎదుర్కొంటోంది. కాగా, అమెరికా ఎన్నికల్లో డొనాల్డ్ ట్రంప్ విజయం సాధించడంతో యుద్ధానికి ముగింపు పలుకుతారనే అభిప్రాయం వ్యక్తమవుతోంది. తాను అధ్యక్షుడ్ని అయితే యుద్ధాన్ని ఆపుతానని ఎన్నికల ప్రచారంలో ట్రంప్ హామీ ఇచ్చారు. ఆయన విజయం సాధించి, జనవరిలో అధ్యక్ష బాధ్యతలు చేపట్టనున్నారు. ఈ క్రమంలో రష్యా అధ్యక్షుడు వ్లాదిమిర్ పుతిన్, ఉక్రెయిన్ పాలకుడు వొలిడిమిర్ జలెన్‌స్కీతో ట్రంప్ చర్చలు జరిపి.. శాంతికి బాటలు వేస్తారని తెలుస్తోంది.