రైల్వే స్టేషన్‌లో బాంబు పేలుడు.. 21మంది మృతి, 46 మందికి గాయాలు

 పాకిస్తాన్‌లో మరోసారి భారీ బాంబు పేలుడు చోటు చేసుకుంది. బలూచిస్తాన్ ప్రావిన్స్‌లోని క్వెట్టా రైల్వే స్టేషన్‌ సమీపంలో ఈ పేలుడు జరిగినట్లు స్థానిక అధికారులు వెల్లడించారు. ఈ ఘటనలో 21 మంది స్థానికులు దుర్మరణం పాలయ్యారు. మరో 46 మందికి గాయాలు అయ్యాయి. బాంబు పేలుడు సమయంలో ఘటనా స్థలంలో 100 మంది ఉన్నట్లు తెలుస్తోంది. అయితే ఈ బాంబు పేలుడుకు ఇప్పటివరకు ఏ ఉగ్రవాద సంస్థ బాధ్యత తీసుకోలేదు. క్వెట్టా రైల్వే స్టేషన్ నుంచి రైలు పెషావర్‌కు వెళ్తుండగా.. ఈ బాంబు పేలుడు జరిగినట్లు స్థానిక అధికారులు వెల్లడించారు. అయితే ఇది ఆత్మాహుతి బాంబు అని అధికారులు ప్రాథమికంగా నిర్ధారించారు.

క్వెట్టా రైల్వేస్టేషన్‌లో బాంబు పేలుడుతో బాంబు డిస్పోజల్ స్క్వాడ్ రంగంలోకి దిగి.. సంఘటనా స్థలంలో ఆధారాలు సేకరించిటన్లు బలూచిస్థాన్ ప్రభుత్వ ప్రతినిధి వెల్లడించారు. ఈ పేలుడును ఆత్మాహుతి దాడిగా భావిస్తున్నట్లు క్వెట్టా సీనియర్‌ సూపరింటెండెంట్‌ ఆఫ్‌ పోలీస్‌ మహ్మద్‌ బలోచ్‌ పేర్కొన్నారు. ఈ ఘటనపై దర్యాప్తు చేపట్టినట్లు ఆయన తెలిపారు. ఘటనాస్థలికి చేరుకుని పోలీసులు, భద్రతా దళాలు సహాయక చర్యలు చేపట్టినట్లు వివరించారు.

క్వెట్టా నుంచి పెషావర్ వెళ్లే జాఫర్ ఎక్స్‌ప్రెస్ రైలు.. ఉదయం 9 గంటలకు బయల్దేరేందుకు.. ప్లాట్‌ఫామ్‌పైకి రాకముందే రైల్వే స్టేషన్ బుకింగ్ కార్యాలయంలో ఈ భారీ పేలుడు సంభవించినట్లు ప్రాథమిక నివేదికలు సూచిస్తున్నాయని పాకిస్తాన్ జియో న్యూస్ నివేదించింది. బాంబు పేలుడు సమయంలో రైల్వే స్టేషన్‌లో భారీగా ప్రయాణికులు ఉండటంతో మరింత మంది ప్రాణాలు కోల్పోయే అవకాశాలు ఉన్నాయని స్థానిక మీడియా వెల్లడించింది.