ఏపీపై అల్పపీడనం ప్రభావం.. ఈ జిల్లాల్లో భారీ వర్షాలు, వాతావరణశాఖ హెచ్చరిక

ఆంధ్రప్రదేశ్‌లో వర్షాలు కొనసాగుతున్నాయి. బంగాళాఖాతంలో ఏర్పడిన అల్పపీడనం ఉత్తర తమిళనాడు, దక్షిణ కోస్తాలో తీరాల వెంబడి కేంద్రీకృతమై ఉందని ఐఎండీ (భారత వాతావరణ విభాగం) తెలిపింది. ఈ ప్రభావంతో ఇవాళ, గురువారాల్లో అక్కడక్కడా భారీ వర్షాలు, మిగిలినచోట్ల తేలికపాటి నుంచి ఓ మోస్తరు వర్షాలు పడే అవకాశం ఉందని అంచనా వేస్తున్నారు. నేడు బాపట్ల, ప్రకాశం, శ్రీపొట్టి శ్రీరాములు నెల్లూరు, తిరుపతి, చిత్తూరు, అన్నమయ్య జిల్లాల్లో కొన్ని ప్రాంతాల్లో ఓ మోస్తరు నుంచి భారీ వర్షాలు కురుస్తాయని చెబుతున్నారు.

 గుంటూరు, అనంతపురం, శ్రీ సత్యసాయి, కడప జిల్లాల్లోని కొన్ని ప్రాంతాల్లో తేలికపాటి వర్షాలు కురిసే అవకాశం ఉందని విపత్తుల నిర్వహణ సంస్థ ఎండీ రోణంకి కూర్మనాథ్‌ తెలిపారు. వర్షాల అలర్ట్‌తో వరి కోతలు, ఇతర వ్యవసాయ పనుల్లో రైతులు తగిన జాగ్రత్తలు తీసుకోవాలని సూచించారు. రైతులు పంట పొలాల్లో నిలిచిన అదనపు నీటిని బయటకు పోయేలా ఏర్పాట్లు చేసుకోవాలన్నారు. పండించిన ధాన్యాన్ని సురక్షిత ప్రదేశాలలో ఉంచాలని, ఉద్యానవన పంట మొక్కలు/చెట్లు పడిపోకుండా సపోర్టు అందించాలని కోరారు.. ప్రజలు అప్రమత్తంగా ఉండాలని విజ్ఞప్తి చేసారు.

ప్రకాశం జిల్లాలో మంగళవారం వాతావరణం మారిపోయింది.. వర్షాలు కురిశాయి. తూర్పుప్రాంతంలో ఒకమోస్తరు వాన పడింది. జిల్లాలో జరుగుమల్లి మండలంలో 16.4మి.మీ, సింగరాయకొండలో 16.0మి.మీ, ఒంగోలులో 12.8మి.మీ, కొత్తపట్నంలో 10.0 మి.మీ వర్షపాతం నమోదైంది. ఒంగోలు, కొండపి, సంతనూతలపాడు నియోజకవరాల్లోని పలు మండలాల్లో తేలికపాటి వర్షం పడింది. మరో రెండు రోజులపాటు జిల్లాలో వర్షాలు కురిసే అవకాశం ఉన్నట్లు వాతావరణ శాఖ చెబుతోంది.

ఉమ్మడి పశ్చిమ గోదావరి జిల్లాలో వర్షాలు రైతుల్ని భయపెడుతున్నాయి. రోడ్ల పక్కన ధాన్యం ఆరబెట్టుకుంటున్నారు.. ఇప్పటికే తుఫాన్ ప్రభావంతో రైతులు ఆందోళనలో ఉన్నారు. కొంత నష్టమైనా తప్పని పరిస్థితుల్లో ధాన్యం బయట వ్యక్తులకు అమ్ముకోవాల్సి వస్తోంది అంటున్నారు. కొందరు అవకాశం ఉన్న మేరకు ధాన్యం అమ్మేయగా.. మరికొంత ధాన్యం రోడ్లపైనే గుట్టలుగా ఉంచారు. చిన్నవర్షానికి రైతులు బరకాలు తీసుకుని కళ్లాల దగ్గరకు వెళ్లారు.. వర్షం పెద్దది కాకపోవడంతో ఊపిరి పీల్చుకున్నారు. కాని ఆరబోసిన ధాన్యంపై బరకాలు కప్పుకునేలోగా ధాన్యం తడిచిపోయింది. వర్షం వెలిసిన తర్వాత మళ్లీ ధాన్యం ఎండబెట్టుకున్నారు. మంగళవారం ఉదయం నుంచి మబ్బులు, మేఘాలతో వాతావరణం కనిపించింది. గంటపాటు కురిసిన భారీ వర్షానికి పల్లపు ప్రాంతాలు, మెయిన్ రోడ్లు నీట మునిగాయి. అయితే ఖరీఫ్‌ పంటలు చేతికి అందే సమయం కావడంతో ఈ వర్షాలతో పంటలకు నష్టం వాటిల్లుతుందనే ఆందోళన రైతుల్లో ఉంది. ఈ ఏడాది వరుసగా అల్పపీడనాలతో విస్తారంగా వర్షాలు పడ్డాయి. రాయలసీమ జిల్లాల్లో మినహా కోస్తాంధ్ర జిల్లాల్లో సగటు కంటే అధికంగా వర్షపాతం నమోదైంది.