సీక్రెట్‌గా వారసుడి ఎంపిక కానిచ్చేసిన ఖమేనీ.. ఇరాన్ కొత్తం సుప్రీం అతడే

ఇరాన్ సుప్రీం నేత అయాతుల్లా అలీ ఖమేనీ ఆరోగ్యం గురించి ఇటీవల పలు కథనాలు వెలువడ్డాయి. అనారోగ్యానికి గురైన ఆయనకు శస్త్రచికిత్సను ఇంటి వద్దే నిర్వహించారని, ఖమేనీ పరిస్థితి విషమించిందని ప్రచారం జరిగింది. ఖమేనీ స్థానంలో సుప్రీం నాయకుడుగా ఎవర్ని నియమిస్తారనే ప్రశ్నలు ఉత్పన్నమయ్యాయి. ఈ క్రమంలో ఇరాన్‌లో కీలక పరిణామం చోటుచేసుకుంది. సుప్రీం నేతగా తన రెండో కుమారుడు మోజ్తాబా ఖమేనీ ని అయాతుల్లా నియమించిన్నట్లు సమాచారం. ఇది దాదాపు రెండు నెలల కిందటే నిర్ణయించారని, కానీ, ఈ విషయాన్ని అత్యంత గోప్యంగా ఉంచాలని ఇరాన్ అధికారులకు హెచ్చిరించినట్లు తెలుస్తోంది.

  ఇజ్రాయేల్‌ మీడియా కథనాల ప్రకారం.. సెప్టెంబరు 26న 60 మంది జాతీయ అసెంబ్లీ సభ్యులతో సమావేశం నిర్వహించిన ఖమేనీ.. ఆ సమయంలో మోజ్తాబాను తన వారసుడిగా నియమిస్తున్నట్లు పేర్కొన్నారు. కానీ, ఈ నిర్ణయాన్ని మొదట కొందరు వ్యతిరేకించినా ఆ తర్వాత ఏకగ్రీవంగా అంగీకరించినట్లు తెలుస్తోంది. మరోవైపు, ఈ విషయాన్ని అత్యంత రహస్యంగా ఉంచాలని, లీక్‌లకు పాల్పడితే తీవ్ర పరిణామాలు ఉంటాయని వారిని హెచ్చరించిన్నట్లు సమాచారం. ఈ సమావేశానికి ముందు ఎటువంటి ముందస్తు నోట్ కూడా ఇవ్వకుండా అత్యవసరంగా నిర్వహించినట్టు భోగట్టా. ఇరాన్‌లో నెలకొన్న ఆందోళనకర పరిస్థితుల నేపథ్యంలో ప్రస్తుత ప్రభుత్వంపై తీవ్ర వ్యతిరేకత వ్యక్తమవుతోంది. ఈ కారణంగానే మోజ్తాబా నియామకాన్ని రహస్యంగా ఉంచినట్లు అధికార వర్గాలు పేర్కొన్నాయి.

సజావుగా పరివర్తన జరిగేలా చూసేందుకు తాను ప్రాణాలతో ఉన్నప్పుడే మొజ్తాబాకు పగ్గాలు అప్పగించాలని యోచిస్తున్నట్లు మీడియా నివేదిక పేర్కొంది. ఇది కూడా ఆయన మరణానంతరం తలెత్తే వ్యతిరేకతను నివారించడమేనని తెలిపింది. కాగా, 1989లో రుహోల్లా ఖొమేనీ మరణం తర్వాత ఆ దేశ సుప్రీం నాయకుడిగా అలీ ఖమేనీ బాధ్యతలు స్వీకరించారు. ప్రస్తుతం ఆయనకు 85 ఏళ్లు. వాస్తవానికి ఆయన వారసుడిగా భావించిన ఇబ్రహీం రైసీ ఇటీవల హెలికాప్టర్‌ ప్రమాదంలో మరణించారు. ఇటీవల ఇజ్రాయేల్ దాడికి ప్రతీకారంపై ఇరాన్ కొంత వెనుకడగు వేసింది. మిత్రపక్షాల శక్తి సన్నగిల్లడం, ఆర్ధిక వ్యవస్థ దెబ్బతినడం, ఖమేనీ ఆరోగ్యం విషమించడంతో వారసుడి ఎంపిక వంటి ఇబ్బందులతో ఇరాన్ డైలామాలో ఉంది.