ఈ నెల 29న విశాఖకు మోదీ.. నేరవేరబోతున్న ఏపీవాసుల పదేళ్ల కల!

ప్రధాన మంత్రి నరేంద్ర మోదీ విశాఖ పర్యటన ఖరారైంది. అయితే, ప్రధాని కార్యాలయం నుంచి దీనిపై అధికారిక ప్రకటన మాత్రం వెలువడాల్సి ఉంది. నవంబరు 29న మోదీ విశాఖ నగరానికి రానున్నారు. ఐఎన్ఎస్ డేగాలో విశాఖ విమానాశ్రయానికి చేరుకుని.. అక్కడ నుంచి ఎన్ఏడీ మీదుగా రోడ్‌షో నిర్వహిస్తారు. సాయంత్రం 4.30 గంటలకు ఆంధ్ర యూనివర్సిటీ ఇంజినీరింగ్‌ కాలేజీ గ్రౌండ్‌లో జరిగే బహిరంగ సభలో పాల్గొంటారు. ఆ వేదిక నుంచి అనకాపల్లి జిల్లా అచ్యుతాపురం మండలం పూడిమడకలో ఎన్టీపీసీ నిర్మించే గ్రీన్‌ హైడ్రోజన్‌ హబ్, మరికొన్ని ప్రాజెక్టులకు మోదీ శంకుస్థాపన చేయనున్నట్లు తెలుస్తోంది. మొత్తం రూ.85 వేల కోట్ల పెట్టుబడితో 25 వేల మందికి ఉపాధి లభించే ఈ ప్రాజెక్టుతో విశాఖ ప్రతిష్ట మరింత పెరగనుంది.

విశాఖను గ్రోత్ హబ్‌గా ప్రకటించిన కేంద్రం.. ఆ మేరకు కార్యాచరణ చేపట్టింది. ఇక, ఏపీ వాసులను పదేళ్లుగా ఊరిస్తోన్న రైల్వే జోన్‌కూ ప్రధాని మోదీ శంకుస్థాపన చేయనున్నారు. ఉమ్మడి ఆంధ్రప్రదేశ్ విభజన చట్టంలో విశాఖ కేంద్రంగా రైల్వే జోన్ ప్రకటించిన విషయం తెలిసిందే. రాష్ట్ర విభజన జరిగి పదేళ్లు గడిచినా జోన్‌ ఇంత వరకూ కార్యరూపం దాల్చలేదు. దీనిపై కొద్ది నెలలుగా కదలిక వచ్చింది. రాష్ట్ర ప్రభుత్వం భూముల కేటాయింపులు చేసింది. ప్రధాని పర్యటన నేపథ్యంలో అధికారులు, జిల్లా యంత్రాంగం ముమ్మర ఏర్పాట్లు చేస్తున్నారు. ఏయూలో ఈ నెల 27, 28, 29 తేదీల్లో జరగాల్సిన బీఈ, బీటెక్, బీఆర్క్‌ పరీక్షలను నవంబర్‌ 30, డిసెంబర్‌ 2, 3 తేదీలకు వాయిదా వేశారు.

పూడిమడకలో రూ.85 వేల కోట్ల పెట్టుబడితో నెలకొల్పనున్న పుననరుత్పాదక ఇంధన ప్రాజెక్టు ద్వారా ప్రత్యక్షంగా, పరోక్షంగా 25వేల మందికి ఉపాధి లభింననుంది. 2032 నాటికి ఈ ప్లాంట్ నుంచి 60 గిగావాట్ల విద్యుత్తు ఉత్పత్తే లక్ష్యంగా పెట్టుకున్నారు. అక్కడ ఉత్పత్తయ్యే విద్యుత్తులో అధిక భాగం రాష్ట్ర అవసరాలకు వినియోగించుకోవాలనే ఉద్దేశంతో ముఖ్యమంత్రి చంద్రబాబు ఇందులో 50 శాతం వాటాను ఏపీజెన్‌కోతో పెట్టించాలని నిర్ణయించారు. దీంతో ఎన్టీపీసీ, జెన్‌కో సంయుక్త భాగస్వామ్యంతో ఈ ప్రాజెక్టు పట్టాలెక్కిస్తున్నారు.