ఢిల్లీ లిక్కర్ కేసులో మనీష్ సిసోడియాకు బిగ్ రిలీఫ్.. అసెంబ్లీ ఎన్నికల వేళ కీలక పరిణామం

ఢిల్లీ మద్యం పాలసీ కేసు దేశవ్యాప్తంగా తీవ్ర సంచలనం సృష్టించిన విషయం తెలిసిందే. ఇక ఢిల్లీలో అధికారంలో ఉన్న ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్, సీనియర్ నేతలు ఢిల్లీ మంత్రులుగా పనిచేసిన మనీష్ సిసోడియా, సత్యేందర్ జైన్ సహా ఎంపీలు, ఎమ్మెల్యేలు, ఇతర నేతలతోపాటు బీఆర్ఎస్ ఎమ్మెల్సీ కల్వకుంట్ల కవిత, వైసీపీ మాజీ ఎంపీ మాగుంట శ్రీనివాసులు రెడ్డి కుమారుడు మాగుంట రాఘవ సహా ఎంతో మంది జైలుకెళ్లి బెయిల్‌పై బయటికి వచ్చారు. అయితే సీబీఐ, ఈడీ వంటి కేంద్ర దర్యాప్తు సంస్థలు ఈ ఢిల్లీ లిక్కర్ పాలసీ కేసులో విచారణ జరుపుతున్నాయి. ఈ నేపథ్యంలోనే తాజాగా మనీష్ సిసోడియాకు భారీ ఊరట లభించింది.

ఢిల్లీ మాజీ ఉప ముఖ్యమంత్రి మనీష్ సిసోడియా బెయిల్ షరతులను సడలిస్తూ సుప్రీంకోర్టు ఉత్తర్వులు ఇచ్చింది. ఢిల్లీ లిక్కర్ కేసులో భాగంగా వారానికి రెండుసార్లు సీబీఐ, ఎన్‌ఫోర్స్‌మెంట్ డైరెక్టరేట్ కార్యాలయాలకు హాజరుకావాల్సిన అవసరం లేదని బుధవారం స్పష్టం చేసింది. ఢిల్లీ ఎక్సైజ్ పాలసీ కేసులో అవినీతి, మనీలాండరింగ్ కేసులకు సంబంధించి మనీష్ సిసోడియాకు ఆగస్టు 9వ తేదీన ఇచ్చిన బెయిల్ షరతులను సవరిస్తున్నట్లు తెలిపింది. అయితే ఈ ఉత్తర్వులు సీబీఐ, ఈడీ కేసులకు మాత్రమే వర్తిస్తుందని.. అయితే ఇప్పటికీ ట్రయల్ కోర్ట్ ప్రొసీడింగ్‌లకు మనీష్ సిసోడియా క్రమం తప్పకుండా హాజరు కావాల్సి ఉంటుందని అత్యున్నత న్యాయస్థానం స్పష్టం చేసింది.

ఇప్పటికే 60 సార్లు సీబీఐ, ఈడీ అధికారుల ముందు మనీష్ సిసోడియా హాజరై బెయిల్ షరతులను పాటించారని నవంబర్ 22వ తేదీన వాదనల సందర్భంగా ఆయన తరఫు లాయర్ అభిషేక్ మను సింఘ్వీ పేర్కొనగా.. తాజాగా సుప్రీంకోర్టు నిర్ణయం తీసుకుంది. 2021-22కి సంబంధించి ఢిల్లీ లిక్కర్ పాలసీ రూపకల్పనలో అవకతవకలు జరిగాయన్న ఆరోపణలపై మనీష్ సిసోడియాను గతేడాది ఫిబ్రవరి 26వ తేదీన సీబీఐ అరెస్ట్ చేయగా.. అదే ఏడాది మార్చి 9వ తేదీన మనీలాండరింగ్ కేసులో ఈడీ అరెస్టు చేసింది. దీంతో గతేడాది ఫిబ్రవరి 28వ తేదీన ఢిల్లీ డిప్యూటీ సీఎం పదవికి మనీష్ సిసోడియా రాజీనామా చేశారు. ఇక 17 నెలల జైలు జీవితం తర్వాత.. ఈ ఏడాది ఆగస్ట్ 9వ తేదీన సుప్రీంకోర్టు మనీష్ సిసోడియాకు బెయిల్ మంజూరు చేసింది.

ఇక ఫిబ్రవరిలో ఢిల్లీ అసెంబ్లీ ఎన్నికలు జరగనున్నాయి. 2013 నుంచి ఢిల్లీలోని పట్పర్‌గంజ్‌ నియోజకవర్గం తరఫున ప్రాతినిథ్యం వహిస్తున్న మనీష్ సిసోడియాను ఆప్ హైకమాండ్ ఈసారి స్థాన చలనం కల్పించింది. జంగ్‌పురా స్థానం నుంచి మనీష్ సిసోడియా పోటీ చేయనున్నట్లు తాజాగా విడుదల చేసిన రెండో విడత అభ్యర్థుల జాబితాలో పేరు కల్పించింది. 70 మంది సభ్యులు ఉన్న ఢిల్లీ అసెంబ్లీ ఎన్నికలు త్వరలోనే జరగనుండగా.. ఆప్, బీజేపీ మధ్య హోరాహోరీ సాగనున్నట్లు రాజకీయ వర్గాలు విశ్లేషిస్తున్నాయి.