బ్యాటరీ మింగేసిన 10 నెలల బాలుడు.. ఎండోస్కోపీ ద్వారా బయటకు తీసిన వైద్యులు

కడుపులో ఉన్నప్పుడు మాత్రమే కాదు.. బిడ్డ పుట్టిన తర్వాత కూడా తల్లిదండ్రులు ఎన్నో జాగ్రత్తలు తీసుకోవాలని వైద్యులు చెప్తుంటారు. మరీ ముఖ్యంగా మోకాళ్లపై నడిచే సమయంలోనూ, ఐదేళ్ల వయసు వరకూ వారిని ఓ కంట కనిపెడుతూనే ఉండాలి. ఎందుకంటే తెలిసీ తెలియని వయసు.. అన్నీ కొత్తగా అనిపిస్తూ ఉంటాయి. ఏది తాకాలో.. ఏది తాకకూడదో.. ఏది తినాలో.. ఏది తినకూడదో గుర్తించలేని వయసు వారిది. అందుకే ఇంట్లో చిన్నపిల్లలు ఉంటే మరింత జాగ్రత్తగా ఉండాలని వైద్యులు చెప్తుంటారు. ఈ క్రమంలోనే శ్రీకాళహస్తిలో జరిగిన ఘటన ఈ అవసరాన్ని మరోసారి గుర్తు చేసింది.

శ్రీకాళహస్తిలో ఓ పదేళ్ల పిల్లాడు.. ఆడుకుంటూ బ్యాటరీ మింగేశాడు. వాచ్‌లలో ఉపయోగించే బ్యాటరీ సెల్‌ను చిన్నారి మింగేశాడు. అయితే ఈ విషయాన్ని ఇంట్లోని తల్లిదండ్రులు వెంటనే గుర్తించారు. తిరుపతిలోని స్విమ్స్‌ ఆస్పత్రికి చిన్నారిని తీసుకెళ్లారు. స్విమ్స్ ఆస్పత్రిలోని గ్యాస్ట్రో ఎంట్రాలజీ విభాగం డాక్టర్లు ఎక్స్‌రే తీయగా.. చిన్నారి పొట్టలో బ్యాటరీ సెల్ కనిపించింది. దీంతో ఎండోస్కోపీ ద్వారా ఆ బ్యాటరీ సెల్‌ను వైద్యులు బయటకు తీశారు. దీంతో చిన్నారికి గండం తప్పింది. ప్రస్తుతం బాలుడు కోలుకోవడంతో డిశ్చార్జి చేశారు. అయితే చిన్నారి కుటుంబసభ్యులు వెంటనే గుర్తించడంతో ప్రమాదం తప్పిందని స్విమ్స్ వైద్యులు తెలిపారు. ఆలస్యం చేస్తే ప్రాణాపాయం ఎదురయ్యే అవకాశం ఉండేదన్నారు.

ఇంట్లో చిన్నపిల్లలు ఉన్నారా.. ఈ జాగ్రత్తలు తప్పనిసరి

ఇంట్లో చిన్నపిల్లలు ఉన్నప్పడు మరింత ఎక్కువ జాగ్రత్త తీసుకోవాలని.. నోట్లో పట్టేంత చిన్న వస్తువులు కింద ఉంచరాదని వైద్యులు సూచిస్తున్నారు. అలాగే ఏవైనా ప్రమాదకర వస్తువులు ఉంటే పిల్లలకు అందనంత ఎత్తులో ఉంచాలని సూచిస్తున్నారు. ఎలక్ట్రానిక్ వస్తువులు ఇవ్వరాదని.. బ్యాటరీలతో నడిచే రిమోట్ కార్లు వంటివి ఇవ్వొద్దని చెప్తున్నారు. చిన్న పిల్లలు ఆడుకుంటూ చేతిలోని వస్తువులను నోట్లో పెట్టుకుంటూ ఉంటారని.. పొరపాటున అవి గొంతులో ఇరుక్కుపోతే ప్రాణాపాయ పరిస్థితి వస్తుందని హెచ్చరిస్తున్నారు. అందుకే నాణేలు, వస్తువులను చిన్నపిల్లలకు ఇవ్వొద్దని.. అయస్కాంతం, బ్యాటరీలు, పిన్నీసులు వంటి వాటిని పిల్లలకు దూరంగా ఉంచాలంటున్నారు. చిన్నారుల మెడలో సన్నటి గొలుసులు, నెక్లెస్ వంటివి వేయవద్దని చెప్తున్నారు.