నరేంద్ర మోదీ, అమిత్ షాలతో రాహుల్ గాంధీ, మల్లికార్జున ఖర్గే భేటీ.. పార్లమెంటులో ఆసక్తికర దృశ్యం

పార్లమెంటు శీతాకాల సమావేశాల సందర్భంగా ఆసక్తికరమైన పరిణామం చోటు చేసుకుంది. ఓవైపు పార్లమెంటులో అధికార, ప్రతిపక్షాల మధ్య తీవ్ర మాటల యుద్ధం జరుగుతుండగా.. నలుగురు అగ్రనేతలు సమావేశం కావడం ఇప్పుడు తీవ్ర చర్చనీయాంశంగా మారింది. ప్రధానమంత్రి నరేంద్ర మోదీ, కేంద్ర హోం శాఖ మంత్రి అమిత్ షా.. లోక్‌సభలో ప్రతిపక్ష నేత రాహుల్ గాంధీ, కాంగ్రెస్ పార్టీ జాతీయ అధ్యక్షుడు మల్లికార్జున ఖర్గేలు పార్లమెంటులో సమావేశం అయ్యారు. ఇప్పుడు వీరి భేటీ దేశవ్యాప్తంగా తీవ్ర ఆసక్తికరంగా మారింది. అయితే జాతీయ మానవ హక్కుల కమిషన్ నియామకంపై వీరు నలుగురు భేటీ అయినట్లు సంబంధిత వర్గాల ద్వారా తెలుస్తోంది.

పార్లమెంట్‌లోని ప్రధానమంత్రి కార్యాలయంలో బుధవారం.. నరేంద్ర మోదీ, అమిత్ షాలతో రాహుల్ గాంధీ, మల్లికార్జున ఖర్గే సమావేశం జరిగింది. నేషనల్ హ్యూమన్ రైట్స్ కమిషన్ - ఎన్‌హెచ్‌ఆర్‌సీ ఏర్పాటుకు సంబంధించి వీరు భేటీలో చర్చించారు. ఇక ఎన్‌హెచ్‌ఆర్‌సీ ఛైర్మన్‌ను ఎంపిక చేసేందుకు ఒక కమిటీ ఉంటుంది. ఈ కమిటీలో ప్రధానమంత్రి, కేంద్ర హోంశాఖ మంత్రి, లోక్‌సభ స్పీకర్, రాజ్యసభ ఛైర్మన్‌లతోపాటు పార్లమెంటు ఉభయసభల్లో ప్రతిపక్ష నేతలుగా ఉన్న ఎంపీలు కూడా సభ్యులుగా ఉంటారు. ఈ నేపథ్యంలోనే ఎన్‌హెచ్‌ఆర్‌సీ కమిషన్ ఏర్పాటుకు సంబంధించి వీరి మధ్య సమావేశం జరిగింది. అయితే ఇందులో లోక్‌సభ స్పీకర్, రాజ్యసభ ఛైర్మన్‌ పాల్గొనకపోవడం గమనార్హం.

ఇక పార్లమెంటు శీతాకాల సమావేశాలు రసవత్తరంగా సాగుతున్నాయి. దేశంలో జమిలి ఎన్నికలు ప్రవేశపెట్టేందుకు ఉద్దేశించిన ఒకే దేశం ఒకే ఎన్నిక రాజ్యాంగ సవరణ బిల్లును మంగళవారం.. కేంద్ర న్యాయ శాఖ మంత్రి అర్జున్ రామ్ మేఘ్వాల్.. లోక్‌సభలో ప్రవేశపెట్టారు. అయితే ఈ బిల్లును జాయింట్ పార్లమెంటరీ కమిటీ - జేపీసీకి పంపించేందుకు ఓటింగ్ నిర్వహించారు. ఈ ఓటింగ్‌లో బిల్లుకు మద్దతుగా 269 మంది ఎంపీలు ఓటు వేయగా.. మరో 198 మంది సభ్యులు వ్యతిరేకంగా ఓటు వేశారు. ఇక 31 మంది సభ్యులతో కలిసి జేపీసీని ఏర్పాటు చేస్తూ లోక్‌సభ స్పీకర్ నిర్ణయం తీసుకున్నారు. ఈ 31 మందిలో 21 మంది లోక్‌సభ ఎంపీలు, 10 మంది రాజ్యసభ ఎంపీలు ఉండనున్నారు.