ప్రపంచానికి శుభవార్త.. కేన్సర్‌కు టీకా తయారుచేసిన రష్యా.. కొత్త ఏడాదిలో మార్కెట్‌లోకి!

కేన్సర్‌పై ఔషధాలపై పరిశోధనల్లో కీలక ముందడుగు పడింది. ప్రపంచాన్ని భయపెడుతోన్న కేన్సర్ భూతానికి టీకాతో చెక్ పెట్టేందుకు చేసిన ప్రయత్నాలు ఫలించినట్టు తాజాగా రష్యా ప్రకటించింది. కేన్సర్‌కు టీకాను అభివృద్ధి చేసినట్టు వెల్లడించిన రష్యా.. వచ్చే ఏడాది మార్కెట్‌లోకి తీసుకొస్తున్నట్టు తెలిపింది. ముందుగా తమ దేశ పౌరులకు ఉచితంగా అందజేయనున్నట్టు వెల్లడించింది. ఈ మేరకు రష్యా ఆరోగ్య శాఖ మంత్రి ధ్రువీకరించారు. జనవరి 2025 నుంచి పౌరులకు వ్యాక్సినేషన్ ప్రారంభిస్తున్నట్టు ఆయన తెలిపారు. రష్యా అధికారిక మీడియా టీఏఎస్ఎస్ ప్రకారం.. రేడియాలజీ మెడికల్ రిసెర్చ్ సెంటర్ డైరెక్టర్ జనరల్ ఆండ్రీ కప్రిన్ కేన్సర్ టీకా గురించి వివరాలను వెల్లడించారు.

గమలేయా రిసెర్చ్ ఇన్‌స్టిట్యూట్ డైరెక్టర్ అలెగ్జాండర్ గింట్స్‌బర్గ్ గతంలో టీకా గురించి మాట్లాడుతూ.. ఈ వ్యాక్సిన్ కేన్సర్ వ్యాప్తిని నిరోధించగలదని తెలిపారు. క్యాన్సర్ వ్యాప్తిని నిరోధించగలదని అన్నారు. ఈ టీకాను తొలుత కేన్సర్ బాధితుల చికిత్సలో వినియోగించిన తర్వాత.. సాధారణ ప్రజలకు అందజేస్తామని చెప్పారు. అన్ని రకాల కేన్సర్లపై ఇది సమర్దవంతంగా పనిచేస్తుందని అన్నారు.

టీకా పనితీరును నేషనల్ మెడికల్ రిసెర్చ్ రేడియోలాజికల్ సెంటర్, గమలేయా ఇన్‌స్టిట్యూట్ సహా రష్యా ఆరోగ్య మంత్రిత్వ శాఖ ధ్రువీకరించాయి. అయితే, టీకా ఎటువంటి కేన్సర్ల చికిత్సకు తోడ్పడుతుంది? ప్రభావం ఏ మేరకు ఉంటుంది? దాని పేరు స్పష్టంగా చెప్పలేదు. కేన్సర్ వ్యాధికి శాస్త్రీయంగా టీకా అభివృద్ధి సాధ్యమే అని శాస్త్రవేత్తలు చెబుతున్నారు. ఇప్పటికే చాలా దేశాలు ఈ పరిశోధనల్లో నిమగ్నమయ్యాయి. ఈ క్రమంలో రష్యా అందరి కంటే ఓ అడుగు ముందే ఉంది.. ఇక, కరోనా సమయంలో కోవిడ్-19 టీకాను ప్రపంచంలో తొలిసారి రష్యాయే అందుబాటులోకి తీసుకొచ్చింది.

కొద్ది రోజుల కిందట రష్యా అధ్యక్షుడు వ్లాదిమిర్ పుతిన్ జాతినుద్దేశించి ప్రసంగిస్తూ.. కేన్సర్‌ను నిరోధించే కొత్త టీకాలు, ఔషధాల అభివృద్ధి ఎంత దూరంలో లేదని తెలిపారు. కాగా, కృత్రిమ మేధ వినియోగం కేన్సర్ టీకాల తయారీకి అవసరమైన కంప్యూటింగ్ విధానాన్ని తగ్గించగలదని నిపుణులు అభిప్రాయపడుతున్నారు.

ఈ ఏడాది ఫిబ్రవరిలో డబ్ల్యూహెచ్‌ఓ విడుదల చేసిన నివేదిక ప్రకారం..అత్యధిక మానవాభివృద్ధి సూచీ (హెచ్‌డీఐ) దేశాల్లో కేన్సర్ పెరుగుదల అత్యధికంగా (4.8 కోట్లు) ఉండే అవకాశం ఉంది. తక్కువ హెచ్ఐడీ దేశాల్లో 142 శాతం, మధ్యస్థ హెచ్‌డీఐ దేశాల్లో 99 శాతం పెరుగుదలకు అవకాశం ఉందని అధ్యయనం పేర్కొంది. అంతేకాదు, తక్కువ, మధ్యస్థ హెచ్‌డీఐ దేశాల్లో దీని మరణాలు రెట్టింపు అయ్యే అవకాశం ఉందని కూడా ఆందోళన వ్యక్తం చేసింది.