తొలిరోజే భారీ లాభాలు.. 60 శాతం ప్రీమియంతో మొబిక్విక్ లిస్ట్.. మరి విశాల్ మెగామార్ట్ ఎంతంటే?

దేశీయ స్టాక్ మార్కెట్‌లో ఇవాళ మరో రెండు సంస్థల షేర్లు ట్రేడింగ్ మొదలు పెట్టాయి. మార్కెట్ లోకి గ్రాండ్ ఎంట్రీ ఇచ్చాయి. ఇన్వెస్టర్లకు తొలి రోజే భారీ లాభాలు అందించాయి. అందులో ప్రధానంగా ప్రముఖ ఫిన్‌టెక్ సంస్థ వన్ మొబిక్విక్ షేర్లు దాదాపు 60 శాతం ప్రీమియంతో స్టాక్ ఎక్స్చేంజీల్లో లిస్టయ్యాయి. ఈ ఐపీఓ గరిష్ఠ ధర రూ. 279తో పోలిస్తే రూ. 442.25 వద్ద ఈ స్టాక్ లిస్టయ్యింది. లిస్టింగ్ ధరతో పోలిస్తే ఇది 58.51 శాతం అధికం. దీంతో ఒక్కో షేరుపై 163 రూపాయలు లాభం వచ్చినట్లయింది.

మొబిక్విక్ ఐపీఓ సబ్‌స్క్రిప్షన్ తొలి రోజే అనూహ్యమైన స్పందన లభించింది. తొలి గంటలోనే పూర్తి సబ్‌స్క్రిప్షన్ కావడం గమనార్హం. చివరి రోజు గడువు ముగిసే నాటికి 119.38 రెట్లు ఓవర్ సబ్‌స్క్రైబ్ అయింది. ఈ ఐపీఓలో భాగంగా 1.18 కోట్ల షేర్లను జారీ చేసింది. రూ. 572 కోట్లు సమీకరించే లక్ష్యంతో వచ్చింది. ముందునుంచి అనుకుంటున్నట్లుగానే అంచనాల ప్రకారం మంచి లాభాలతో స్టాక్ మార్కెట్లలోకి ఎంట్రీ ఇచ్చింది.

33 శాతంతో విశాల్ మెగా మార్ట్ షేర్లు లిస్టింగ్..

దేశవ్యాప్తంగా సూపర్ మార్టులను నిర్వహిస్తోన్న విశాల్ మెగా మార్ట్ షేర్లు బుధవారం రోజున స్టాక్ మార్కెట్ లోకి ఎంట్రీ ఇచ్చాయి. ఎన్ఎస్ఈలో రూ. 104 వద్ద ఈ షేర్లు ట్రేడింగ్ మొదలు పెట్టాయి. ఇష్యూ ధర రూ. 78తో పోలిస్తే 33.33 శాతం ప్రీమియంతో లిస్టయ్యాయి. దీంతో ఊహించినదానికంటే ఎక్కువ లాభాలు అందుకున్నారు ఇన్వెస్టర్లు. ఒక్కో షేరుపై రూ. 26 వరకు లాభం వచ్చింది.

రూ. 8 వేల కోట్లు నిధులు సమీకరించే లక్ష్యంతో విశాల్ మెగామార్ట్ పబ్లిక్ ఇష్యూకు వచ్చింది. పూర్తిగా ఆఫర్ ఫర్ సేల్ ద్వారా షేర్లు విక్రయించింది. సబ్‌స్క్రిప్షన్ తొలి రోజు నుంచే మంచి స్పందన లభించింది. చివరి నాటికి 28 రెట్లు ఓవర్ సబ్‌స్క్రిప్షన్ సాధించింది. అత్యధికంగా క్వాలిఫైడ్ ఇన్‌స్టిట్యూషనల్ బయ్యర్ల కోటాలో 85.11 రెట్ల సబ్‌స్క్రిప్షన్ వచ్చింది. రిటైల్ ఇన్వెస్టర్ల కోటాలో 2.3 రెట్లు బిడ్లు వచ్చాయి. యాంకర్ ఇన్వెస్టర్ల ద్వారా ఈ కంపెనీ రూ. 2400 కోట్లు సమీకరించింది.