నెల్లూరు జిల్లాలో జికా వైరస్ కలకలం.. ఏపీ మంత్రి స్పందన..

ఆంధ్రప్రదేశ్‌లో జికా వైరస్ కలకలం రేపింది. శ్రీపొట్టి శ్రీరాములు నెల్లూరు జిల్లాలో జికా వైరస్ అనుమానిత కేసు నమోదైందన్న ప్రచారం కలకలం రేపుతోంది. నెల్లూరు జిల్లా మర్రిపాడు మండలం వెంకటాపురం గ్రామంలో ఓ ఆరేళ్ల బాలుడు అనారోగ్యానికి గురయ్యాడు. కుటుంబసభ్యులు బాలుడిని నెల్లూరులోని ఓ ప్రైవేటు ఆసుపత్రికి తీసుకెళ్లారు. అయితే ఆ బాలుడికి జికా వైరస్ సోకిందంటూ ప్రచారం మొదలైంది. ఈ ప్రచారంపై నెల్లూరు జిల్లాకు చెందిన మంత్రి ఆనం రామనారాయణరెడ్డి స్పందించారు. బాలుడికి మెరుగైన వైద్యం అందించేందుకు చెన్నై తరలించినట్లు చెప్పారు.

మరోవైపు బాలుడికి సోకింది జికా వైరస్ అవునో కాదో తెలుసుకోవడం కోసం బాలుడి నుంచి రక్త నమూనాలను సేకరించి పుణె ల్యాబ్‌కు పంపించినట్లు మంత్రి చెప్పారు. వెంకటాపురం గ్రామానికి జీజీహెచ్ వైద్యులు, ప్రత్యేక వైద్య బృందాలు వెళ్లాయని చెప్పిన మంత్రి ఆనం రామనారాయణరెడ్డి.. బాలుడి కుటుంబసభ్యులతో పాటు, గ్రామస్థులకు వైద్యపరీక్షలు చేస్తున్నట్లు చెప్పారు. ఎవరూ భయపడాల్సిన అవసరం లేదని అన్నారు. మరోవైపు వెంకటాపురం గ్రామంలో వైద్య శిబిరం కూడా ఏర్పాటు చేసినట్లు తెలిసింది.

జికా వైరస్ ఎలా వస్తుంది?

జికా వైరస్ కేసులు సాధారణంగా బ్రెజిల్, అమెరికాలో కనిపిస్తుంటాయి. జికా వైరస్ అనేది చాలావరకూ మామూలు వైరస్ అయినా కూడా.. కొంతమందిలో సీరియస్ కావచ్చు. డెంగీ, చికెన్ గున్యా తరహాలోనే జికా వైరస్ కూడా దోమల ద్వారా వస్తుంది. ఈడిస్ జాతి దోమల ద్వారా జికా వైరస్ వ్యాపిస్తుంది. ఈ దోమలు ఎక్కవగా పగటి పూట కుడుతూ ఉంటాయి. జికా వైరస్ మామూలు వైరల్ జబ్బు అయినప్పటికీ ఒక్కోసారి గిలియన్ బ్యారీ సిండ్రోమ్‌కు దారి తీయవచ్చు. ఈ సిండ్రోమ్ కారణంగా కాళ్లు తాత్కాలికంగా చచ్చుబడే ప్రమాదం ఉంది. అన్నింటి కంటే ముఖ్యంగా జికా వైరస్ గర్భిణులకు ఇబ్బందికరంగా మారుతుంది. గర్భస్థ శిశువుల్లో మెదడు ఎదుగుదలను దెబ్బతీస్తుంది. దీంతో గర్భిణులకు ఈ వైరస్ వస్తే.. వారికి పుట్టే శిశువులు చిన్న తలతో పుడతారని వైద్యులు చెప్తున్నారు.

జికా వైరస్ లక్షణాలు

జికా వైరస్ లక్షణాల్లో జ్వరం ఒకటి. అయితే కొంతమంది స్వల్పంగా జ్వరగా రావచ్చు. అలాగే ఒళ్లునొప్పులు, కీళ్లనొప్పులు, తలనొప్పి ఉంటాయి. కళ్లు ఎర్రబడటం, చర్మం మీద దద్దుర్లు కూడా కనిపిస్తాయి. ఈడిస్ దోమ కుట్టిన మూడు నుంచి 14 రోజుల్లో దీని లక్షణాలు కనిపిస్తాయని వైద్యులు చెప్తున్నారు. అలాగే రెండు నుంచి వారం రోజుల్లో లక్షణాలు తగ్గిపోయే అవకాశం ఉందంటున్నారు.

జికా వైరస్ వ్యాప్తి

జికా వైరస్ సోకిన వ్యక్తి లాలాజలంతో కూడా ఈ ఇన్‌ఫెక్షన్ వ్యాపించే అవకాశం ఉంది. జికా వైరస్ బాధితుడి రక్తం, వీర్యం, లాలాజలం ద్వారా ఇతరులకు వ్యాపించే అవకాశం ఉంది. జికా వైరస్‌ను గుర్తించడానికి పీసీఆర్ పరీక్ష చేస్తారు. అయితే లక్షణాలు కనిపించిన వారంలోపు అయితే కచ్చితమైన ఫలితాలు వచ్చే అవకాశం ఉందని వైద్యులు చెప్తున్నారు. జికా వైరస్ చికిత్స విషయానికి వస్తే ఇతరత్రా వైరల్ ఇన్‌ఫెక్షన్లకు చికిత్స చేసిన విధంగానే దీని చికిత్స ఉంటుంది. ప్రత్యేకమైన చికిత్స అంటూ ఏమీ లేదు.

జికా వైరస్ నివారణ

జికా వైరస్ నివారణలో ప్రధానంగా దోమలు కుట్టకుండా చూసుకోవాలి. ఇంటి పరిసరాల్లో ఎక్కడా నీరు నిలువ ఉండకుండా చూసుకోవాలి. అలాగే గర్భిణులు, నెలల వయసు ఉన్న శిశువుల్లో మరింత జాగ్రత్త అవసరం. జికా వైరస్ కేసులు నమోదైన ప్రాంతానికి వెళ్లివచ్చిన వారు అనారోగ్యంగా ఉంటే కాస్త దూరంగా ఉండడం మంచిదని డాక్టర్లు చెప్తున్నారు.