అత్యాచారం కేసులో జీవితఖైదు.. ఆశారాం బాపుకు సుప్రీంకోర్టు బెయిల్

బాలికపై అత్యాచారం చేసినట్లు నిరూపితం కావడంతో వివాదాస్పద స్వామీజీ ఆశారాం బాపు జైలు పాలైన సంగతి తెలిసిందే. కొన్నేళ్లపాటు తనపై ఆశారాం బాపు అత్యాచారానికి పాల్పడినట్లు ఆయన ఆశ్రమంలోనే పనిచేసే బాలిక పోలీసులకు ఫిర్యాదు చేయడంతో ఈ వ్యవహారం వెలుగులోకి రాగా.. పోలీసులు అరెస్ట్ చేశారు. ఆ తర్వాత కొన్నేళ్ల విచారణ తర్వాత ఎట్టకేలకు ఆయనకు కోర్టు జీవితఖైదు విధించింది. అయితే 2013 నుంచి జైలులో ఉన్న ఆశారాం బాపు ప్రస్తుతం అనారోగ్య సమస్యలు ఎదుర్కొంటున్నారు. ఈ నేపథ్యంలోనే మధ్యంతర బెయిల్ కోసం మంజూరు చేసుకోగా.. సుప్రీంకోర్టు అంగీకరించింది. ఈ సందర్భంగా పోలీసులకు కోర్టు పలు సూచనలు చేసింది.

86 ఏళ్ల ఆశారాం బాపుకు సుప్రీంకోర్టు మంగళవారం మధ్యంతర బెయిల్ మంజూరు చేసింది. అనారోగ్య కారణాల నేపథ్యంలో ఆయన సుప్రీంకోర్టును ఆశ్రయించగా.. మార్చి 31వ తేదీ వరకు బెయిల్‌ మంజూరు చేస్తూ ఉత్తర్వులు జారీ చేసింది. మధ్యంతర బెయిల్‌పై విడుదలైన ఆశారాం బాపు తన అనుచరులను కలవకూడదని ఈ సందర్భంగా సుప్రీంకోర్టు ఆదేశాలు ఇచ్చింది. అంతేకాకుండా ఆశారాం బాపు ఆస్పత్రికి వెళ్లేటప్పుడు మాత్రమే భద్రత కల్పించాలి తప్ప.. ఆయన ఎక్కడికి వెళ్లాలి అనేది పోలీసులు సూచించకూడదని సుప్రీంకోర్టు జడ్జిలు జస్టిస్ ఎంఎం సుందరేష్, జస్టిస్ రాజేష్ బిందాల్‌లతో కూడిన ధర్మాసనం తెలిపింది.

తనను తాను స్వయంగా దేవుడు అని ప్రకటించుకున్న ఆశారాం బాపు అసలు పేరు అసుమల్ సిరుమలాని హర్పలానీ. గుజరాత్‌ మోతేరాలోని ఆశ్రమంలో పనిచేస్తున్న సమయంలో తనపై ఆశారాం బాపు పలుమార్లు అఘాయిత్యానికి పాల్పడినట్లు సూరత్‌కు చెందిన ఓ మహిళ పోలీసులకు ఫిర్యాదు చేశారు. 2001 నుంచి 2006 మధ్య 5 ఏళ్ల పాటు తనపై చాలాసార్లు ఆశారాం బాపు అత్యాచారానికి పాల్పడ్డారని ఆరోపించింది. దీనిపై దర్యాప్తు చేపట్టిన పోలీసులు ఆశారాం బాపుతో పాటు మరో ఏడుగురిపై కేసు నమోదు చేశారు.

ఇక ఈ కేసులో గాంధీనగర్‌ సెషన్స్‌ కోర్టు ఆశారాం బాపును దోషిగా తేల్చింది. ఎలాంటి సాక్ష్యాధారాలు లేకపోవడంతో మిగిలినవారిని విడుదల చేశారు. ఆ తర్వాత ఆశారాం బాపుకు జీవితఖైదు విధిస్తూ కోర్టు తీర్పునిచ్చింది. మరోవైపు.. జోధ్‌పూర్‌లోని ఆశ్రమంలో 2013లో ఓ 16 ఏళ్ల బాలికపై అత్యాచారం కేసులోనూ ఆశారాం బాపు దోషిగా తేలారు. ఈ కేసులోనూ 2018లో ఆయనకు జీవితఖైదు పడింది. దీంతో రెండు కేసుల్లో ఆయన జీవితఖైదు అనుభవిస్తున్నారు.

ఇక గతేడాది డిసెంబర్ 18వ తేదీన పెరోల్‌పై ఆశారాం బాపు జైలు నుంచి బయటికి వచ్చాడు. ఆ తర్వాత 17 రోజుల పెరోల్ పూర్తయిన తర్వాత ఇటీవల జనవరి 2వ తేదీన మరో అత్యాచారం కేసులో జోధ్‌పూర్ జైలుకు వెళ్లాడు. ఇక పెరోల్‌పై విడుదలైన సమయంలో పూణేలో ఉంటూ చికిత్స తీసుకున్నాడు. ఇక గతేడాది ఆగస్ట్ 29వ తేదీన తన జీవితఖైదును సస్పెండ్ చేయాలని కోరుతూ ఆశారాం బాపు చేసిన అభ్యర్థనను గుజరాత్ హైకోర్టు తిరస్కరించింది.