జాతరలో జనాల పైకి దూసుకెళ్లిన ఏనుగు.. 17 మందికి గాయాలు

కేరళ రాష్ట్రంలో జరిగిన ఓ జాతరలో అపశృతి చోటుచేసుకుంది. ఉత్సవాల కోసం ఆలయం వద్దకు వందలాది మంది ప్రజలు రాగా.. పూజా క్రతువులో భాగంగా కొన్ని ఏనుగులను కూడా అక్కడకు తీసుకు వచ్చారు ఆలయ అర్చకులు. ఈ క్రమంలోనే ఏనుగులను అందంగా ముస్తాబు చేసి జనాల వద్దకు తీసుకు రాగా.. ఏమైందో ఏమో తెలియదు కానీ ఓ ఏనుగు బీభత్సం సృష్టించింది. ఒక్కసారిగా జనాలపైకి దూసుకు వెళ్లింది. ఈ ప్రమాదంలో మొత్తం 17మందికి తీవ్ర గాయాలు అయ్యాయి. ప్రస్తుతం ఈ వీడియో నెట్టింట వైరల్ అవుతోంది. ఆ పూర్తి వివరాలు ఏంటో మీకోసం.

కేరళ రాష్ట్రంలోని మలప్పురం జిల్లా తిరూర్‌లో మంగళ వారం రోజు రాత్రి పుతియంగడి ఉత్సవం నిర్వహించారు. అర్థరాత్రి 12.30 గంటలకు ఉత్సవంలో భాగంగానే కొన్ని ఏనుగులను అక్కడకు తీసుకు వచ్చారు. పూజా క్రతువులు కూడా నిర్వహిస్తున్నారు. అయితే ఈ వేడుకను కళ్లారా చూసి స్వామి వారిని దర్శించుకునేందుకు వందలాది మంది ప్రజలు అక్కడకు చేరుకున్నారు. సంబురాలు అంబరాన్నంటిన క్షణాన ఒక్కసారిగా ఓ ఏనుగు బీభత్సం సృష్టించింది.

 అప్పటి వరకు చక్కగా ఉన్న ఏనుగు.. జనాలపైకి దూసుకు వెళ్లింది. ఒక్కసారిగా జరిగిన ఈ ఘటనతో ప్రజలు అంతా పారిపోయే ప్రయత్నం చేశారు. ఈక్రమంలోనే తొక్కిసలాట జరిగి మొత్తం 17 మంది తీవ్రంగా గాయపడ్డారు. ముఖ్యంగా ఏనుగు ఓ వ్యక్తిని తొండంతో తీసి పక్కకు పడేసింది. విషయం గుర్తించిన ఏనుగు నిర్వాహకులు దాన్ని అదుపు చేసే ప్రయత్నం చేశారు. కానీ ఆ ఏనుగు ఆగలేదు. వెంటనే స్థానిక అటవీ శాఖ అధికారులకు ఫోన్ చేయగా.. హుటాహుటిన అక్కడకు చేరుకుని ఏనుగును బంధించారు. ఆపై గాయపడిన వారందరినీ స్థానిక ప్రభుత్వాసుపత్రికి తరలించారు.

ఏనుగు తొండంతో పక్కకు పడేసిన ఓ వ్యక్తికి మాత్రం తీవ్ర గాయాలు కాగా అతడిని మెరుగైన చికిత్స నిమిత్తం కొట్టకల్‌లోని ఓ ప్రైవేటు ఆస్పత్రిలో చేర్పించారు. ప్రస్తుతం చికిత్స పొందుతున్న అతడి పరిస్థితి విషమంగా ఉన్నట్లు తెలుస్తోంది. ఏనుగు ఒక్కసారిగా అలా దాడి చేయడానికి కారణం దానికి కోపం రావడమేనని అటవీ శాఖ అధికారులు భావిస్తున్నారు. ఎక్కువ జనాలు ఉండడం, పెద్ద పెద్ద శబ్దాలు రావడంతో.. ఒక్కోసారి ఏనుగుల తీవ్ర కోపోద్రేకానికి గురవుతాయని.. అలాంటి సమయంలోనే ఇలాంటి ప్రమాదాలు జరుగుతాయని చెప్పుకొచ్చారు. ప్రస్తుతం నెట్టింట ఇందుకు సంబంధించిన వీడియో వైరల్‌గా మారింది.

ఈ వీడియో చూసిన ప్రతీ ఒక్కరూ.. అందరికీ గాయాలు అయినా ఏనుగు మీద ఉన్న వ్యక్తి భలేగా తప్పించుకున్నాడుగా అంటూ కామెంట్లు చేస్తున్నారు. మరోవైపు ఇంత పెద్ద శబ్దాలు చేస్తే ఇలాగే జరుగుతుందని కొందరు.. అసలెందుకలా జరిగిందని మరికొందరు తమ మనసులోని భావాలను కామెంట్ల రూపంలో వెల్లడిస్తున్నారు.