క్యాబ్ దిగి రూ.500 ఇచ్చిన ప్రయాణికుడు.. నోటు చూసి అవాక్కైన ఉబెర్ డ్రైవర్‌

హర్యానాలోని గుర్గావ్‌లో జరిగిన ఓ సంఘటన ఇప్పుడు సోషల్ మీడియాలో పెద్ద రచ్చ లేపుతోంది. ఓ వ్యక్తి తనకు ఎదురైన అనుభవాన్ని సోషల్ మీడియాలో పంచుకోవడంతో అది ఇప్పుడు తీవ్ర చర్చనీయాంశంగా మారింది. గూర్గావ్‌లోని గ్రామీణ ప్రాంతాల్లో పర్యటించేందుకు వెళ్లిన ఓ వ్యక్తి.. ఉబెర్ క్యాబ్ బుక్ చేసుకున్నాడు. తాను దిగాల్సిన చోటు రాగానే అక్కడ దిగేశాడు. అయితే జేబులో నుంచి రూ.500 నోటు తీసి.. డ్రైవర్‌కు ఇచ్చాడు. ఇక ఆ నోటును చూసిన డ్రైవర్‌కు ఏదో అనుమానం వచ్చింది. ఆ నోటును పూర్తిగా పరిశీలించగా.. అది నకిలీ నోటు అని తేలింది. వెంటనే ఆ విషయాన్ని ఆ ప్రయాణికుడికి చెప్పడంతో దాన్ని మార్చి ఇచ్చాడు. అయితే తాను ఏటీఎం మెషీన్ నుంచే ఆ నోటు ను తీసినట్లు వెల్లడించాడు. ఇప్పుడు ఈ వ్యవహారం తీవ్ర చర్చకు దారి తీసింది.

అయితే ఈ విషయాన్ని సోషల్ మీడియాలో షేర్ చేసిన ఆ ప్రయాణికుడు.. మొదట తాను దాన్ని నమ్మలేకపోయానని ఆ తర్వాత గుర్తించినట్లు చెప్పాడు. దాని మీద మనోరంజన్ బ్యాంక్ అని ఉందని పేర్కొన్నాడు. ఫుల్ ఆఫ్ ఫన్ అని కూడా రాసి ఉందని తెలిపాడు. ఇక ఆ నోటును ఏటీఎం నుంచే తీశానని 90 శాతం కచ్చితంగా చెప్పలగలనని వెల్లడించాడు. అయితే మిగిలిన 10 శాతం మాత్రం ఏటీఎం మెషీన్ అలాంటి తప్పు చేసి ఉండదని తాను నమ్ముతున్నట్లు చెప్పాడు.

ఇక ఈ సోషల్ మీడియా పోస్ట్ వైరల్ కావడంతో నెటిజన్లు కామెంట్ల వర్షం కురిపిస్తున్నారు. కొందరు ఆ ఉబెర్ డ్రైవర్ తీరును తప్పుపట్టారు. తన వద్ద ఉన్న ఫేక్ నోటును మార్చేసి.. ఆ ప్రయాణికుడి వద్ద మరో రూ.500 కాజేయాలని పెద్ద స్కామ్ చేశాడని పేర్కొంటున్నారు. అయితే మరో వ్యక్తి మాత్రం ఇది కచ్చితంగా డ్రైవర్ పనే అయి ఉంటుందని.. ఎందుకంటే ముంబైలో తన బంధువుకు కూడా ఇలాంటిదే జరిగిందని.. అప్పుడు రూ.2 వేల నోటును ఇలాగే చేశారని తెలిపాడు. ఇది 101 శాతం కచ్చితంగా ఏటీఎం నుంచి వచ్చిన నోటు కాదని.. మనుషులు తప్పులు చేస్తారు కానీ.. మెషీన్ తప్పు చేయదని మరో నెటిజన్ కామెంట్ చేశాడు.

మరికొందరు ఆ పర్యాటకుడిపై సానుభూతి కల్పించారు. ఈ విషయంలో చాలా అంత కష్టపడాల్సిన అవసరం లేదని.. ఇప్పటినుంచైనా ఇలాంటివి గమనించండని సూచించాడు. ఇక నకిలీ నోటును ఆ ప్రయాణికుడు గమనించకుండా ఎలా తీసుకున్నారని ప్రశ్నించారు. ఇక ఆ నోటు ఇప్పటికే అతని వద్ద ఉంటే.. అది నిజం అయిందో లేదో తెలుసుకోలేదా అని అన్నారు. ఇక మరికొందరు "వెల్‌కమ్ ఇండియా.. ఇక్కడ స్కామ్‌లు కూడా చాలా క్రియేటివ్‌గా ఉంటాయి" అని పేర్కొన్నాడు. ఇప్పటి నుంచి ఏదైనా కరెన్సీ నోటు తీసుకుంటే అది నకిలీదా.. నిజమైందా చూసి తీసుకోవాలని ఇంకొందరు నెటిజన్లు సూచిస్తున్నారు.