వారం రోజుల్లోనే బట్టతల.. జుట్టురాలే సమస్యతో బాధపడుతున్న ఆ 3 గ్రామాలు, కారణం అదేనా.

జుట్టు రాలడం అనేది ఎంత పెద్ద సమస్య అనేది.. అది అనుభవించేవారికే తెలుస్తుంది. కొంతమంది జుట్టు రాలడం చూసి భయపడి.. ఆస్పత్రులకు పరిగెత్తుతూనే ఉంటారు. మరికొందరు షాంపూలు, హెయిర్ ఆయిల్‌లు మార్చడం వంటివి చేస్తూ ఉంటారు. ఇక మరికొందరు అయితే రకరకాల చిట్కాలు పాటిస్తూ ఉంటారు. ఒక్కసారి జుట్టు ఊడిపోవడం ప్రారంభం అయిందంటే చాలు.. ఇక బట్టతల ఖాయమే. పూర్తిగా బట్టతల అయిన వారు విగ్గులు పెట్టుకోవడమో లేక హెయిర్ ట్రాన్స్‌ప్లాంటేషన్ చేసుకోవడమో చేసుకుంటారు. హెయిర్ ట్రాన్స్‌ప్లాంటేషన్ చాలా ఖర్చుతో కూడుకున్న వ్యవహారం కావడంతో చాలా మంది అలాగే వదిలేసి.. బట్టతలతోనే తిరుగుతూ ఉంటారు. ఇక బట్టతలను కవర్ చేసుకునేందుకు వారు పడే పాట్లు అంతా ఇంతా కాదు. అయితే తాజాగా ఓ 3 గ్రామల ప్రజలకు తీవ్రమైన జుట్టు రాలే సమస్య వేధిస్తోంది. ఎంతలా అంటే వారం రోజుల్లోనే జుట్టు ఉన్న వ్యక్తి బట్టతల వ్యక్తిగా మారిపోయేంత ఉండటంతో అక్కడి వాసుల్లో గుబులు నెలకొంది.

మహారాష్ట్రలోని బుల్దానా జిల్లాలోని మూడు గ్రామాల ప్రజలకు ఇప్పుడు జుట్టు రాలడం అనే సమస్య అన్నింటికన్నా పెద్దదిగా మారింది. ఎందుకంటే ఒక వ్యక్తి వారం రోజుల వ్యవధిలోనే జుట్టు అంతా రాలిపోయి.. చివరికి బట్టతల మిగిలింది. ఆ జిల్లాలోని బోర్గావా, కల్వాడ్, హింగ్నా గ్రామాల ప్రజలు గత కొన్ని రోజులుగా జుట్టు రాలే సమస్యతో తీవ్ర భయాందోళనకు గురవుతున్నారు. వారం వ్యవధిలోనే ఓ వ్యక్తికి బట్టతల కనిపించడంతో ఈ ఆందోళనలు మరింత ఎక్కువయ్యాయి. వేగంగా జుట్టు రాలుతుండటం వారిలో తెలియని భయాన్ని పుట్టిస్తోంది.

చిన్నా-పెద్దా, ముసలి-ముతక, మహిళలు-పురుషులు ఇలా తేడాలు లేకుండా గత కొన్ని రోజులుగా అందరూ ఇదే జుట్టు రాలే సమస్యతో అవస్థలు పడుతున్నారు. ఈ నేపథ్యంలోనే సమస్య అధికంగా ఉన్న బోర్గావా, కల్వాడ్, హింగ్నా గ్రామాల్లో మహారాష్ట్ర వైద్యశాఖ ఉన్నతాధికారులు పర్యటించారు. వారిలో కొందరు బాధితులను స్వయంగా అధికారులు పరిశీలించారు. బాధితుల నుంచి శాంపిల్స్‌ స్వీకరించి మరిన్ని పరిశోధనలు జరిపేందుకు ల్యాబ్‌కు పంపించారు. త్వరలోనే ఈ అధిక జుట్టు రాలే సమస్యకు కచ్చితమైన కారణం ఏంటో గుర్తిస్తామని ఆరోగ్య శాఖ అధికారులు పేర్కొన్నారు.

అయితే ఆ గ్రామాల్లో ఎరువుల వల్ల కలుషితమైన నీరు, ఆరోగ్య సమస్యల కారణంగానే వారికి జుట్టు బాగా రాలుతున్నట్లు అధికారులు ప్రాథమికంగా అనుమానం వ్యక్తం చేస్తున్నారు. ఈ నేపథ్యంలోనే ఆ గ్రామాల్లోని నీటి శాంపిల్స్, గ్రామస్తుల జట్టు, చర్మ నమూనాలను పరీక్షల కోసం తీసుకెళ్లారు. ఈ 3 గ్రామాల్లో సుమారు 50 మంది వరకు ఈ జుట్టు రాలే సమస్యతో బాధపడుతున్నట్లు గుర్తించారు. అయితే ఈ సంఖ్య మరింత పెరిగే అవకాశం ఉందని చెప్పారు.