పెళ్లి చేసుకుంటే రూ.21 వేలు.. డీజే, మద్యం మాత్రం పెట్టొద్దు.. గ్రామస్థుల గొప్ప ఆలోచన

పెళ్లిళ్లు అంటేనే మందు, చిందు తప్పనిసరిగా ఉంటుంది. అయితే పెళ్లిలో వచ్చిన ఫ్రెండ్స్, బంధువులు ఫుల్లుగా తాగి.. డీజే బాక్సుల వద్ద చేసే రచ్చ మామూలుగా ఉండదు. సరదాగా డ్యాన్స్ చేసి ఎంజాయ్ చేయకుండా.. గొడవలు పడటం, తన్నుకోవడం, చివరికి ప్రాణాలు తీసుకున్న సంఘటనలు కూడా చూస్తూనే ఉన్నాం. ఇవన్నింటికీ కారణం మద్యం మత్తే అనేది తెలిసిన విషయమే. అయితే పెళ్లిలో డీజే మ్యూజిక్, ఆల్కహాల్ లేకుంటే ఆ వధూవరులకు క్యాష్ ప్రైజ్ ఇవ్వాలని గ్రామస్థులంతా తీర్మానించారు. అంతేకాకుండా ఇలా చేయడం వల్ల పెళ్లిలో వృథా ఖర్చులు కూడా తగ్గి.. కాస్త భారం తగ్గుతుందని గ్రామపెద్దలు నిర్ణయించారు. పంజాబ్‌ రాష్ట్రంలోని ఓ గ్రామంలో తీసుకున్న ఈ నిర్ణయం ఇప్పుడు మిగితా గ్రామాలకు కూడా ఎంతో ఆదర్శంగా నిలుస్తోంది.

పంజాబ్ భఠిండా జిల్లాలోని బల్లో గ్రామం గొప్ప ఆలోచన చేసింది. తమ గ్రామంలో జరిగే పెళ్లిళ్లలో వధూవరుల కుటుంబ సభ్యులు మద్యం అందుబాటులో ఉంచకుండా.. డీజే డ్యాన్సులు లేకుండా చేయాలని భావించింది. మామూలుగా చెప్తే ఎవరూ అలా చేయరని భావించిన గ్రామపెద్దలు.. ఒక గొప్ప తీర్మానం చేసింది. ఇలా పెళ్లిలో డీజే, మద్యం లేకుండా చేసిన వారికి రూ. 21 వేలను నగదు ప్రోత్సహకంగా ఇవ్వాలని నిర్ణయం తీసుకుంది. 5 వేల మంది జనాభా ఉన్న ఆ బల్లో గ్రామం మొత్తం సమావేశం నిర్వహించి.. ఈ కీలక నిర్ణయం తీసుకున్నారు.

పెళ్లిళ్లలో మద్యం వినియోగం, డీజే డ్యాన్సులను అరికట్టేందుకు ఈ నిర్ణయం తీసుకున్నట్లు బల్లో గ్రామసర్పంచ్ అమర్ జీత్ కౌర్ వెల్లడించారు. గ్రామాల్లో పెళ్లిళ్లు జరిగినపుడు డీజేలను పెట్టడం, మద్యం అందుబాటులో ఉంచడంతో తరచూ గొడవలు జరుగుతున్నాయని.. వాటిని అరికట్టేందుకే ఈ నిర్ణయాన్ని తీసుకున్నట్లు చెప్పారు. డీజే సౌండ్ కారణంగా గ్రామంలోని పిల్లలు చదువుకునేందుకు ఆటంకం కలుగుతోందని.. వృద్ధులు, అనారోగ్యంతో ఉన్నవారు డీజే సౌండ్ వింటేనే భయంతో వణికిపోతున్నారని పేర్కొన్నారు.

వీటితోపాటు పెళ్లిళ్లలో వృథా ఖర్చులు చేయకుండా ప్రజలను ప్రోత్సహించేందుకు ఈ నిర్ణయం తీసుకున్నామని వివరించారు. ఇలాంటి నిర్ణయాలు మిగితా గ్రామాలు కూడా తీసుకుని ఆదర్శంగా నిలవాలని బల్లో గ్రామ సర్పంచ్ అమర్ జీత్ కౌర్ హితవు పలికారు. గ్రామపెద్దలు తీసుకున్న నిర్ణయంతో పెళ్లిళ్లలో గొడవలు తగ్గాయని.. ఆర్థిక సహాయం కూడా అందుతోందని స్థానికులు ఆనందం వ్యక్తం చేస్తున్నారు.