టోల్ ప్లాజా వద్ద ఆపకుండా వెళ్లిన కారు.. అనుమానంతో డ్రోన్ ఎగరేసిన పోలీసులు.. తీరా చూస్తే

ఏపీలో టీడీపీ కూటమి ప్రభుత్వం గంజాయి, డ్రగ్స్ రవాణా, వాడకంపై ఉక్కుపాదం మోపుతోంది. ఇందుకోసం ఈగల్ పేరిట ప్రత్యేక విభాగం ఏర్పాటు చేసి ఆంధ్రప్రదేశ్ ప్రభుత్వం చర్యలు తీసుకుంటోంది. టోల్ ప్లాజాల వద్ద తనిఖీలు, వాహనాల చెకింగ్స్ చేపడుతూ గంజాయి సరఫరా జరగకుండా అడ్డుకట్ట వేసేందుకు ప్రయత్నాలు చేస్తున్నారు. అలాగే గంజాయి సరఫరా చేస్తూ దొరికిన వారికి కఠిన శిక్షలు విధించేలా చర్యలు చేపడుతున్నారు. దీంతో గంజాయి స్మగ్లర్లు కొత్తదారులు వెతుక్కుంటున్నారు. పోలీసులకు దొరకకుండా సరుకు దాటించేందుకు కొత్త కొత్త ప్లాన్లు వేస్తున్నారు. ఈ విధంగానే ఎన్టీఆర్ జిల్లా నందిగామ వద్ద కొంతమంది గంజాయి అక్రమ రవాణా చేసేందుకు ప్రయత్నించారు. అయితే పోలీసుల ముందు వారి ప్లాన్లు చిత్తయ్యాయి.

కొంతమంది కారులో గంజాయిని తరలిస్తున్నట్లు మంగళవారం ఉదయం నందిగామ పోలీసులకు విశ్వసనీయ సమాచారం అందింది. దీంతో ఏసీపీ తిలక్ అప్రమత్తమయ్యారు. పోలీసు సిబ్బందిని అలర్ట్ చేశారు. నియోజకవర్గమంతటా ముమ్మర తనిఖీలు చేపట్టారు. ఈ క్రమంలోనే కీసర టోల్ ప్లాజా వద్ద నందిగామ పోలీసులు వాహనాల తనిఖీ చేపట్టారు. పోలీసులు తనిఖీలు నిర్వహిస్తున్న సమయంలో కీసర టోల్ ప్లాజా వద్దకు ఓ కారు వేగంగా వచ్చింది. పోలీసులను గమనించిన దుండగులు అంతే వేగంతో అక్కడ నుంచి కారులో ఉడాయించారు.

అలా వెళ్తూ, వెళ్తూ నందిగామ శివారులోని పొలాల్లో కారును వదిలేసి అక్కడి నుంచి పరారయ్యారు. కీసర టోల్ ప్లాజా వద్ద కారుల వేగంగా వెళ్లిపోవటం గమనించిన పోలీసులు.. మధ్యాహ్నం నుంచి డ్రోన్ సహాయంతో గాలింపు చేపట్టారు. చివరకు డ్రోన్ విజువల్స్ సాయంతో నందిగామ శివారులోని పొలాల్లో ఓ కారు ఉన్నట్లు గుర్తించారు. వెంటనే అక్కడకు చేరుకున్న పోలీసులు కారును పరిశీలిస్తే.. అందులో అక్రమంగా సరఫరా చేస్తున్న 120 కేజీల గంజాయిని గుర్తించారు. వెంటనే ఈ గంజాయి మొత్తాన్ని సీజ్ చేశారు. కారు వదిలేసి పరారైన నిందితుల కోసం పోలీసులు గాలిస్తున్నారు. డ్రోన్ల సాయంతో వారు ఎటువైపు పారిపోయారనే వివరాలు కనుగొనేందుకు ప్రయత్నిస్తున్నారు.