ట్రాక్టర్ల తయారీ కంపెనీ ఐపీఓ.. 20 శాతం ప్రీమియంతో లిస్టింగ్

ట్రాక్టర్లు, క్రేన్లు సహా వ్యవసాయ పరికరాలు తయారు చేసే దిగ్గజ కంపెనీ ఇండో ఫార్మ్ ఎక్విప్‌మెంట్ కంపెనీ ఐపీఓ అదరగొట్టింది. ఈ కంపెనీ ఐపీఓ షేర్లు మంగళవారం స్టాక్ మార్కెట్లో లిస్టింగ్ అయ్యాయి. ఐపీఓ ఇష్యూ ధరతో పోలిస్తే 20 శాతం ప్రీమియంతో లిస్ట్ అయ్యాయి. ఈ ఐపీఓకు భారీ ఎత్తున బిడ్లు దాఖలైన సంగతి తెలిసిందే కదా. ఇష్యూ ధర రూ. 215 తో పోలిస్తే బాంబే స్టాక్ ఎక్స్చేంజీలో రూ. 258.40 వద్ద ట్రేడింగ్ మొదలు పెట్టాయి ఈ షేర్లు. ఇక జాతీయ స్టాక్ ఎక్స్చేంజీలో చూసుకుంటే 19.07 శాతం ప్రీమియంతో రూ. 256 వద్ద లిస్టయ్యాయి.

ఇండో ఫార్మ్ ఎక్విప్‌మెంట్ కంపెనీ రూ. 250 కోట్లు సమీకరించే లక్ష్యంతో పబ్లిక్ ఇష్యూకు వచ్చింది. ఈ ఐపీఓలో భాగంగా ఒక్కో షేరు ధర రూ.204- 215గా నిర్ణయించారు. ఇన్వెస్టర్లు కనీసం 69 షేర్లు (ఒక లాట్) కొనుగోలు చేయాలని సూచించారు. అంటే ఒక్క లాట్‌పై రూ.2829 లాభం వచ్చినట్లయింది. సబ్‌స్క్రిప్షన్‌లో దూసుకెళ్లినప్పటికీ ఐపీఓ లిస్టింగ్‌లో మాత్రం అంచనాలను అందుకోలేకపోయింది. 20 శాతం ప్రీమియంతో లిస్టింగ్ అయింది. ఇన్వెస్టర్లను కాస్త నిరాశకు గురి చేసిందని చెప్పవచ్చు.

ఇప్పటికే యాంకర్ ఇన్వెస్టర్ల నుంచి రూ.78 కోట్లు సమీకరించింది. సబ్‌స్క్రిప్షన్‌లో భాగంగా తొలి రోజు 17.70 రెట్లు అధికంగా బిడ్లు వచ్చాయి. చివరి రోజు పూర్తయ్యే నాటికి నాన్ ఇన్‌స్టిట్యూషనల్ ఇన్వెస్టర్ల కోటాలో 501.65 రెట్లు, క్వాలిఫైడ్ ఇన్‌స్టిట్యూషనల్ బయ్యర్ల కోటాలో 242.40 రెట్లు బిడ్లు వచ్చాయి. రిటైల్ ఇన్వెస్టర్ల కోటాలో 101.64 రెట్లు సబ్‌స్క్రిపషన్లు వచ్చాయి. ఈ ఫ్రెష్ ఇష్యూ ద్వారా సమీకరించిన రూ. 250 కోట్ల నిధులను పిక్ అండ్ క్వారీ క్రేన్స్ తయారీ పరిశ్రమ సామర్థ్యాన్ని పెంచేందుకు, లోన్ల చెల్లింపులు, కంపెనీకి చెందిన ఎన్‌బీఎఫ్‌సీ బరోటా ఫైనాన్స్‌ సంస్థలో పెట్టుబడులు, మూల ధన అవసరాలకు వినియోగించనున్నట్లు కంపెనీ తెలిపింది.