ఆస్ట్రేలియా, అఫ్ఘానిస్థాన్ మ్యాచ్‌కు వర్షం అంతరాయం

ఛాంపియన్స్ ట్రోఫీ 2025 గ్రూప్‌-బిలో అప్ఘానిస్థాన్, ఆస్ట్రేలియా మధ్య జరుగుతున్న వర్చువల్‌ నాకౌట్ మ్యాచ్‌కు వర్షం అంతరాయం కలిగించింది. ఈ టోర్నీలో ఇదివరకే రెండు మ్యాచ్‌లు వర్షం కారణంగా తుడిచిపెట్టుకుపోయాయి. ఆ కారణంగానే గ్రూప్‌-బిలో ఇంకా సెమీస్ బెర్తులు ఖరారు కాలేదు. తాజాగా కీలకమైన అప్ఘానిస్థాన్, ఆస్ట్రేలియా మ్యాచ్‌కు కూడా వరుణ దేవుడు ఎంట్రీ ఇచ్చాడు. దీంతో మ్యాచ్ మధ్యలో ఆగిపోయింది.

ఈ మ్యాచ్‌లో తొలుత బ్యాటింగ్ చేసిన ఆఫ్ఘానిస్థాన్‌ సరిగ్గా 50 ఓవర్లలో 273 పరుగులకు ఆలౌట్ అయింది. సెదిఖుల్లా అటల్‌ 95 బంతుల్లో 85 రన్స్, అజ్ముతుల్లో ఒమర్జాయ్‌ 63 బంతుల్లో 67 రన్స్ చేసి.. జట్టుకు మెరుగైన స్కోరు అందించారు. ఆస్ట్రేలియా బౌలర్లలో బెన్ డ్వారషూస్‌ అత్యధికంగా 3 వికెట్లు తీశాడు. స్పెన్సర్ జాన్సన్ 2, ఆడమ్ జంపా 2, నాథన్ ఎల్లిస్ 1, మ్యాక్స్‌వెల్ 1 వికెట్లు పడగొట్టారు.

అనంతరం 274 పరుగుల లక్ష్యంతో బరిలోకి దిగిన ఆస్ట్రేలియాకు ఓపెనర్లు శుభారంభం అందించారు. తొలి వికెట్‌కు 4.2 ఓవర్లలోనే 44 పరుగులు జోడించి ఛేజింగ్‌కు గట్టి పునాది వేశారు. ఆ తర్వాత మాథ్యూ షార్ట్ (15 బంతుల్లో 20 రన్స్‌) ఔట్ అయ్యాడు. ఈ దశలో ట్రావిస్ హెడ్‌తో కలిసి స్టీవ్ స్మిత్ స్కోరు బోర్డును ముందుకు తీసుకెళ్తున్నాడు.

ఈ టోర్నీలో చెప్పుకొదగ్గ ప్రదర్శన చేయని.. విధ్వంసకర బ్యాటర్ ట్రావిస్ హెడ్.. ఈ మ్యాచ్‌లో రెచ్చిపోతున్నాడు. ఆరంభంలోనే వికెట్లు తీసి.. ఆసీస్‌పై ఒత్తిడి పెంచుదామనే ప్లాన్‌తో వచ్చిన అప్ఘాన్ బౌలర్లను ఉతికి ఆరేస్తున్నాడు. వర్షం కారణంగా మ్యాచ్ ఆగిపోయే సమయానికి అతడు 40 బంతుల్లో 59 రన్స్ చేసి అజేయంగా నిలిచాడు. స్టీవ్ స్మిత్ 22 బంతుల్లో 19 రన్స్ చేశాడు.

ప్రస్తుతం ఆస్ట్రేలియా 12.5 ఓవర్లలో 1 వికెట్ నష్టానికి 109 రన్స్ స్కోరు చేసింది. ఆ జట్టు విజయానికి ఇంకా 165 రన్స్ అవసరం. ఒకవేళ వర్షం కారణంగా మ్యాచ్ ఆగిపోయినా.. ఆస్ట్రేలియా జట్టు సెమీస్‌కు చేరుతుంది.