2 రోజుల్లో 745 హత్యలు, వీధుల్లో శవాల దిబ్బలు

సిరియాలో ఎప్పటి నుంచో జరుగుతున్న అంతర్యుద్ధంతో ఆ దేశాన్ని పాలించిన బషర్ అల్ అసద్.. దేశం విడిచి.. కొన్ని నెలల క్రితం పారిపోయారు. ఆ తర్వాత దేశాన్ని అధీనంలోకి తీసుకున్న సున్నీ తీవ్రవాద సంస్థ హయత్ తహ్రీర్ అల్ షామ్-హెచ్‌టీఎస్.. సిరియాలో మారణహోమాన్ని సృష్టిస్తోంది. ఇప్పుడు ఈ హయత్ తహ్రీర్ అల్ షామ్ సంస్థ.. సిరియాలోని అలవైట్లే టార్గెట్‌గా భీకర దాడులు, మారణహోమం, ఊచకోతకు దిగింది. అలవైట్లు నివసించే గ్రామాల్లోకి చొరబడుతున్న హెచ్‌టీఎస్‌ మద్ధతుదారులు వారి ఇళ్లల్లోకి వెళ్లి మరీ చంపేస్తున్నారు. ఇళ్ల పైకి ఎక్కి అక్కడి నుంచి లోపల దాక్కున్న వారిని హతమార్చుతున్నారు. దీంతో సాయుధులైన సున్నీ వర్గీయులు, అలవైట్లకు మధ్య ప్రతీకార దాడులు తీవ్రం కావడంతో రక్తం ఏరులైపారుతోంది.

గత కొన్ని దశాబ్దాలుగా అలవైట్లు బషర్ అల్ అసద్‌కు మద్దతుగా ఉన్నారు. బషర్ ప్రభుత్వంలో నేతలుగా, అధికారులుగా, సైన్యంలో కీలక పదవుల్లో అలవైట్లు ఉండేవారు. బషర్ పారిపోవడంతో ఇప్పుడు అలవైట్లను హెచ్‌టీఎస్‌ సానుభూతిపరులు వీరిని ఊచకోత కోస్తున్నారు. ముఖ్యంగా పురుషులను వేటాడి చంపేస్తున్నారు. ఇక గత కొన్నిరోజులుగా జరుగుతున్న ఈ ప్రతీకార దాడుల్లో ఇప్పటివరకు వెయ్యి మందికి పైగా ప్రాణాలు కోల్పోయినట్లు అక్కడి వర్గాలు చెబుతున్నాయి. గత 48 గంటల్లోనే 745 మందిని కాల్చి చంపినట్లు తెలుస్తోంది.

సిరియాలోని చాలా ప్రాంతాల్లో అలవైట్ల మృతదేహాలు నగ్నంగా పడి ఉన్న దృశ్యాలు సోషల్ మీడియాలో తెగ వైరల్‌ కావడం ఇప్పుడు తీవ్ర చర్చనీయాంశంగా మారాయి. ఇక బనియాస్ పట్టణంలో అత్యంత క్రూర దాడులు జరగ్గా.. వీధుల్లో చెల్లాచెదురుకాగా మృతదేహాలు కుప్పలు కుప్పలుగా పడి ఉన్న వీడియోలు వైరల్ అవుతున్నాయి. కొంత మందిని వారి ఇళ్లు, దుకాణాలు, వ్యాపార ప్రాంతాల్లోనే ఉరితీశారు. 14 ఏళ్ల క్రితం సిరియాలో అంతర్యుద్ధం ప్రారంభం కాగా.. అప్పటి నుంచి జరిగిన దాడుల్లో ఇదే అత్యంత దారుణమైన హింసగా అక్కడి వర్గాలు చెబుతున్నాయి.

బ్రిటన్‌కు చెందిన సిరియన్ అబ్జర్వేటరీ ఫర్ హ్యూమన్ రైట్స్ అనే సంస్థ వెల్లడించిన వివరాల ప్రకారం.. 745 మంది అలవైట్లను అతి సమీపం నుంచి కాల్చి చంపినట్లు తెలిపింది. మరో 125 మంది ప్రభుత్వ సిబ్బంది, అసద్ అనుబంధ సాయుధ గ్రూపులతో సంబంధం ఉన్న మరో 148 మంది కూడా మరణించారని పేర్కొంది. ఇక బషర్ అల్ అసద్‌కు బలమైన కోటగా ఉన్న లటాకియా ప్రావిన్స్‌లో 162 మంది అలావైట్లకు మరణశిక్షలు వేసినట్లు నివేదికలు చెబుతున్నాయి.

అసలు ఎవరీ అలవైట్లు?

సిరియాలో మతపరంగా అలవైట్లు మైనారిటీలుగా ఉన్నారు. సిరియా మొత్తం జనాభాలో ఈ అలవైట్లు దాదాపుగా 12 శాతం ఉన్నారు. షియా ఇస్లాం వర్గం నుంచి పుట్టిన ఈ అలవైట్లకు ప్రత్యేక నమ్మకాలను, ఆచారాలను పాటిస్తూ ఉంటారు. సిరియా తీర ప్రాంతాల్లో, మరీ ముఖ్యంగా లటాకియా, టార్టస్ ప్రావిన్సుల్లో ఈ అలవైట్లు ఎప్పటినుంచో నివసిస్తున్నారు. సిరియాను గత 5 దశాబ్దాలుగా అసద్ కుటుంబం పాలించింది. చివరిగా పాలించిన బషర్ అల్ అసద్.. గతేడాది డిసెంబర్‌లో సిరియాను వదిలేసి విదేశాలకు పారిపోయాడు. బషర్ పాలనలో ప్రభుత్వంలో, సైన్యంలో అలవైట్లు కీలక పదవుల్లో ఉండటం సున్నీలకు, అలవైట్లకు మధ్య ఘర్షణకు కారణమైంది.