ముంబై ఇండియన్స్‌ కెప్టెన్‌గా హార్దిక్ పాండ్యా ఎంట్రీ

ఐపీఎల్ 2025లో ముంబై ఇండియన్స్ కెప్టెన్‌గా హార్దిక్ పాండ్యా బరిలోకి దిగాడు. గత సీజన్‌లో స్లో ఓవర్‌ రేట్‌ నమోదు చేసిన కారణంగా.. ఐపీఎల్‌ 2025లో తొలి మ్యాచ్‌కు పాండ్యా దూరమైన విషయం తెలిసిందే. దీంతో అతడు చెన్నై సూపర్ కింగ్స్‌తో మ్యాచ్‌కు దూరమయ్యాడు. అయితే నిషేధం ముగియడంతో పాండ్యా తిరిగి ముంబై ఇండియన్స్ పగ్గాలు చేపట్టాడు. ప్రస్తుతం ఆహ్మదాబాద్ వేదికగా గుజరాత్ టైటాన్స్‌తో జరుగుతున్న మ్యాచ్‌లో బరిలోకి దిగాడు.

ఈ మ్యాచ్‌లో టాస్ గెలిచిన హార్దిక్ పాండ్యా.. గుజరాత్ టైటాన్స్‌ను బ్యాటింగ్‌కు ఆహ్వానించాడు. ఇక హార్దిక్ పాండ్యా ఎంట్రీతో ముంబై ఇండియన్స్ తుది జట్టులో మార్పు చోటుచేసుకుంది. అయితే గుజరాత్ టైటాన్స్ మాత్రం ఎలాంటి మార్పులు లేకుండానే ముంబైతో మ్యాచ్‌కు బరిలోకి దిగింది. ఈ మ్యాచ్ గుజరాత్‌లోని అహ్మదాబాద్ స్టేడియంలో జరుగుతోంది.

కాగా ఐపీఎల్ 2025లో తమ తొలి మ్యాచ్‌లో ముంబై ఇండియన్స్, గుజరాత్ టైటాన్స్ జట్లు ఓడిపోయాయి. చెన్నై సూపర్ కింగ్స్ చేతిలో ముంబై ఇండియన్స్ ఓటమిని చవిచూసింది. ఇక గుజరాత్ టైటాన్స్‌ మాత్రం.. పంజాబ్ కింగ్స్ చేతిలో పరాజయం పాలైంది. ఈనేపథ్యంలో ఇవాళ్టి మ్యాచ్‌లో గెలిచి.. పాయింట్ల ఖాతాను తెరవాలని ఇరు జట్లూ పట్టుదలతో ఉన్నాయి. ఇక ఐపీఎల్ 2025 పాయింట్ల పట్టికలో ముంబై, గుజరాత్‌లు వరుసగా 8, 9 స్థానాల్లో ఉన్నాయి. ఇవాళ గెలిచిన జట్టు.. తమ స్థానాన్ని మెరుగుపర్చుకోనుంది.

తుది జ‌ట్లు..

ముంబై ఇండియన్స్: రోహిత్ శర్మ, ర్యాన్ రికెల్టన్ (వికెట్ కీప‌ర్‌), సూర్యకుమార్ యాదవ్, తిలక్ వర్మ, హార్దిక్ పాండ్యా (కెప్టెన్‌), నమన్ ధీర్, మిచెల్ శాంట్నర్, దీపక్ చాహర్, సత్యనారాయణ రాజు, ముజీబ్ ఉర్ రెహమాన్, ట్రెంట్ బౌల్ట్

గుజరాత్ టైటాన్స్‌: శుభమన్ గిల్ (కెప్టెన్‌), సాయి సుదర్శన్, జోస్ బట్లర్ (వికెట్ కీప‌ర్‌), షెర్ఫాన్‌ రూథర్‌ఫోర్డ్, షారుఖ్ ఖాన్, రాహుల్ తెవాటియా, రషీద్ ఖాన్, రవి శ్రీనివాసన్ సాయి కిషోర్, కగిసో రబడ, మహమ్మద్‌ సిరాజ్, ప్రసిద్ధ్‌ కృష్ణ