ధోనీ ఫ్యాన్స్‌కు 20 ఏళ్లనాటి రోజును గుర్తుచేసిన ఢిల్లీ

ఢిల్లీ క్యాపిటల్స్ ప్లేయర్ కేఎల్ రాహుల్ అదరగొట్టాడు. చెపాక్ వేదికగా చెన్నై సూపర్ కింగ్స్‌తో జరుగుతున్న ఐపీఎల్ 2025 మ్యాచ్‌లో రాహుల్.. సత్తాచాటాడు. ఈ మ్యాచ్‌లో టాస్ గెలిచిన ఢిల్లీ క్యాపిటల్స్.. తొలుత బ్యాటింగ్ ఎంచుకుంది. ఓపెనర్ ఫాఫ్ డుప్లెసిస్ ఈ మ్యాచ్‌కు అందుబాటులో లేకపోవడంతో రాహుల్.. ఓపెనర్‌గా బరిలోకి దిగాడు. తనకు అచ్చొచ్చిన ప్లేస్‌లో అదిరే ప్రదర్శన చేశాడు. తొలుత నిదానంగా ఆడిన ఈ ప్లేయర్.. ఆతర్వాత బ్యాట్ ఝుళిపించాడు. పరిస్థితులకు తగ్గట్లు గేర్ మార్చి జట్టుకు మెరుగైన స్కోరును అందించాడు. దీంతో ఢిల్లీ క్యాపిటల్స్ నిర్ణీత 20 ఓవర్లలో 6 వికెట్ల నష్టానికి 183 రన్స్ స్కోరు చేసింది.

ఈ మ్యాచ్‌లో టాస్ గెలిచి బ్యాటింగ్‌కు దిగిన ఢిల్లీకి తొలి ఓవర్‌లోనే షాక్ తగిలింది. ఓపెనర్ జేక్ ఫ్రెజర్ మెక్‌గుర్క్‌ డకౌట్‌గా వెనుదిరిగాడు. ఆ తర్వాత అభిషేక్ పోరెల్ (20 బంతుల్లో 33 రన్స్‌)తో కలిసి రాహుల్ స్కోరు బోర్డును ముందుకు తీసుకెళ్లాడు. అతడు ఔట్ అయ్యాక క్రీజులోకి వచ్చిన కెప్టెన్ అక్షర్ పటేల్ (14 బంతుల్లో 21 రన్స్‌), సమీర్ రిజ్వీ (15 బంతుల్లో 20 రన్స్‌) భారీ స్కోరు చేయలేకపోయారు. ఓవైపు వికెట్లు పడుతున్నా.. రాహుల్ మాత్రం బాధ్యతాయుతంగా ఆడాడు. వీలుచిక్కినప్పుడల్లా ఫోర్లు, సిక్సర్లు కొడుతూ.. స్కోరు బోర్డును ముందుకు తీసుకెళ్లాడు.

చివరకు 51 బంతుల్లో 77 రన్స్ చేసిన అనంతరం.. రాహుల్ చివరి ఓవర్‌లో ఔట్ అయ్యాడు. అతడి ఇన్నింగ్స్‌లో 3 సిక్స్‌లు, ఆరు ఫోర్లు ఉన్నాయి. చివర్లో ట్రిస్టన్ స్టబ్స్ (12 బంతుల్లో 24 రన్స్ నాటౌట్‌) కూడా రాణించడంతో ఢిల్లీ క్యాపిటల్స్ నిర్ణీత 20 ఓవర్లలో 6 వికెట్ల నష్టానికి 183 రన్స్ స్కోరు చేసింది. చెన్నై సూపర్ కింగ్స్‌ ముందు పోరాడే లక్ష్యాన్ని నిలిపింది. చెన్నై సూపర్ కింగ్స్ బౌలర్లలో ఖలీల్ అహ్మద్ రెండు వికెట్లు తీశాడు. రవీందర్ జడేజా 1, నూర్ అహ్మద్ 1, మతీశ పథిరాన ఒక్కో వికెట్ చొప్పున పడగొట్టారు.